შესაძლებელია თუ არა კიბოსგან განკურნება
"ოჯახის მკურნალი" ყურადღებით ადევნებს თვალს თითოეულ ასეთ სიახლეს და ცდილობს, მკითხველს მათ შესახებ ამომწურავი ინფორმაცია მიაწოდოს. სწორედ ასეთ ფაქტს წავაწყდით სულ ცოტა ხნის წინ ინტერნეტით, ჩვენი არხებით გადავამოწმეთ კიდეც და აღმოვაჩინეთ, რომ ეს პრეპარატი ახლახან საქართველოშიც დარეგისტრირდა. ამ საკითხისადმი მკითხველთა დიდი ინტერესის გამო შემოგთავაზებთ იმ ინფორმაციას, რომლის მოძიებაც ამ მოკლე ხანში მოვახერხეთ, თუმცა აქვე იმასაც დავძენთ, რომ "ოჯახის მკურნალი" ამ საკითხს ბოლომდე მიადევნებს თვალს და აღნიშნული ფაქტის შესახებ ახალ და ახალ ცნობებს მოგაწვდით. ყველა დაგვეთანხმება, რომ სიმსივნეების მკურნალობა სავსებით შესაძლებელია. თუ ქვეყანაში მაღალ დონეზე დგას პროფილაქტიკური მედიცინა და, საზოგადოდ, სამედიცინო კულტურა. ამ შემთხვევაში სიმსივნეს უმეტესად პირველ და მეორე სტადიებშივე აღმოაჩენენ. შესაბამისად, ამ დაავადებისგან თავის დაღწევის ალბათობაც მეტია. უკიდურეს შემთხვევაში, შესაძლებელი ხდება სიცოცხლის გახანგრძლივება, დროის მოგებას კი მედიცინაში ძალიან დიდი მნიშვნელობა აქვს, რადგან ეს მეცნიერება გიგანტური ნაბიჯებით მიიწევს წინ და სავსებით შესაძლებელია, წამალი, რომელიც "დღეს" არ არსებობს, "ხვალ" გამოჩნდეს და უამრავი ადამიანი იხსნას. ჯერჯერობით კი ავთვისებიან სიმსივნეთა მკურნალობის იმ მეთოდებს მიმართავენ, რომლებიც ზემოთ ჩამოვთვალეთ. სამწუხარო ის არის, რომ ზემოჩამოთვლილ მეთოდებს დადებითთან ერთად უარყოფითი შედეგებიც მოსდევს. ქირურგიული ჩარევის შემთხვევაში ეს არის მისი დიდი მოცულობა და ტრავმულობა, ქიმიო- და რენტგენოთერაპიაც ტოქსიკური ეფექტით გამოირჩევა, ზოგჯერ ძნელი გადასატანია, აქვს საკმაოდ ბევრი უკუჩვენება და სიმსივნურ უჯრედებთან ერთად ადამიანის ორგანიზმის ჯანმრთელ უჯრედებზეც ახდენს გავლენას. არცთუ ისე იშვიათია ასეთი მკურნალობის შედეგად იმუნიტეტის დაქვეითების შემთხვევებიც. მაგრამ ეს იმას არ ნიშნავს, რომ ამ ტიპის თერაპია ადამიანმა არ უნდა ჩაიტაროს, რადგან მისი წყალობით უამრავი პაციენტი გადარჩა. ახალი პრეპარატის ანოტაციაში ასეთი რამ ამოვიკითხეთ: "პირველად რუსეთის მეცნიერთა მიერ შემუშავებულ იქნა ავთვისებიანი დაავადებების მკურნალობის მეცნიერულად დასაბუთებული ინოვაციური მეთოდიკა, რომელსაც:
- მაქსიმალურ ეფექტურობასა და ადვილად ასატანობასთან ერთად ახასიათებს მინიმალური გვერდითი მოვლენები და ტოქსიკურობა;
- მისი მოქმედება მიმართულია როგორც უშუალოდ კიბოს უჯრედებისკენ, ასევე ადამიანის ორგანიზმის საკუთარი სიმსივნის საწინააღმდეგო იმუნიტეტის სტიმულაციისკენ;
- თითქმის არ გააჩნია უკუჩვენებები და გვერდითი მოვლენები;
- არჩევითად მოქმედებს მხოლოდ სიმსივნურ უჯრედებზე, განურჩევლად პროცესის ლოკალიზაციისა და მოცულობისა (მათ შორის - მეტასტაზებზეც), ისე, რომ არ ეხება ჯანმრთელ უჯრედებს;
- ბიოლოგიურად ეთავსება ადამიანის ორგანიზმს, ეკოლოგიურად სუფთა და უსაფრთხოა;
- აქვეითებს კლასიკური ქიმიოთერაპიის ტოქსიკურობას და საკმაოდ ზრდის მის ეფექტიანობას (მისი ჩატარების აუცილებლობის შემთხვევაში (კომბინირებული მკურნალობა);
- გამოირჩევა რეციდივის საწინააღმდეგო მკურნალობის უნიკალური ეფექტურობით.
კლინიკური კვლევები არაერთი ათეული წლის განმავლობაში მიმდინარეობდა. მუშაობა 2009 წელს დასრულდა ფარმაკოლოგიური პრეპარატის ოფიციალური რეგისტრაციით. გაჩნდა მეტად ტრავმული ოპერაციებისა და მათი შედეგების თავიდან აცილების შანსი, და კიდევ - შანსი იმისა, რომ მნიშვნელოვნად შემცირდეს ოპერაციების მოცულობა მათი გარდაუვალობის შემთხვევაში. ეს სამკურნალწამლო საშუალება მხოლოდ ექიმის რეცეპტით გაიცემა. მეთოდის ეფექტიანობა და უსაფრთხოება ემყარება მხოლოდ მტკიცებითი მედიცინის პრინციპებს". ჩვენ მიერ მოძიებული ინფორმაციით, მკურნალობის ამ მეთოდიკის შექმნა ჯერ კიდევ ახალგაზრდა მეცნიერების, ონკოიმუნოლოგიის დახმარებით მოხერხდა. ეს ონკოლოგიის სრულიად ახალი მიმართულებაა, რომელსაც დიდი პერსპექტივა აქვს. ზემოაღნიშნულ მეთოდიკაზე მუშაობა მრავალ ქვეყანაში წლების განმავლობაში მიმდინარეობდა, მაგრამ ბედმა საბოლოოდ რუს მეცნიერებს გაუღიმა. ეს მეთოდიკა უკვე ცნობილი და აღიარებულია მსოფლიოს თითქმის ყველა ქვეყანაში. სიმართლე გითხრათ, ამ ინფორმაციის წაკითხვის შემდეგ გონებაში უნებლიეთ ასეთმა კითხვებმა გამიელვა: ეს ხომ პრაქტიკულად სწორედ ის ჩამონათვალია, რომლის მიღწევასაც მეცნიერები დღემდე ამაოდ ცდილობდნენ?.. ესე იგი უკვე შესაძლებელია კიბოს განკურნება?.. ნუთუ უკვე მიაგნეს?.. რამდენი ადამიანი ამოისუნთქებს შვებით?.. მერე პროფესიულმა თავმოყვარეობამაც გამკენწლა და ვიფიქრე: ჩვენ პირველნი ვიქნებით, ვინც ეს სასიხარულო ინფორმაცია მიაწოდა დაინტერესებულ მკითხველს. ასეა თუ ისე, ზემოჩამოთვლილი კითხვები პასუხებს მოითხოვს, რომლებსაც "ოჯახის მკურნალის" საშუალებით უახლოეს მომავალში შემოგთავაზებთ.
p.s. დაინტერესებულ მკითხველს ვთავაზობთ იმ საიტის მისამართს, რომლის მასალებზე დაყრდნობითაც მომზადდა ეს წერილი: www. oncology-xxI.ru დარწმუნებული ვართ, მასზე მკითხველი უამრავ სხვა საინტერესო ინფორმაციასაც მოიძიებს.