ბობოყვათში, ავტოსაგზაო შემთხვევის შედეგად დაშავებული 8 წლის მოზარდის ჯანმრთელობის მდგომარეობა მძიმეა
როგორც "ინტერპრესნიუსს" ქობულეთის რეფერალურ საავადმყოფოში განუცხადეს, დაშავებული მოზარდი, რომელიც მართვით სუნთქვაზე იმყოფებოდა, ქუთაისის ინტერვენციულ საავდმყოფოში გადაიყვანეს. ექიმების ინფორმაციით, 8 წლის მოზარდს თავის ტვინის დაჟეჟილობა აქვს მიღებული.
ავტოსაგზაო შემთხვევა გუშინ, დღის მეორე ნახევარში მოხდა. თვითმხილველების ინფორმაციით, 8 წლის ბიჭი ცენტრალურ საავტომობილო გზას კვეთდა, როდესაც მსუბუქი ავტომობილი დაეჯახა. იგი სასწრაფო სამედიცინო დახმარების ბრიგადამ ქობულეთში რეფერალურ საავადმყოფოში გადაიყვანა.
საქართველოს შინაგან საქმეთ სამინისტროს ინფორმაციით, მომხდართან დაკავშირებით გამოძიება "სისხლის სამართლის კოდექსის" 276-ე მუხლის პირველი ნაწილით დაიწყო, რაც ტრანსპორტის მოძრაობის, უსაფრთხოების ან ექსპლუატაციის წესების დარღვევას გულისხმობს, რამაც ჯანმრთელობის ნაკლებად მძმე დაზიანება გამოიწვია.