ვაშლის წვენი ალცჰაიმერის დაავადების რისკს ამცირებს
ალცჰაიმერის დაავადება წარმოადგენს ცენტრალური ნერვული სისტემის პროგრესირებად დაზიანებას, რომელიც ცილა ბეტა-ამილოიდის დონის მატებით მიმდინარეობს და ჭკუასუსტობას იწვევს. კვლევის ხელმძღვანელის, პროფესორ ტომას შეას თქმით, ვაშლის წვენში შემავალი ბიოლოგიურად აქტიური ნივთიერებები ბეტა-ამილოიდის სინთეზს ბლოკავს. "ჯერჯერობით არ გაგვაჩნია უტყუარი საბუთები იმისა, რომ ვაშლის წვენის რეგულარულ მიღებას ალცჰაიმერის დაავადების რისკის შემცირებასთან უშუალო კავშირი აქვს, მაგრამ ეჭვგარეშეა - ვაშლში შემავალი ნივთიერებები ახდენს ცენტრალური ნერვული სისტემის ოპტიმიზაციას და ამუხრუჭებს ამ დაავადების განვითარებას", - განაცხადა მეცნიერმა. ლაბორატორიულ თაგვებს დიდი ხნის განმავლობაში აძლევდნენ ორ ჭიქა ვაშლის წვენის ეკვივალენტს. მათი თავის ტვინის ბიოქიმიური შემადგენლობის ცვლილებათა შესწავლამ ნათელყო, რომ ტვინის ქსოვილში ბეტა-ამილოიდების ჩალაგების ინტენსივობა შემცირდა - ცხოველები ინტელექტუალურ ამოცანას უკეთ ართმევდნენ თავს.