საფრანგეთში სიმსუქნის გენეტიკური რუკა შეადგინეს
მეცნიერთა ჯგუფმა, რომელსაც ფილიპ ფროგელი და დევიდ მაიერი ხელმძღვანელობდნენ, ბრიტანელ კოლეგებთან ერთად შეისწავლა 2796 ადამიანის გენომი, რომელთაგან 1380 მემკვიდრეობითი სიმსუქნის მძიმე ფორმით იყო დაავადებული. პრაქტიკულად ყველა პაციენტს აღმოაჩნდა გენეტიკური მუტაცია, რომელიც შემდეგ გერმანიაში, საფრანგეთსა და შვეიცარიაში სიმსუქნით დაავადებული 14 ათასი პაციენტის გამოკვლევამაც გამოავლინა.
"დარწმუნებული ვარ, სიმსუქნესთან დაკავშირებული გენეტიკური მუტაციის აღმოჩენა მოგვცემს საშუალებას, ვიპოვოთ სიმსუქნის განვითარების შემაფერხებელი წამალი როგორც ბავშვებისთვის, ისე ზრდასრული ადამიანებისთვის", - განაცხადა ფროგელმა. მკვლევართა თქმით, ამიერიდან შესაძლებელი იქნება, ბავშვებში სიმსუქნისადმი მიდრეკილება ადრეულ ასაკშივე იქნეს აღმოჩენილი, რაც მასთან ბრძოლას ერთიორად გააადვილებს.