ჩერნობილის წვიმები -შვედების სატკივარი
26.02.2009
შვედმა მეცნიერებმა კიბოთი ავადობის მატება ჩერნობილის კატასტროფას დაუკავშირეს. მათი თქმით, შვედეთის ჩრდილოეთ ნაწილში 1988-1996 წლებში მცხოვრებ ადამიანებს
შორის აღრიცხული კიბოს 22 400 შემთხვევა სწორედ რადიაქტიური ნალექების ზემოქმედებით აიხსნება. მეცნიერები ასეთ დასკვნამდე მას შემდეგ მივიდნენ, რაც გამორიცხეს კიბოს სხვა რისკფაქტორები - თამბაქოს წევა, ასაკი, სიმსუქნე.
საგულისხმოა ისიც, რომ შვედეთში ლეიკოზით და ფარისებრი ჯირკვლის კიბოთი ავადობამ უმნიშვნეოდ მოიმატა, რაც რადიაქტიური იოდ-131-ით დასხივების განსაკუთრებით ხშირი შედეგია.
ზოგიერთი სპეციალისტი ამ მოსაზრებას ეჭვქვეშ აყენებს, რადგან მიიჩნევს, რომ გამოსხივების დოზა მეტისმეტად მცირე იყო, გარდა ამისა, ჩერნობილის კატასტროფის შედეგებზე საუბარი ჯერ კიდევ ნაადრევია - ამაზე ლაპარაკი ავარიიდან სულ მცირე 20 წლის შემდეგ შეიძლება. ასე რომ, კვლევის შედეგი გადახედვას მოითხოვს.
