News
მკვლევრებმა დაადგინეს, რომ მიოციტები იღუპებიან მემბრანების მთლიანობის დარღვევის შედეგად, რაც გამოწვეულია დამჟანგველების (პირველ რიგში, თავისუფალი რადიკალების) გავლენით და დატვირთვისას კუნთების შეკუმშვის პროცესში მექანიკური ზემოქმედებით. ცხოველებზე დაკვირვებისას მაკნილის ჯგუფმა დაასკვნა, რომ ალფა-ტოკოფეროლი ანტიოქსიდანტის როლს ასრულებს და ბოჭავს ჟანგვის შედეგად მიღებულ საშიშ პროდუქტებს. ე ვიტამინს შეუძლია ჩაჯდეს უჯრედის მემბრანაში და იგი დაზიანებისგან დაიცვას. გარდა ამისა, იგი ააქტიურებს ფოსფოლიპიდებს, რომლებისგანაც შედგება უჯრედების გარსი. ამის წყალობით დაზიანებული მემბრანები უფრო მალე აღდგება. მეორე გამოკვლევის დროს კი მეცნიერებმა აღმოაჩინეს, რომ უჯრედული მემბრანების ანალოგიური დაზიანებები დიაბეტიან ცხოველებში შესაძლოა გლუკოზის მაღალი დონით იყოს გამოწვეული. გამოკვლევის შედეგების მიხედვით შეიძლება ითქვას, რომ ალფა-ტოკოფეროლს ამ დაზიანებათა ლიკვიდაციის უნარიც შესწევს.
D ვიტამინის დეფიციტი და ფსიქიკური დარღვევები
ამერიკელმა მეცნიერებმა დ ვიტამინის დეფიციტი მოზარდებში ფსიქიატრიული დაავადებების სიმძიმეს დაუკავშირეს. გამოკვლევა ჩაატარა ოჰაიოს შტატის ქალაქ კოლუმბუსის ბავშვთა სახელმწიფო საავადმყოფოს სპეციალისტთა ჯგუფმა, რომელსაც ბარბარა გრეშეზი ხელმძღვანელობდა. გამოკვლევის შედეგები ამერიკის ბავშვთა და მოზარდთა ფსიქიატრიის აკადემიის ყოველწლიურ სხდომაზე გამოქვეყნდა. მკვლევრები 18 თვის განმავლობაში აკვირდებოდნენ 104 მოზარდს, რომლებმაც ფსიქიატრიული დახმარებისთვის ნიუ-იორკის შტატში მდებარე როჩესტერის უნივერსიტეტს მიმართეს. მათი მესამედი გოგონა იყო, ხოლო საშუალო ასაკი - 15 წელი. დ ჯგუფის ვიტამინების დეფიციტი აღმოაჩნდა მოზარდთა 72%-ს. ამასთან, თითქმის ნახევარს ამ ნივთიერებების გამოხატული უკმარისობა ჰქონდა. მეცნიერებმა დაასკვნეს, რომ ე.წ. პროდუქტიული ფსიქოპათოლოგიური სიმპტომატიკა - ჰალუცინაციები, ბოდვა - D ჰიპოვიტამინოზიან მოზარდებს შორის უფრო ხშირია, ვიდრე ამ ნივთიერებების ნორმალური დონის მქონეებს შორის: 40% 16-ის წინააღმდეგ. გამოკვლევის ავტორებს მიაჩნიათ, რომ შედეგები საფუძველს იძლევა, მკაფიო დეპრესიულ დარღვევებთან დ ჰიპოვიტამინოზის კავშირზე ვილაპარაკოთ. მეცნიერებმა ისიც აღნიშნეს, რომ დ ჯგუფის ვიტამინების დეფიციტი 13-დან 19 წლამდე ასაკის ამერიკელთა დაახლოებით 9%-ს აქვს.
ერთ-ერთი უძველესი გენური მუტაცია
ოჰაიოს უნივერსიტეტის ონკოლოგიურ ცენტრში მეცნიერთა ჯგუფმა აღწერა მუტაცია, რომელიც იშვიათ, უკურნებელ დაავადებას - იმერსლუნდ-გრენსბეკის სინდრომს იწვევს. დაავადებას საფუძვლად უდევს ვიტამინ B12-ის დეფიციტი, რომელსაც B12-დეფიციტურ ანემიამდე მივყავართ. აღმოჩნდა, რომ გენეტიკურმა დეფექტმა, რომელიც დღეს სხვადასხვა ეთნიკურ ჯგუფში - არაბებში, თურქებსა და ებრაელებში - გვხვდება, ისტორიამდელ ეპოქაში, ჩვენს წელთაღრიცხვამდე 11 წელზე მეტი ხნის წინ იჩინა თავი ადამიანთა ერთ-ერთ პოპულაციაში. უძველესი მუტაციის ფართო გავრცელებამ მეცნიერები გააოცა, რადგან, ჩვეულებრივ, მუტაცია არ გადის იმ ეთნიკური ჯგუფის ან შედარებით იზოლირებული პოპულაციის საზღვრებს გარეთ, სადაც იგი წარმოიშვა. IGS სინდრომის იდენტიფიცირება პირველად დაახლოებით 50 წლის წინ მოხდა. ეს არის B12-დეფიციტური ანემიის იშვიათი რეცესიულ-მემკვიდრეობითი ფორმა, როდესაც ნაწლავის ეპითელიუმის დაზიანების შედეგად ირღვევა ვიტამინ B12-ის შეწოვა. ეს დაავადება, წესისამებრ, სიცოცხლის პირველი ორი წლის განმავლობაში ვლინდება. IGS-ის მქონე ბავშვებს მიდრეკილება აქვთ ინფექციებისადმი, ადვილად იღლებიან და ახასიათებთ ყურადღების დეფიციტი. თუ მათ ინექციების გზით განუწყვეტლივ არ მიაწოდეს ვიტამინი, უსათუოდ განუვითარდებათ B12 -დეფიციტური ანემია, რომელსაც ლეტალური შედეგის მაღალი ალბათობა ახასიათებს.