იშვიათი, დაბალკალორიული შაქრის წარმოების ახალი მეთოდი აღმოაჩინეს
ტაფტსის უნივერსიტეტის მეცნიერებმა შეიმუშავეს ტაგატოზის (იშვიათი შაქარი, რომელსაც თითქმის ისეთივე გემრიელი გემო აქვს, როგორც ჩვეულებრივ შაქარს, მაგრამ სისხლში გლუკოზის დონეს უფრო ნაკლებად ზრდის) წარმოების უფრო იაფი და ეფექტური მეთოდი, კვლევის შედეგები გამოქვეყნდა ჟურნალ Cell Reports Physical Science (CRep)-ში.
ტაგატოზა არის ბუნებრივი შაქარი, რომელიც მცირე რაოდენობით გვხვდება რძესა და ხილში. სიტკბოთი ის შაქრის მსგავსია (დაახლოებით 92%), მაგრამ შეიცავს დაახლოებით 60%-ით ნაკლებ კალორიას და იწვევს სისხლში შაქრისა და ინსულინის დონის მხოლოდ ზომიერ მატებას. ეს თვისებები მას პერსპექტიულ დამატკბობლად აქცევს დიაბეტით და მეტაბოლური დარღვევებით დაავადებული ადამიანებისთვის. აქამდე ტაგატოზის ფართოდ გამოყენებას აფერხებდა მისი წარმოების სირთულე და მაღალი ღირებულება.
არსებული ტექნოლოგიები მის შედარებით ნაკლებ რაოდენობას იძლეოდა და ძვირი ღირდა. მეცნიერთა ჯგუფმა შემოგვთავაზა ახალი ბიოტექნოლოგიური მიდგომა: მათ გამოიყენეს გენმოდიფიცირებული ბაქტერიები, რომლებიც ჩვეულებრივ გლუკოზას ტაგატოზად გარდაქმნიან. მეთოდის ძირითადი ელემენტი იყო პროტოზოაში ნაპოვნი ფერმენტი, რომელიც თავისი სიცოცხლის გარკვეულ ეტაპებზე „ლორწოვანი“ მასის სახით ჩნდება მყარი საფარის გარეშე.
შედეგად, მიღებული ტაგატოზის რაოდენობამ 95%-ს მიაღწია, რაც მნიშვნელოვნად აღემატება ტრადიციული მეთოდების მაჩვენებელს, რომელიც 40-დან 77%-მდე მერყეობდა. ავტორების აზრით, ამ მიდგომამ შეიძლება ტაგატოზის სამრეწველო წარმოება ეკონომიკურად მომგებიანი გახადოს.
შაქრის შემცვლელების უმეტესობისგან განსხვავებით, ტაგატოზას შეუძლია იმოქმედოს შაქრის სრულ შემცვლელად კულინარიაში: ის საკვებს სასურველ ტექსტურას ანიჭებს, გაცხელებისას კარამელიზდება და გამოსადეგია ცხობისთვის. გარდა ამისა, კვლევები მიუთითებს მის პოტენციურ სარგებელზე პირის ღრუს ჯანმრთელობისა და ნაწლავის მიკრობიომისთვის.