ლალი ჩხიკვაძე

პენისის გარეგნობის ან ფუნქციის ცვლილება შეიძლება იყოს ჯანმრთელობის უფრო სერიოზული პრობლემების ნიშანი და უარყოფითად იმოქმედოს მამაკაცის ცხოვრების ხარისხზე. ამიტომ ძალიან მნიშვნელოვანია იმის გაგება, თუ რა არის ნორმალური და როდის არის დრო, რომ მიმართოთ სამედიცინო დახმარებას.

რამოდენიმე კითხვა, რომელიც შეიძლება ასაკთან ერთად გაჩნდეს:

1. პენისი ზომაში შემცირდება?

ამ კითხვაზე საბოლოო პასუხი არ არსებობს, რადგან არ ჩატარებულა კვლევები, რომლებიც აფასებდნენ პენისის სიგრძეს და სისქეს ერთსადაიმავე მამაკაცებში ათწლეულების განმავლობაში. არსებული კვლევები პენისის ზომებს მხოლოდ ადარებს სხვადასხვა მამაკაცებში სხვადასხვა ასაკში. გარდა ამისა, არსებობს პენისის ზომის გაზომვის სხვადასხვა ხერხი - მოდუნებულ, ან ერექციის მდგომარეობაში, რაც ასევე ართულებს კვლევის შედეგების შედარებას.

თუმცა, ზოგიერთ მამაკაცში ასაკთან დაკავშირებული დაავადებები იწვევს პენისის სიგრძის შემცირებას. კერძოდ:

• სიმსუქნე, რომლის დროსაც პენისის ძირი ცხიმოვანი ქსოვილის ნაკეცებშია დამალული;
• პროსტატის ოპერაციის დროებითი შედეგები;
• პეირონის დაავადება, რომლის დროსაც ბოჭკოვანი ქსოვილის წარმოქმნა იწვევს პენისის დეფორმაციას ერექციის დროს.

ერექციის დროს პენისის სიგრძე ასევე შეიძლება შემცირდეს ასაკთან ერთად ერექციული დისფუნქციის და პენისის ქსოვილების ელასტიურობის დაქვეითების გამო, რომლებიც ასაკთან ერთად ნაკლებად ელასტიური ხდება.

2. იქნება ერექცია?

ბრიტანეთის 6000-ზე მეტი მაცხოვრებლის კვლევის მიხედვით, ერექციული დისფუნქცია გავლენას ახდენს 50 წელზე უფროსი ასაკის მამაკაცების დაახლოებით 15%-ზე და 80 წელზე უფროსი ასაკის მამაკაცების თითქმის 90%-ზე. უფრო მეტიც, რაც უფრო ცუდია მამაკაცის ზოგადი ჯანმრთელობა, მით უფრო მაღალია იმპოტენციის რისკი.

მედიკამენტები, როგორიცაა ვიაგრა, შეიძლება დროებით დაგეხმაროთ, მაგრამ მედიკამენტები არ გამოასწორებენ სისხლძარღვების და ნერვების დისფუნქციას, რომლებსაც ემყარება ერექციული პრობლემები.

ასაკთან დაკავშირებული სხვა ცვლილებები მოიცავს პენისის მგრძნობელობის დაქვეითებას, რაც იწვევს სექსუალური აღგზნების შემცირებას. სქესობრივი აქტის დროს ეაკულაციის მიღწევა რთულდება და ნაკლებად ხშირად ხდება.

გარდა ამისა, ასაკთან ერთად მცირდება სათესლე სითხის მოცულობა და მისი გამოდევნის ძალა. ახლა მამაკაცს გაცილებით მეტი დრო სჭირდება ეაკულაციის შემდეგ სექსუალური აღგზნების ხელახლა განცდისთვის. როგორც კვლევის შედეგები აჩვენებს, 70 წელს გადაცილებული მამაკაცების 33%-ისთვის ორგაზმის მიღწევა შეუძლებელი ან პრობლემურია.

3. იცვლება თუ არა პენისის ფორმა?

ასაკთან ერთად პენისის ფორმა ჩვეულებრივ არ იცვლება. თუმცა პეირონის დაავადების რისკი ასაკთან ერთად იზრდება. ეს პათოლოგია, რომელიც იწვევს ტკივილს და იმპოტენციას, აწუხებს 70 წელს გადაცილებული მამაკაცების 6,5%-ს.

4. ხშირი შარდვის პრობლემა იქნება თუ არა?

ასაკის მატებასთან ერთად მამაკაცები უფრო ხშირად განიცდიან შარდის შეუკავებლობას, სუსტი ნაკადით შარდვას, შარდვის დაწყებისა და შეწყვეტის პრობლემებს, ღამით შარდვის ხშირ სურვილს და ა.შ. ასეთ პრობლემებს უჩივის 65 წელს გადაცილებული მამაკაცების თითქმის ნახევარი და 80 წელზე უფროსი მამაკაცების 70%. სავარაუდოდ, ეს გამოწვეულია პროსტატის კეთილთვისებიანი ჰიპერპლაზიით.

ასაკთან დაკავშირებული ყველა ამ ცვლილებამ შეიძლება უარყოფითად იმოქმედოს მამაკაცის ჯანმრთელობასა და კეთილდღეობაზე. თუ მას მაინც სურს სექსი, მაშინ ერექციისა და ეაკულაციის პრობლემები აუცილებლად აქვეითებს მისი ცხოვრების ხარისხს, გავლენას ახდენს მის ფსიქიკურ მდგომარეობაზე და პირად ურთიერთობებზე. იგივე შეიძლება ითქვას საშარდე გზების პრობლემებზეც.

ამასთან, ერექციული დისფუნქცია შეიძლება იყოს ისეთი სერიოზული დაავადებების სიმპტომი, როგორიცაა დიაბეტი, გულ-სისხლძარღვთა დაავადებები, ჰიპერტენზია და ნევროლოგიური დარღვევები.

კერძოდ, პენისის მდგომარეობა შეიძლება ასახავდეს სისხლძარღვების მდგომარეობას მთელ სხეულში, ხოლო ერექციული პრობლემების განვითარებამ შეიძლება მიუთითოს მოახლოებული გულის შეტევაზე ან ინსულტზე.

შარდვის პრობლემები, რომლებიც ხშირად თან ახლავს იმპოტენციას, დაკავშირებულია საშარდე გზების ინფექციების და თირკმელების ქრონიკული დაავადების გაზრდილ რისკთან.

რა არის ნორმალური და როდის არის ექიმთან მისვლის დრო?

ნორმალური დაბერება მოიცავს ცვლილებებს პენისისა და პროსტატის სისხლძარღვებში და ნერვულ დაბოლოებებში.

თუ ზრუნავთ თქვენს ჯანმრთელობაზე, იხელმძღვანელებთ ჯანსაღი ცხოვრების წესით, ჩაიტარებთ რეგულარულ სამედიცინო გამოკვლევებს და დროულად მკურნალობთ ნებისმიერ გამოვლენილ დაავადებას, მაშინ ეს ასაკთან დაკავშირებული ცვლილებები შეიძლება ძალიან ნელა განვითარდეს.

თუმცა, მნიშვნელოვანია მიმართოთ სამედიცინო დახმარებას, თუ:

• თქვენ შენიშნეთ მნიშვნელოვანი ცვლილებები პენისის ზომასა და ფორმაში, ან უჩვეულო სიმსივნური წარმონაქმნი;
• ტკივილი ან დისკომფორტი პენისში ან მის გარშემო;
• ერექციული დისფუნქცია გახდა თქვენი მუდმივი თანამგზავრი;
• შარდვის სიმპტომები ჩნდება უეცრად ან ძალიან შემაწუხებელია.