ფრანგი სოციოლოგები: მთელ მსოფლიოში ხალხი არ ენდობა მათზე ღარიბებს
პარიზის პოლიტიკურ მეცნიერებათა ინსტიტუტის სოციალური უთანასწორობის კვლევის ცენტრის მეცნიერებმა გაარკვიეს, რომელ ადამიანებს ენდობიან ნაკლებად მათი თანამოქალაქეები სხვადასხვა კულტურებში.
იმისათვის, რომ კვლევა მაქსიმალურად ობიექტური ყოფილიყო, ის ჩატარდა რვა ქვეყანაში:
- ბრაზილია,
- კოლუმბია,
- კონგო,
- ინდოეთი,
- საფრანგეთი,
- ნიგერია,
- ფილიპინები,
- დიდი ბრიტანეთი.
ნაკლები რესურსის მქონე ადამიანები ნაკლებად სანდოებად ითვლებიან, ნათქვამია კვლევაში, რომელიც გამოქვეყნდა ჟურნალში Social Psychological and Personality Science. ღარიბები ერთნაირად არასანდო გამოიყურებიან ევროპელების, კონგოელების, ფილიპინელებისა და ბრაზილიელების თვალში, ასკვნიან სოციოლოგები.
მოკრძალებული შემოსავლის მქონე ადამიანებშიც კი მტკიცედ არის გამყარებული სტერეოტიპი, რომ უმჯობესია, არ დაუჯეროთ კიდევ უფრო ღარიბ თანამემამულეს.
კვლევის ავტორის მელუზინე ბუნ-ფალერის თქმით, ნაშრომი ხელს უწყობს უფრო ფართო აკადემიურ დებატებს და ხაზს უსვამს სოციალურ-ეკონომიკური ფონის მნიშვნელობას სტერეოტიპების ფორმირებაში, ისეთ ფაქტორებთან ერთად, როგორიცაა სქესი, ასაკი და რასა.
როგორც ბუნ-ფალერი განმარტავს, სოციალური უთანასწორობის გაღრმავებამ და ცხოვრების დონის დაცემამ შეიძლება გამოიწვიოს ნდობის სრული დაქვეითება. და ასეთი საკითხების შესწავლა მნიშვნელოვანია, რათა უკეთ გავიგოთ, თუ როგორ ფუნქციონირებს სხვადასხვა საზოგადოება, მათ შორის იმიგრანტი დიასპორები, რომლებიც ბევრ ქვეყანაში ყველაზე ღარიბია.
თუმცა, მკვლევარი აფრთხილებს, რომ მისი ნამუშევარი სტერეოტიპებს ეხება. და შედეგები სულაც არ ნიშნავს იმას, რომ დაბალი შემოსავლისა და ცხოვრების დონის მქონე ადამიანებს ნაკლებად უნდა ვენდოთ.