PFIZER წყვეტს სიმსუქნის სამკურნალო ახალი წამლის კვლევას
II ფაზის კვლევის პაციენტების უმეტესობა იძულებული გახდა შეეწყვიტა მკურნალობა ისეთი გვერდითი ეფექტების მაღალი სიხშირის გამო, როგორიცაა გულისრევა და ღებინება.
Pfizer აგრძელებს პრეპარატის დღეში ერთხელ მიღების ვერსიის შემუშავებას. თუმცა, არსებული ვითარება მაინც აფერხებს კომპანიას წონის დასაკლები პრეპარატების ბაზარზე შესვლას, რომელიც ანალიტიკოსების ვარაუდით, ათწლეულის ბოლოსთვის 100 მილიარდ დოლარს მიაღწევს.
მეორე ფაზის კვლევაში, კომპანიამ განაცხადა, რომ 32 კვირის განმავლობაში ჭარბწონიან და ტიპი 2 შაქრიანი დიაბეტის მქონე მოზრდილებში, წამალმა სხეულის წონის 13%-ით შემცირება გამოიწვია. შედარებისთვის, კომპანიის Eli Lilly პერორალური წამლის მაღალმა დოზამ გამოიწვია 15% წონის დაკლება 36 კვირის განმავლობაში.
ბირჟაზე, Pfizer-ის აქციები 4,8%-ით დაეცა და 29,33 დოლარი შეადგინა.
დანუგლიპრონი მიეკუთვნება დიაბეტისა და სიმსუქნის წამლების იმავე კლასს, როგორც Novo Nordisk'-ის Wegovy და Ozempic, და Eli Lilly'-ის Mounjaro და Zepbound.
Pfizer-მა განაცხადა, რომ ახლა იმუშავებს დანუგლიპრონის დღეში ერთხელ მისაღებად მოდოფიცირებულ ვერსიაზე. კომპანია ამჟამად „აგროვებს მონაცემებს წამლის პოტენციური პროფილის შესასწავლად“. მომავალი წლის პირველ ნახევარში მიღებული იქნება ადამიანის ორგანიზმზე პრეპარატის გავლენის შესწავლის შედეგები.
კომპანიის განცხადების თანახმად, მიუხედავად იმისა, რომ ხშირი გვერდითი მოვლენები წამლის ორჯერადი მიღებისას იყო უმნიშვნელო, ისინი ხასიათდებოდა მაღალი სიხშირით. პრეპარატის ყველა დოზის მიღებისას მოხსნის მაჩვენებელი აჭარბებდა 50%-ს, ხოლო პლაცებოს ჯგუფში შესაბამისი მაჩვენებელი იყო დაახლოებით 40%.
გულისრევა დაფიქსირდა კვლევის მონაწილეთა 73%-ში, ღებინება 47%-ში და დიარეა 25%-ში. თუმცა, კვლევამ არ გამოავლინა უსაფრთხოების რაიმე ახალი სიგნალი, დასძინა Pfizer.