ლალი ჩხიკვაძე

ნიუ-იორკში NYU Langone Health-ის ქირურგებმა ჩაატარეს მსოფლიოში პირველი მთლიანი თვალის გადანერგვა ადამიანზე. ამის შესახებ Reuters იუწყება.

ამ დრომდე ექიმებს მხოლოდ რქოვანას გადანერგვა შეეძლოთ.

„ის ფაქტი, რომ ჩვენ თვალი გადავნერგეთ, წინგადადგმული ნაბიჯია“, - თქვა ექიმმა ედუარდო როდრიგესმა, რომელიც ხელმძღვანელობდა ექიმების ჯგუფს.

პაციენტი იყო 46 წლის სამხედრო ვეტერანი არკანზასიდან აარონ ჯეიმსი, რომელმაც სამსახურში ელექტრო დაზიანება მიიღო. ინციდენტის შედეგად მას სახის მარცხენა მხარე დაუზიანდა, თვალის, ცხვირის და პირის ჩათვლით.

140-ზე მეტმა ქირურგი, ექთანი და სამედიცინო პერსონალი ოპერაციას დაახლოებით 21 საათის განმავლობაში ატარებდა. ოპერაცია 27 მაისს ჩატარდა და გადანერგილმა თვალმა მას შემდეგ აჩვენა "ჯანმრთელობის შესანიშნავი ნიშნები", მაგრამ ჯერჯერობით უცნობია აღუდგება თუ არა ჯეიმსს ამ თვალში მხედველობა.