როგორ მოვერიოთ ჭარბოფლიანობას - მკურნალი.გე

ლალი ჩხიკვაძე

ზოგიერთ ადამიანს უმიზეზოდ შეიძლება ჰქონდეს ჭარბი ოფლიანობა. ეს არის პირველადი ჰიპერჰიდროზი და გვხვდება შემთხვევების 30-50%-ში. როგორც წესი, ეს არის მემკვიდრეობითი და, გარდა ფსიქოლოგიური დისკომფორტისა, თითქმის არ მოქმედებს ჯანმრთელობაზე.

სიმპტომები:

• სხეულის ცალკეული ნაწილები ოფლიანდება: თავი, იღლიები, მკლავები, ფეხები, იშვიათად - გულმკერდის ან საზარდულის არე.

• ჭარბი ოფლიანობის შეტევები ხდება კვირაში ერთხელ მაინც და თითქმის არასდროს აღინიშნება ღამით.

• პრობლემა ბავშვობაში ან მოზარდობაში დაიწყო.

მიმართეთ დერმატოლოგს, თუ:

• პრობლემას თავად ვერ უმკლავდებით.

• ხელს უშლის ყოველდღიურ საქმიანობას, გრძნობთ შფოთვას და მუდმივად ნერვიულობთ.

• გამონაყარი ჩნდება ოფლიან ადგილებში.

როდისაა საყურადღება ჭარბი ოფლიანობა

ზოგჯერ დაავადება იწვევს ჭარბ ოფლიანობას.

ეს არის მეორეული ჰიპერჰიდროზი და მიუთითებს შემდეგ დაავადებებზე:

• დიაბეტი;

• გულისა და ფილტვის დაავადებები;

• გენერალიზებული შფოთვითი აშლილობა;

• ინფექციები (შიდსი, ტუბერკულოზი და სხვა);

• ჰიპერთირეოზი;

• ლეიკემია და სხვა სიმსივნეები;

• სიმსუქნე;

• ხერხემლის დაზიანება.

ზოგიერთი წამალი იწვევს მეორეულ ჰიპერჰიდროზს: ბეტა-ბლოკატორები (მაღალი წნევის დროს), პილოკარპინი (გლაუკომისთვის) ან ანტიდეპრესანტები; ასევე მოწევა და ცხარე საკვები. 45 წელზე უფროსი ასაკის ქალებში მიზეზი შეიძლება იყოს მენოპაუზა.

მეორეული ჰიპერჰიდროზის დროს სხეულის თითქმის მთელი ზედაპირი ოფლიანდება. იშვიათად, ცალკეული ადგილები.

ხშირად ღამით ადამიანები ოფლით სველი იღვიძებენ. თუ თქვენ გაქვთ მსგავსი სიმპტომები, დაუყოვნებლივ მიმართეთ ექიმს.

როგორ განვთავისუფლდეთ ზედმეტი ოფლიანობისგან

მსუბუქი პირველადი ჰიპერჰიდროზისთვის ეს მარტივი რჩევები დაგეხმარებათ:

• ეცადეთ, არ გამოიყენოთ საპონი, რომელიც აშორებს კანის ცხიმოვან შრეს.

• გამოიყენეთ ანტიპერსპირანტები და არა დეზოდორანტები. პირველი ბლოკავს საოფლე ჯირკვლებს, მეორენი კი მხოლოდ სუნს ნიღბავს.

ატარეთ ნატურალური ბოჭკოებისგან დამზადებული თავისუფალი ტანსაცმელი, როგორიცაა ბამბა, სელი, მატყლი ან აბრეშუმი და მოერიდეთ სინთეტიკას. შავი ან თეთრი ტანსაცმელი საუკეთესოდ ნიღბავს ოფლიანობის ნიშნებს.

• გამოიყენეთ სპეციალური შთამნთქმელი საფენები.

• თუ ფეხები გაოფლიანებულია, ჩაიცვით ტყავის ფეხსაცმელი და გამოიცვალეთ ისინი ყოველდღე.

• ატარეთ ბუნებრივი ბოჭკოებისგან დამზადებული წინდები და რეგულარულად გამოიცვალეთ ისინი.

• მოერიდეთ ცხარე საკვებს, კოფეინს, ალკოჰოლს და ნიკოტინს – ისინი აძლიერებენ ოფლიანობას.

თუ ეს რჩევები არ დაგვეხმარებათ, მიმართეთ დერმატოლოგს, რომელიც შეარჩევს უფრო რადიკალურ მეთოდს:

• იონოფორეზი: განსაკუთრებით ეფექტურია ხელების, ფეხების და იღლიების ჰიპერჰიდროზის სამკურნალოდ. ეფექტურია 70-80% შემთხვევაში.

• ბოტოქსის ინექციები. ბოტულინის ტოქსინი ბლოკავს ნერვებს, რომლებიც ასტიმულირებენ ოფლის ჯირკვლებს. შედეგი ვლინდება რამდენიმე პროცედურის შემდეგ, შედეგი ნარჩუნდება 3-6 თვე.

• ანტიქოლინერგული პრეპარატები. ისინი ბოტოქსის მსგავსად ბლოკავს ნერვული იმპულსების გადაცემას. პრობლემა ის არის, რომ ეს პრეპარატები სხვა უჯრედებსაც აზიანებენ და გარდა იმისა, რომ ამცირებენ ოფლიანობას, იწვევს პირის სიმშრალეს, ყაბზობას და შარდვის გაძნელებას.

• ქირურგიული ოპერაციები. ისინი გამოიყენება, თუ ყველა სხვა მეთოდი არაეფექტურია.