მეცნიერები ნაწლავის ჯანმრთელი მიკრობიოტის ნიმუშების შენახვას გვთავაზობენ
ამის შესახებ ჰარვარდის უნივერიტეტის სპეციალისტები წერენ ჟურნალში Trends in Molecular Medicine დაბეჭდილ სტატიაში.
მეცნიერები წერენ, რომ პლანეტის, განსაკუთრებით განვითარებული მრეწველობის ქვეყნების, მოსახლეობის ცხოვრების და კვების წესის ცვლილებამ გამოიწვია ნაწლავის მიკრობიოტის კოლოსალური მოდიფიკაცია. მიკრობიოტის განსაკუთრებით ძლიერი ცვლილებები შესამჩნევი გახდა უკანასკნელი ათწლეულის განმავლობაში, რასაც უკავშირდება ასთმით, ალერგიებით, საჭმლის მომნელებელი სისტემის დაავადებებით, ტიპი 2 შაქრიანი დიაბეტით და ა.შ. ავადობის ზრდა.
სტატიის ავტორები ამასთან ბრძოლის გზას ხედავენ ნაწლავის მიკრობიოტის ინდივიდუალური ბანკების შექმნაში, როდესაც ახალგაზრდა და ჯანმრთელი ადამიანები ჩააბარებენ თავიანთი ფეკალიების ნიმუშებს, რომელიც კრიოკონსერვაციას გაივლის და შეიძლება გამოყენებული იქნას მომავალში აუცილებლობის შემთხვევაში აუტოლოგიური ფეკალური ტრანსპლანტანტების სახით.
განავლის ტრანსპლანტაციის მეთოდმა უკვე დაამტკიცა ეფექტურობა ზოგიერთი დაავადების, ძირითად Clostridium difficile ბაქტერიით გამოწვეული ინფექციების მკურნალობისას. ასეთი ინფექციები რთულად ემორჩილება ანტიბიოტიკებით სტანდარტულ მკურნალობას. ხოლო ჯანმრთელი დონორის ფეკალიებში არსებული მიკროორგანიზმების ერთობლიობა მარტივად თრგუნავს პათოგენურ ბაქტერიებს.
მეთოდის ნაკლი იმაში მდგომარეობს, რომ სწორ ნაწლავში შეჰყავთ დონორის განავლის ნიმუში, რამაც გენტიკური და სხვა განსხვავებების გამო, შეიძლება გამოიწვიოს ორგანიზმის არასასურველი რეაქცია. საკუთარი განავლის გადანერგვისას ამგვარი რეაქციების რისკი არ არის.
სტატიის ავტორები ვარაუდობენ, რომ მომავალში ნაწლავის მიკრობიოტის გაახალგაზრდავების მეთოდი შეიძლება გამოყენებული იქნას ისეთი აუტოიმუნური დაავადებების მკურნალობისას, როგორიცაა: ასთმა, გაფანტული სკლეროზი, ნაწლავის ანთებითი დაავადებები, დიაბეტი, სიმსუქნე, გულ-სისხლძარღვთა სისტემის დაავადებები და დაბერება.