მამაკაცის პიროვნების გასაღები
მამაკაცის ყოველ ქმედებას, განსაკუთრებით იმათ, რომელთაც გაუაზრებლად სჩადის და არა ქალზე შთაბეჭდილების მოსახდენად, შეუძლია ბევრი რამ გვითხრას მის პიროვნებაზე. სპორტის საყვარელი სახეობა, მარტოხელა სპორტსმენი, მაგალითად, სირბილის ან ცურვის მოყვარული, ტკბება საკუთარი დამოუკიდებლობით და ურჩევნია, მარტომ გაატაროს დრო, ხოლო ის მამაკაცები, რომლებიც სპორტის გუნდურ სახეობებს - ფეხბურთს, კალათბურთს ამჯობინებენ, მიდრეკილნი არიან პაექრობისკენ როგორც მინდორში, ასევე ცხოვრების სხვა სფეროებშიც. მამაკაცები, რომლებსაც საერთოდ არ იტაცებთ სპორტი, დამოუკიდებლად მოაზროვნენი და ძალზე მგრძნობიარენი არიან.
მეგობრობა
მამაკაცზე, რომელსაც გარს ჯერ კიდევ ბავშვობის მეგობრები ახვევია, თამამად შეიძლება ითქვას, რომ ერთგული და თავდადებულია. ძნელი წარმოსადგენია, ის მკვეთრად შეიცვალოს. მასთან ურთიერთობისას იყავით მომთმენი, რადგან მისი ნდობის მოსაპოვებლად გარკვეული ხანი დაგჭირდებათ. ნუ შეგეშინდებათ, გააცნოთ ნათესავებს, მაგალითად, მიიწვიოთ ბიძაშვილის ქორწილში - ის ადვილად გამონახავს საერთო ენას უცნობ ადამიანებთან და სწრაფად შეეწყობა უცნობ სიტუაციას.
საკრედიტო ბარათი თუ ნაღდი ფული?
მამაკაცი, რომელიც თავისი საკრედიტო ბარათის ბრჭყვიალით ტკბება, მაღალი სოციალური სტატუსის მოპოვების დაუძლეველი სურვილით არის შეპყრობილი, პატივმოყვარე და თავდაჯერებულია. ასეთი ადამიანი მიზანს მიაღწევს. თუ კაცი ნაღდი ფულით იხდის, ეს მისი დამოუკიდებლობის მანიშნებელია. თუ საფულე ცარიელი აქვს? - მაშინ თქვენს წინაშეა მამაკაცი, რომელიც სხვაზეა დამოკიდებული და ელის, როდის იზრუნებენ მასზე.
მისი ურთიერთობის სტილი
თუ კაცს ურჩევნია, საყვარელ ქალს ელექტრონული წერილი მისწეროს, თქვენს წინაშე ნამდვილი კერკეტი კაკალია. ასეთი მამაკაცი ურთიერთობის ისეთ გზას ამჯობინებს, რომელიც მას საშულებას აძლევს, წინასწარ მოამზადოს სათქმელი, ეს კი იმაზე მეტყველებს, რომ მას არ სურს საკუთარი თავის ბოლომდე წარმოჩენა. მესინჯერით საუბრის მოყვარულს მუდმივი ყურადღება სურს. ის ყოველ წუთს დარწმუნებული უნდა იყოს, რომ მის გვერდით ხართ. ტელეფონის ფანატი შესაძლოა რამდენადმე ძველმოდური მოგეჩვენოთ, მაგრამ უნდა ითქვას, რომ ამ ტიპის მამაკაცები ახლო ურთიერთობებს არ გაურბიან.
როგორი ჩაცმულობა მოსწონს
თუ კაცს თქვენი გაცვეთილი მაისური და ჯინსი უფრო მოსწონს, ვიდრე ტყავის მინიქვედაკაბა, თქვენს წინაშეა პიროვნება, რომელსაც ხელმოკლე გოგონების საწინააღმდეგო არაფერი აქვს. მამაკაცი, რომელსაც ცნობილი დიზაინერების სამოსში გამოპრანჭული ქალი აღაფრთოვანებს, დიდ მნიშვნელობას ანიჭებს პრესტიჟს. მამაკაცი, რომელსაც სურს, გვერდით სუპერსექსუალური ქალი ჰყავდეს, ამგვარად ცდილობს თვითშეფასების ამაღლებას. მისთვის მნიშვნელოვანია, მისით აღფრთოვანდნენ და შურდეთ.
როგორ იქცევა წვეულებაზე
თუ მეგობრებთან ერთად მოლხენა არ შეუძლია, ალბათ მორიდებული, მოკრძალებული პიროვნებაა. ასეთი მამაკაცისგან რომანტიკულ საქციელს ნუ ელით. მას დრო სჭირდება, რომ გაიხსნას. თუ მამაკაცი წვეულების სული და გულია, იცოდეთ, რომ ის საკუთარ იმიჯზეა ორიენტირებული და შესაძლოა, თქვენთან ერთად განმარტოებას ხალხმრავალ ადგილას მოლხენა ამჯობინოს.
როგორ მართავს მანქანას
თუ გიჟივით დაქრის მანქანებს შორის, ასწრებს სხვა მძღოლებს და იგინება, ესე იგი აგრესიულია. მასთან ურთიერთობა რთული იქნება. თუ მამაკაცი საცობშიც კი ინარჩუნებს სიმშვიდეს, ესე იგი წარმატებით ახერხებს საკუთარი ემოციების კონტროლს.
რას მიირთმევს რესტორანში
ხორცისა და კარტოფილის მოყვარულები ერთგულებით გამოირჩევიან, მაგრამ აკლიათ სილაღე. თუ თქვენს რჩეულს ეგზოტიკური კერძები უყვარს, ესე იგი, თავგადასავლების მოყვარულია და ერთფეროვნება ადვილად ღლის.
ფაქიზი თუ ფეთხუმი
თუ მამაკაცი ოდნავ დაუდევარია, შეიძლება ითქვას, რომ ის ფართო თვალსაწიერის პატრონია, მაგრამ თუ მის აბაზანას ჭუჭყის სქელი ფენა ადევს, ის ან ძალიან ახალგაზრდაა, ან უბრალოდ ზარმაცი.
როგორ საუბრობს
თუ ხალისიანად ლაქლაქებს, ესე იგი არაორდინარული, ენერგიული პიროვნებაა. თუ ნელა და დინჯად ლაპარაკობს, ალბათ მისი კრედოა "ასჯერ გაზომე, ერთხელ გაჭერი". მისგან სიურპრიზებს არ უნდა ელოდეთ, მაგრამ დარწმუნებული ბრძანდებოდეთ - რასაც ფიქრობს, იმავეს ამბობს. აი, სულ ეს არის. დანარჩენი კი თქვენს უნარსა და მოხერხებულობაზეა დამოკიდებული.