News
მაკრატლის, სახრახნისის, საკერავი ნემსის, დანის - გამოყენება შეიძლება. ასეთი აღმოჩნდა იმ გამოკითხვის შედეგი, რომელიც სტომატოლოგიურმა ორგანიზაციამ British Dental Health Foundation-მა ჩაატარა. გამოკითხვამ აჩვენა, რომ რესპონდენტების 23% ამჯობინებს, კბილებს შორის გაჩხერილ საკვებს საერთოდ არ ახლოს ხელი, რითაც ზრდის ღრძილების ანთებისა და პირის ღრუში უსიამოვნო სუნის გაჩენის ალბათობას. იმ საგნებს შორის, რომლებსაც გამოკითხულები პირის ღრუს გასაწმენდად იყენებენ, აღმოჩნდა სარჭი, ქანჩი, ფრჩხილების ქლიბი, საყურე, ფანქარი, ჩანგალი და მაგნიტური ბარათები. გამოკითხვის შედეგების კომენტირებისას სტომატოლოგებმა საგანგებოდ აღნიშნეს, რომ კბილების გასაწმენდად მხოლოდ სპეციალური ძაფი უნდა იქნეს გამოყენებული, ხოლო კბილების გაწმენდა უნდა მოხდეს განსაკუთრებული სიფრთხილით, რათა ღრძილები არ დაზიანდეს.
დიაგნოსტიკა ამონასუნთქის სუნით
გლაზგოს უნივერსიტეტში ვეტერინარებს სადიაგნოზო კვლევის უჩვეულო მეთოდს - ამონასუნთქი ჰაერის ანალიზს სთავაზობენ. საქმე ის არის, რომ ამონასუნთქი შეიცავს ათასობით ქიმიურ ნივთიერებას, რომელთა მეშვეობითაც შესაძლებელია, ცხოველს ესა თუ ის დაავადება დავუდგინოთ. დღესდღეობით ცხოველებს სადიაგნოზოდ უტარებენ სისხლისა და სხვა ქსოვილების ანალიზებს, რაც ვეტერინარიული კლინიკების პაციენტებს ძლიერ სტრესს აყენებს. თანამედროვე მოწყობილობები - მასსპექტრომეტრები, აირული ქრომატოგრაფები და სხვა - სწრაფად განსაზღვრავს ამონასუნთქი ჰაერის შემადგენლობას, რის საფუძველზეც ექიმს დიაგნოზის დასმა შეუძლია. საცდელი გამოკვლევის დროს მკვლევარებმა ძაღლებს კუჭის დაავადება დაუდგინეს, ხოლო ცხენებს - ბრონქების დაავადება, რომელიც ძალიან ჰგავდა ადამიანის ასთმას.
აქვს თუ არა კიბოს სუნი?
ამერიკელმა მეცნიერებმა კანის სიმსივნის ყველაზე გავრცელებული ფორმის - ბაზალურუჯრედოვანი კარცინომის - სუნი განსაზღვრეს და საზოგადოებას ამცნეს, რომ ამ აღმოჩენის წყალობით "ელექტრული ცხვირი" მომავალში იოლად ამოიცნობს კანის ავთვისებიანი სიმსივნის სხვადასხვა სახესხვაობას.
კანი გამოიმუშავებს აიროვან ორგანულ ნივთიერებებს, რომელთა უმრავლესობას სპეციფიკური სუნი აქვს. ფილადელფიის ქიმიური კვლევის ცენტრის მეცნიერებმა გამოთქვეს მოსაზრება, რომ სიმსივნის სუნი ჯანსაღი კანის სუნისგან განსხვავდება და ამ თეორიის დასასაბუთებლად კვლევები ჩაატარეს. მათ აიღეს ჰაერის ნიმუშები ბაზალურუჯრედოვანი კარცინომის კანიდან და ჯანმრთელი ადამიანების კანის იმავე უბნიდან, მერე კი აირული ქრომატოგრაფიის საშუალებით შეისწავლეს ნიმუშების ქიმიური შემადგენლობა. მეცნიერებს განზრახული აქვთ, განაგრძონ ჰაერის ნიმუშების კვლევა კანის კიბოს სხვადასხვა ტიპისა და სახეობის, მათ შორის - მელანომის შესასწავლად და შექმნან დანადგარი, რომელიც სუნს "ამოიცნობს" და ექიმს კანის კიბოს ადრეულ დიაგნოსტიკაში დაეხმარება. სპეციალისტების აზრით, ახალი მეთოდიკა საინტერესო და პერსპექტიულია, მაგრამ შესაძლოა, მკვლევარები რამდენიმე სირთულეს შეეჯახონ. უწინარეს ყოვლისა, იმიტომ, რომ კანის სხვადასხვა უბანს სხვადასხვა სუნი აქვს. განსაზღვრული როლი შეიძლება შეასრულოს ადამიანის ასაკმაც.
ჯაგრისი თუ ჩხირები?
კბილის საწმენდი ხის ჩხირები, რომლებსაც აფრიკის მრავალი ტომი იყენებს, ფუნქციით ბევრად არ ჩამოუვარდება კბილის ჯაგრისს. აბორიგენებს, რომლებიც ჰიგიენის ტრადიციულ მეთოდებს მიმართავენ, გაცილებით იშვიათად აწუხებთ სტომატოლოგიური დაავადებები. მეცნიერები აკვირდებოდნენ ნამიბიის ორი ათას მკვიდრს, რომელთა ნახევარი რეგულარულად იყენებდა ხის ადგილობრივი ჯიშებისგან დამზადებულ კბილის საწმენდ ჩხირებს. აღმოჩნდა, რომ ამ უკანასკნელთ გაცილებით იშვიათად ჰქონდათ პირის ღრუში უსიამოვნო სუნი, კარიესი და ღრძილების დაავადება. მკვლევარებს მიაჩნიათ, რომ ეფექტი იმ ანტიბაქტერიული და სოკოს საწინააღმდეგო ნივთიერებების დამსახურებაა, რომლებსაც ხეები შეიცავს.