ახდენს თუ არა ქოლესტერინის დონე ინფექციის პროვოცირებას

კოპენჰაგენის უნივერსიტეტის მეცნიერთა განცხადებით, ე.წ. კარგი ქოლესტერინის დონეზე დამოკიდებულია იმუნური სისტემის ფუნქციობა. კვლევის ფარგლებში მათ შეისწავლეს 100 000 ადამიანის ჯანმრთელობის მდგომარეობა.

საკვლევი პირების 21 %-ს "კარგი" ქოლესტერინის დონე ნორმაზე დაბალი ჰქონდა, 8%-ს კი პირიქით _ მომატებული. აღმოჩნდა, რომ ორივე კატეგორიის წარმომადგენლები გაცილებით ხშირად ავადობდნენ ინფექციური დაავადებებით (კერძოდ პნევმონიით და გასტროენტერიტით), ვიდრე ის პირები, რომლებსაც მაღალი სიმკვრივის ლიპოპროტეინები ნორმის ფარგლებში ჰქონდათ. ყველაზე მაღალი რისკი აღენიშნებოდათ მაღალი სიმკვრივის ლიპოპროტეინების დაბალი შემცველობით გამორჩეულ პირებს.

როგორც მეცნიერები აცხადებენ, ჯერ ნაადრევია ამ ორ ფაქტს შორის არსებულ პირდაპირ კავშირზე საუბარი, დამატებითი კვლევები ნათელს მოჰფენს ყოველივეს, თუმცა, სტატისტიკა მეტად საინტერესო დასკვნების გაკეთების საფუძველს იძლევა.

თინათინ გოცაძე