როგორ მოვაწონოთ თავი სასურველ ქალს
- მუქ კოსტიუმს შავი ან მუქი ყავისფერი ფეხსაცმელი ეხამება, ხოლო ბაცი ფერისას - ნებისმიერი.
- ფეხსაცმელი სუფთა და კრიალა უნდა იყოს, რადგან მას განსაკუთრებულ ყურადღებას აქცევს პრაქტიკულად ყველა ქალი.
- პერანგი უნდა შეირჩეს კოსტიუმის ფერისა და ტონის შესაბამისად და არა "ჩემი საყვარელი პერანგიას" პრინციპით. სრულიად თეთრი პერანგი მხოლოდ შავ კოსტიუმს მოუხდება, რუხი - მორუხო-მოცისფროსა და ლურჯს, ჩალისფერი, კრემისფერი, მონაცრისფრო-მოვარდისფრო - ყავისფერ, ჩალისფერ, ტერაკოტისფერ კოსტიუმებს.
- შარვალი ფეხსაცმლის ქუსლს ზუსტად შუამდე უნდა სწვდებოდეს. ზომაზე გრძელ შარვალში მამაკაცი ჩანჩურას ჰგავს, მოკლეში კი ოდნავ სასაცილოდ გამოიყურება.
- ჰალსტუხი იმსიგრძე უნდა იყოს, რომ შარვლის საქამრეს სწვდებოდეს. თავისუფალ, ბუნებრივ გარემოში ჰალსტუხის კვანძის ოდნავ მოშვება ნებადართულია.
- ჰალსტუხის ფერი კი არ უნდა ყვიროდეს, არამედ ტუალეტის საერთო ანსამბლში უნდა ჩაეწეროს.
- თუ ჰალსტუხი არ გიკეთიათ, პერანგის ყველა ღილის შეკვრა არ არის აუცილებელი. თუ ერთ-ორ ზედა ღილს შეხსნილს დატოვებთ, უფრო ბუნებრივი და ლაღი გამოჩნდებით.
მაგრამ ყველაზე მოწესრიგებული და ელეგანტური ჩაცმულობაც კი ვერ შეცვლის დახვეწილი მანერების ხიბლს. გსურთ, მანდილოსანზე კარგი შთაბეჭდილება მოახდინოთ? მაშინ გაიღიმეთ! ქალისთვის არაფერია უფრო საინტერესო, ვიდრე მამაკაცი, რომელიც კარგად გამოიყურება და თავაზიანად, გულღიად იღიმება. თავშეუკავებელი ხარხარი, ისევე როგორც ქირქილი და ფხუკუნი, ქალს დააეჭვებს და გააღიზიანებს. ქალს დაჟინებით ნუ მიაშტერდებით, მაგრამ როდესაც შეხედავთ, გამოხედვაში მთელი თქვენი სიმპათია ჩააქსოვეთ. არსებობს პატარ-პატარა ხრიკებიც. მაგალითად, ვითომ შემთხვევით, მსუბუქად დაეჯახეთ. თუ იგრძნობთ, რომ თქვენს შორის ნაპერწკალმა გაიარა, ეს იმას ნიშნავს, რომ პირველი ნაბიჯის გადადგმის დროა. მიდით უფრო ახლოს, თუ მაგიდასთან სხედხართ, თქვენი სკამი მისას მიუახლოვეთ. თუ ამას შეძლებთ, ჩათვალეთ, რომ მასზე გარკვეული შთაბეჭდილება უკვე მოახდინეთ. მეტად მნიშვნელოვანია პირველი შეხება. უმჯობესია, შეხება შემთხვევითი იყოს. ამავე დროს, დაიცავით ზღვარი, ნუ იქნებით მეტისმეტად გახსნილი და თამამი, თორემ ქალი ინსტინქტურად უკან დაიხევს და კვლავ საწყის პოზიციებზე აღმოჩნდებით. ეცადეთ, იყოთ თავდაჯერებული და ცოტა მორიდებულიც. ეს ერთგვარ იდუმალებას შეგძენთ და თქვენდამი ინტერესს გაზრდის. თუ ეს ხრიკები ხელოვნური, რთული და უსარგებლო გეჩვენებათ, მაშინ დარჩით ისეთად, როგორიც ხართ. თუ ქალი ასეთს მიგიღებთ, იღბალს ჰყვარებიხართ, და თუ არა, გულს ნუ გაიტეხთ, ბედი დიდხანს არ გალოდინებთ და შეგახვედრებთ იმას, ვინც თქვენი ღირსი და შესაფერისია.