ურეთრიტი სქესობრივი გზით გადამდები დაავადებების დროს - მკურნალი.გე

ენციკლოპედიაგამომთვლელებიფიტნესიმერკის ცნობარიმთავარიკლინიკებიექიმებიჟურნალი მკურნალისიახლეებიქალიმამაკაციპედიატრიასტომატოლოგიაფიტოთერაპიაალერგოლოგიადიეტოლოგიანარკოლოგიაკანი, კუნთები, ძვლებიქირურგიაფსიქონევროლოგიაონკოლოგიაკოსმეტოლოგიადაავადებები, მკურნალობაპროფილაქტიკაექიმები ხუმრობენსხვადასხვაორსულობარჩევებიგინეკოლოგიაუროლოგიაანდროლოგიარჩევებიბავშვის კვებაფიზიკური განვითარებაბავშვთა ინფექციებიბავშვის აღზრდამკურნალობასამკურნალო წერილებიხალხური საშუალებებისამკურნალო მცენარეებიდერმატოლოგიარევმატოლოგიაორთოპედიატრავმატოლოგიაზოგადი ქირურგიაესთეტიკური ქირურგიაფსიქოლოგიანევროლოგიაფსიქიატრიაყელი, ყური, ცხვირითვალიკარდიოლოგიაკარდიოქირურგიაანგიოლოგიაჰემატოლოგიანეფროლოგიასექსოლოგიაპულმონოლოგიაფტიზიატრიაჰეპატოლოგიაგასტროენტეროლოგიაპროქტოლოგიაინფექციურინივთიერებათა ცვლაფიტნესი და სპორტიმასაჟიკურორტოლოგიასხეულის ჰიგიენაფარმაკოლოგიამედიცინის ისტორიაგენეტიკავეტერინარიამცენარეთა მოვლადიასახლისის კუთხემედიცინა და რელიგიარჩევებიეკოლოგიასოციალურიპარაზიტოლოგიაპლასტიკური ქირურგიარჩევები მშობლებსსინდრომიენდოკრინოლოგიასამედიცინო ტესტიტოქსიკოლოგიამკურნალობის მეთოდებიბავშვის ფსიქოლოგიაანესთეზიოლოგიაპირველი დახმარებადიაგნოსტიკაბალნეოლოგიააღდგენითი თერაპიასამედიცინო ენციკლოპედიასანდო რჩევები

ურეთრიტი სქესობრივი გზით გადამდები დაავადებების დროს

ინფექციური ურეთრიტი ყოველთვის სდევს თან სქესობრივი გზით გადამდებ ინფექციებს. განასხვავებენ მის ორ ფორმას: მწვავეს და ქრონიკულს. მწვავე ურეთრიტი დასნებოვნებიდან რამდენიმე დღის შემდეგ ვითარდება. ქრონიკული კი ნებაზე მიშვებული ან არასათანადოდ ნამკურნალები მწვავე ანთების შედეგია. სქესობრივი გზით გადამდები დაავადებების დროს განვითარებული ურეთრიტის ნიშნებია:

  • გამონადენი სასქესო ასოდან (ურეთრიდან), რომელიც სქელი კონსისტენციის, მღვრიე და ხშირად სხვადასხვა ფერისაა (რუხი, მომწვანო და სხვა);
  • შარდვისას ქავილი, წვა და მჭრელი ტკივილი.

კიდევ ერთი საინტერესო ფაქტი: არცთუ იშვიათად სქესობრივი გზით გადამდები დაავადებების სიმპტომები, გამონადენი და შარდის გამოყოფის დარღვევა, მწვავე სტადიის გავლის შემდეგ ქრება და ავადმყოფს ჰგონია, რომ განიკურნა. სინამდვილეში ინფექცია არსად გამქრალა, უბრალოდ, "მიიმალა", ქრონიკულ ფორმაში გადავიდა. ქრონიკული ვენერული დაავადება, მიუხედავად იმისა, რომ ზოგჯერ საერთოდ არ აწუხებს ადამიანს, განუწყვეტლივ აყენებს ორგანიზმს გამოუსწორებელ ზიანს. ამასთან, თუ მწვავე ურეთრიტის დროს სათანადო მკურნალობა არ ჩატარდა, მომავალში შეიძლება განვითარდეს ისეთი დაავადებები, როგორებიცაა პროსტატიტი, ეპიდიდიმიტი, საშვილოსნოს ყელის ეროზია ან სიმსივნე, პიელონეფრიტი და სხვა. ამიტომ ურეთრიტის პირველი ნიშნებისთანავე ჯობს კონსულტაციისთვის მიმართოთ ექიმს.

გამონადენი სასქესო ასოდან

სასქესო ასოდან გამონადენი შესაძლოა გაჩნდეს გონორეის, ტრიქომონიაზის, ურეაპლაზმოზის, მიკოპლაზმოზის, ქლამიდიოზისა და არასპეციფიკური ურეთრიტის დროს. მაგრამ ვიდრე უშუალოდ ამ დაავადებებზე გესაუბრებოდეთ, იმ ფიზიოლოგიურ მდგომარეობათა შესახებ გიამბობთ, რომელთა დროსაც სპეციფიკური გამონადენის არსებობა პათოლოგიად არ მიიჩნევა.

  • ერეგირებისას სასქესო ასოს თავზე არსებული ხვრელიდან ხშირად (თითქმის ყოველთვის) გამოიყოფა სპეციფიკური სეკრეტორული სითხე. იგი სრულიადაც არ ჰგავს იმას, რომელიც ეაკულაციის დროს გადმოინთხევა - ეს სითხე გამჭვირვალე წვეთის სახით გამოიყოფა და მას ასოს თავის საცხის ფუნქცია აკისრია. გარდა ამისა, იგი ურეთრის მჟავიანობას აქვეითებს იმისათვის, რომ მამაკაცის ეაკულატმა ქალის დაორსულება გამოიწვიოს. მამაკაცებს დროდადრო შარდის წვეთი ამ სეკრეტორულ სითხეში ერევათ. მათი გარჩევა ძალიან ადვილია: შარდი წყალივითაა, ხოლო სეკრეტორული სითხე წებოვანია, იწელება კიდეც.
  • მეორე ფიზიოლოგიური მდგომარეობაა პოლუცია. პოლუცია სათესლე სითხის უნებლიე დაღვრას ჰქვია. ასეთი რამ, ჩვეულებრივ, ძილში ხდება ეროტიკული სიზმრების ფონზე და ძილს არ გვაწყვეტინებს. პოლუცია ხშირია მოზარდებსა და ყმაწვილებში და სქესობრივ მომწიფებაზე მეტყველებს. რეგულარული სქესობრივი ცხოვრების დაწყებისთანავე პოლუცია წყდება. არსებობს დღის პოლუციაც. პოლუცია ნორმიდან გადახრა კი არა, სქესობრივი ჯირკვლების ნორმალური ჰორმონული აქტივობის მაჩვენებელია, მაგრამ როცა იგი ხშირად ხდება (ყოველდღე ან დღეში რამდენჯერმეც კი სქესობრივი ცხოვრების ჩვეული რიტმის ფონზე), ეს უკვე სქესობრივი სფეროს დარღვევაზე მიუთითებს და ამ დროს ექიმთან ვიზიტი აუცილებელია. ყველა დანარჩენი სითხე, რომელიც მამაკაცის სასქესო ასოდან გადმოედინება, განსაკუთრებით - მომწვანო, მორუხო (ან რუხი), მოყვითალო ფერისა ან ხაჭოსმაგვარი კონსისტენციისა, აუცილებლად უნდა გამოიკვლიოს ექიმმა სპეციალისტმა.
  • ურეთრიტი (შარდსადენის ლორწოვანი გარსის ანთება). მამაკაცებში ურეთრიტის დამახასიათებელ სიმპტომად შარდსასქესო არხიდან გამონადენი მიიჩნევა. მაგრამ გამონადენი შეიძლება ფიზიოლოგიურიც იყოს, ხოლო ურეთრიტი გამონადენის გარეშე მიმდინარეობდეს, ამიტომ დიდი მნიშვნელობა აქვს გამონადენის შემჩნევისთანავე ექიმთან მისვლას. ურეთრიტს, გარდა გამონადენისა, წესისამებრ, თანსდევს დიზურია (შარდის გამოსვლის გაძნელება) და სასქესო ასოს თავის გაღიზიანება. ურეთრიტის დიაგნოსტირება ურეთრის ნაცხის ან შარდის პირველი ულუფის გამოკვლევით ხდება. ურეთრიტებს ხშირად იწვევს გონოკოკები, ქლამიდიური ინფექცია და სხვა.

გონორეა

გონორეა ქალებსა და მამაკაცებში სხვადასხვანაირად მიმდინარეობს. საერთო ის აქვს, რომ დაავადების ძირითადი გამოვლინება დაკავშირებულია სასქესო ორგანოებიდან არსებულ გამონადენსა და მჭრელ ტკივილთან შარდვის დროს. ეს სწორედ ურეთრიტის - შარდსადენი არხის ანთების მანიშნებელია, რომელიც ინფექციის (ამ შემთხვევაში - გონორეის) გამომწვევით არის განპირობებული. მამაკაცებში გონორეის სიმპტომად ითვლება ასოდან თეთრი ან ყვითელი გამონადენი, მაგრამ თუ გამონადენი არ გაჩნდა, ეს იმას არ ნიშნავს, რომ ადამიანი ავად არ არის. გამონადენი, როგორც წესი, საინკუბაციო პერიოდის (2-დან 5 დღემდე) გავლის შემდეგ ჩნდება, თუმცა გასათვალისწინებელია ისიც, რომ ზოგჯერ საინკუბაციო პერიოდი უფრო მეტხანს მიმდინარეობს (ერთი თვე და მეტი). საყურადღებოა კიდევ ერთი რამ: ბევრი მიმართავს ე. წ. პროვოკაციის ტესტს - შემთხვევითი სქესობრივი აქტის შემდეგ ძილის წინ ორიოდე კათხა ლუდს ან მწარე ან მჟავე საკვებს მიირთმევს და მეორე დილით ამოწმებს, არის თუ არა, ან რა ფერისაა გამონადენი. მსგავსი "ტესტირება" არ შეიძლება ჩაითვალოს გონორეის არსებობის ან არარსებობის ჭეშმარიტ დადასტურებად. ბოლო დროს აღნიშნავენ ისეთი შემთხვევების გახშირებას, როდესაც გონორეა უსიმპტომოდ მიმდინარეობს, დანარჩენ შემთხვევებში კი საინკუბაციო პერიოდის გავლის შემდეგ თავს იჩენს გონორეის მწვავე ფორმისთვის დამახასიათებელი ნიშნები. დაავადების მიმდინარეობა და სიმპტომების გამოვლინება პირველ რიგში იმაზეა დამოკიდებული, რომელ ორგანოს შეუტევს გონოკოკი. ყველაზე ხშირად ურეთრა ზიანდება და გონორეული ურეთრიტი ვითარდება. სხვათა შორის, მისთვისაც დამახასიათებელია გამონადენი, რომელიც ქვედა საცვალზე მოყვითალო-მომწვანო ლაქებს ტოვებს. გონორეაზე კიდევ დიდხანს შეიძლება ვისაუბროთ, მაგრამ ამჯერად მხოლოდ ერთ რამეს გეტყვით: ეს საკმაოდ სერიოზული ინფექცია უყურადღებობის შემთხვევაში უშვილობას, იმპოტენციას და სხვა გართულებებს იწვევს, არადა, თანამედროვე მედიცინა ძალიან ადვილად უმკლავდება მის გამომწვევს. მთავარია, მკურნალობა რაც შეიძლება ადრიანად დაიწყოს, თვითმკურნალობამ კი შესაძლოა საქმე გაართულოს.


ტრიქომონიაზი

ტრიქომონა ერთუჯრედიანი არსებაა, რომელსაც უნარი შესწევს, იცოცხლოს არა მარტო ორგანიზმში, არამედ მის გარეთაც. იმ ზიანის გარდა, რომლის გამოწვევაც ტრიქომონას შეუძლია, მას აქვს გონოკოკების შთანთქმის უნარიც, ოღონდ ისე, რომ ზიანს არ აყენებს. ერთი ადამიანიდან მეორეზე გავრცელებისას ტრიქომონას თან გადააქვს "გადაყლაპული" გონოკოკებიც და არასრულყოფილი მკურნალობის (მაგალითად, თვითმკურნალობის) შემთხვევაში ტრიქომონიაზის განკურნების შემდეგ გონორეული ინფექცია ვითარდება. მამაკაცის ორგანიზმში ტრიქომონიაზი ხშირად უსიმპტომოდ მიმდინარეობს. მამაკაცი შეიძლება მთელი ცხოვრება იყოს ინფექციის მატარებელი, ასნებოვნებდეს პარტნიორებს, მაგრამ თავად არავითარ დისკომფორტს არ განიცდიდეს. შედარებით იშვიათად ანთებითი პროცესი გამოვლინდება ურეთრაში, პროსტატასა და სათესლე ბუშტუკებში, სათესლე ჯირკვლებში. ზოგჯერ ურეთრიდან დის მღვრიე თეთრი სითხე ან შარდში სისხლის კვალი შეინიშნება. ეს 1-2 კვირა გრძელდება. შემდეგ სიმპტომები მცირდება, თუმცა დაავადება გრძელდება და ქრონიკულ ფორმაში გადადის.

ურეაპლაზმოზი

ურეაპლაზმა მიკროორგანიზმია, რომელსაც ვირუსებიდან ერთუჯრედიანებისკენ გარდამავალ საფეხურად განიხილავენ. ამ ორგანიზმით ინფიცირება ხშირად სქესობრივი გზით ხდება. გარდა ამისა, ის შეიძლება დედისგან შვილსაც გადაედოს მშობიარობის დროს. ამ დაავადების საინკუბაციო პერიოდი 4 დღიდან ერთ თვემდეა, იშვიათად - უფრო მეტხანსაც. საინკუბაციო პერიოდის შემდეგ თავს იჩენს ურეაპლაზმოზის პირველი სიმპტომები. უნდა ითქვას, რომ ხშირად ურეაპლაზმოზი თითქმის შეუმჩნევლად მიმდინარეობს, ზოგჯერ კი არავითარი სიმპტომი არ შეინიშნება. ასეთი რამ ქალებში უფრო ხშირია. მამაკაცებში ურეაპლაზმოზის ყველაზე გავრცელებული სიმპტომებია მწირი გამჭვირვალე გამონადენი სასქესო ასოდან, ზომიერი ტკივილი და წვის შეგრძნება შარდვის დროს. თუ ურეაპლაზმამ წინამდებარე ჯირკვალი დააზიანა, პროსტატიტის ნიშნები გამოვლინდება.

მიკოპლაზმოზი

უროგენიტალური მიკოპლაზმოზი კლინიკურად დიდად არ განსხვავდება სხვა ეტიოლოგიის (გონორეა, ტრიქომონიაზი) დამაზიანებლებისგან. ზოგიერთს სუბიექტური გამოვლინებები არ გააჩნია, ზოგიერთი კი სიმპტომების მთელ წყებას უჩივის. შარდსასქესო გზების დაზიანების შემთხვევაში მამაკაცებს დილაობით მცირე რაოდენობის გამონადენი აქვთ.

ქლამიდიოზი

ქლამიდიოზი სხვა სქესობრივი გზით გადამდებ დაავადებებს ნელ-ნელა ართმევს ოცდამეერთე საუკუნის ჭირის ტიტულს. ჯანმოს განცხადებით, ამ ინფექციის გავრცელების ტემპი ზვავის სიჩქარეს ჰგავს. ეს დაავადება უმთავრესად სქესობრივი გზით გადაეცემა. მამაკაცებში ყოველი მეორე ურეთრიტი ქლამიდიური წარმოშობისაა. მამაკაცებში ქლამიდიოზის სიმპტომი ურეთრიდან გამონადენია. არცთუ დიდი რაოდენობის გამონადენი გამჭვირვალეა. მას თან სდევს მცირე ტკივილი შარდვის დროს. ბავშვებში (ბიჭებში) ურეთრიდან გამონადენთან ერთად სასქესო ორგანოების ქავილიც შეიმჩნევა.

არასპეციფიკური ურეთრიტი

არასპეციფიკური ურეთრიტი შარდის გამომყოფი არხის ანთებაა, რომელიც გამოწვეულია გონოკოკებით, ქლამიდიით, ტრიქომონით, ურეაპლაზმით, მიკოპლაზმითა და ჰერპესის ვირუსისგან განსხვავებული სხვა მიკროორგანიზმებით. ვენეროლოგიაში ეს ყველაზე საინტერესო და ნაკლებშესწავლილი სფეროა. არასპეციფიკურ ურეთრიტზე ეჭვის მიტანა აუცილებელია ურეთრიტის ნებისმიერი სიმპტომის (სასქესო ასოდან გამონაყოფი, ტკივილი და წვა შარდვის დროს) შემთხვევაში.

გარდნერელოზი

გარდნერელოზი საშოს დისბაქტერიოზია, ამიტომ ზოგიერთ სპეციალისტს მიაჩნია, რომ ამ პათოლოგიას მამაკაცებს პირდაპირ ვერ მივუსადაგებთ. თუმცა ისიც ფაქტია, რომ გარდნერელებს, გარდნერელოზის გამომწვევებს, უნარი შესწევთ, მამაკაცის ორგანიზმში ანთებითი პროცესები გამოიწვიონ. გარდნერელა მამაკაცის სასქესო სისტემაში უშუალოდ სქესობრივი კონტაქტის დროს ხვდება და რაკი მისი სასქესო ტრაქტის "კანონიერი მცხოვრები" არ არის, შეიძლება სქესობრივ ინფექციად ჩაითვალოს. მამაკაცის ორგანიზმში გარდნერელა ყველაზე ხშირად ხვდება და, როგორც წესი, სასქესო სისტემას 2-3 დღეში ტოვებს. იშვიათად ვითარდება გარდნერელების ქრონიკული მატარებლობა, რომლის დროსაც ანალიზები ყოველთვის დადებითია, თუმცა დაავადების არავითარი სიმპტომი არ არსებობს. ათიდან 9 შემთხვევაში მამაკაცის ორგანიზმში მოხვედრილი გარდნერელა საერთოდ არ ამჟღავნებს თავს და იმით არის საშიში, რომ კაცის სქესობრივი პარტნიორები ისე ავადდებიან, ამის შესახებ წარმოდგენაც არ აქვთ. კლასიკურ შემთხვევებში დაავადების გამომწვევები, მას შემდეგ, რაც სქესობრივი აქტის დროს საშარდე არხში მოხვდებიან, იწვევენ ლორწოვანი გარსის დუნედ მიმდინარე ანთებით პროცესს. ამ დროს სასქესო ასოდან შეიძლება მომწვანო ფერის გამონადენი წამოვიდეს, რომელიც პაციენტისათვის ნაკლებშემაწუხებელია. თუმცა მდგომარეობა შეიძლება დამძიმდეს კიდეც - გარდნერელოზის გამომწვევებმა ურეთრიტი გამოიწვიონ, რომელიც შარდვისას წვითა და ტკივილით ვლინდება. გარდა ამისა ასოდან გამონადენს სპეციფიკური (თევზის) სუნი აქვს. ასეთ დროს აუცილებელია გარდნერელოზის მკურნალობა, დანარჩენ შემთხვევებში კი მრავალი სპეციალისტი მამაკაცებში გარდნერელოზის მკურნალობას აუცილებლობად არ მიიჩნევს. თუმცა, იქიდან გამომდინარე, რომ მამაკაცისთვის უვნებელი გარდნერელოზი შეიძლება მისი სქესობრივი პარტნიორის ინფიცირების მიზეზად იქცეს, ამ დაავადების მკურნალობა ყოველთვის საჭიროა.

ვენერული დაავადებების სიმპტომები ქალებში

ქალებში ეს სიმპტომები უმნიშვნელოდ არის გამოხატული. უმეტესად დაავადება თითქმის უსიმპტომოდ მიმდინარეობს ან ისეთი სიმპტომები შეინიშნება, რომლებიც სქესობრივი გზით გადამდები დაავადებების მთელი ჯგუფისთვის არის დამახასიათებელი. გვინდა, ხაზი გავუსვათ, რომ ვენერული დაავადებების დიაგნოსტირება მხოლოდ და მხოლოდ სიმპტომების საფუძველზე შეუძლებელია - ბევრი ასეთი დაავადების სიმპტომები ერთმანეთს ძალიან ჰგავს. სიმპტომური დიაგნოსტიკის კიდევ ერთი სირთულე იმაში მდგომარეობს, რომ სქესობრივი გზით გადამდები ინფექციების სიმპტომები და ნიშნები პრაქტიკულად არ განსხვავდება სხვა იმ ინფექციებისგან, რომლებიც შარდსადენი არხის ანთებას იწვევენ. და მაინც, არსებობს საგანგაშო ნიშნები, რომლებიც ამა თუ იმ დაავადებაზე მიუთითებენ. ესენია:

  • საშოდან უჩვეულო გამონადენი (თეთრი, ლორწოვანი, მწვავე, ქაფიანი, სუნით ან მის გარეშე);
  • საშოდან უსიამოვნო სუნის მქონე გამონადენი;
  • სასქესო ორგანოების მიდამოში ქავილი ან წვა;
  • საშოდან სისხლიანი გამონადენი მენსტრუაციათა შუა პერიოდში;
  • მენსტრუალური ციკლის დარღვევები;
  • ჩვეულებრივთან შედარებით გახშირებული შარდვა ან შარდვის მოთხოვნილება;
  • სხეულის ტემპერატურის მომატება (შესაძლოა, არც იყოს, ან ოდნავ იყოს მომატებული, 370ც ფარგლებში);
  • შარდვისას ტკივილი და ქავილი;
  • ტკივილი სქესობრივი აქტის დროს;
  • ტკივილი მუცლის ქვედა არეში;
  • ტკივილი საზარდულის არეში.

თუ თქვენთვის ძვირფასია თქვენი და თქვენი ახლობლების (ზოგიერთი ვენერული დაავადება საყოფაცხოვრებო გზითაც შეიძლება გადაეცეს) ჯანმრთელობა, შარდვის ერთი შეხედვით უმნიშვნელო დარღვევისას ან მუცლისქვედა არეში დისკომფორტის შეგრძნებისას ჯობს კონსულტაციისათვის ექიმ გინეკოლოგს მიმართოთ.  დაბოლოს, ყველა ზემოთ ჩამოთვლილი დაავადების პროფილაქტიკა ძალზე უბრალო და ეფექტურია - ცხოვრების ჯანსაღი წესი, პარტნიორის ერთგულება, ჯანსაღი კვება, გადაღლისა და სტრესისთვის თავის არიდება, საკუთარი თავისადმი მცირეოდენი ყურადღება ბევრ უსიამოვნებას აგაცილებთ თავიდან. თუ ასოდან გამონადენმა ცვლილება განიცადა, ნუ დაელოდებით, როდის გაივლის ყველაფერი თავისთავად - მხოლოდ სპეციალისტს, ექიმ უროლოგსა და ანდროლოგს, ვენეროლოგსა და გინეკოლოგს ძალუძთ, ზუსტად შეაფასონ, ნორმალურია თუ არა ეს. აუცილებლად მიაკითხეთ ექიმს და დარწმუნდით, რომ ჯანმრთელი ბრძანდებით. თუ არსებობს პრობლემა, იგი ადვილად, სწრაფად, იაფად და პირველივე შემთხვევაში იკურნება მხოლოდ ადრეულ სტადიებზე, და დროული ვიზიტი ექიმთან - თქვენი ჯანმრთელობის საწინდარია.