როდის უნდა გაკეთდეს ბოტოქსი
კოსმეტოლოგიაში ბოტოქსი და მისი ანალოგი დისპორტი გამოიყენება მიმიკური ნაოჭების მოსაშორებლად. მიმიკურ ნაოჭებს მიმიკური კუნთების აქტივობა განაპირობებს. მათი დაძაბვისას კანზე წარმოიქმნება ნაკეცები, რომლებიც დროთა განმავლობაში ბოლომდე აღარ სწორდება და ყალიბდება მიმიკური ნაოჭები. ყველაზე ხშირად ისინი ჩნდება შუბლზე, წარბებს შორის, თვალის კუთხეებში.
სხვა წარმოშობის ნაოჭების გადასასწორებლად გამოიყენება შემდეგი მეთოდები: კონტურული პლასტიკა, მეზოძაფებით ტრედლიფტინგი, ქიმიური ლიფტინგი და სხვა.
როგორ მოქმედებს ბოტოქსი
ჩვეულებისამებრ, ბოტოქსი შეჰყავთ მიმიკურ კუნთებში, სადაც ის დროებით ბლოკავს ნერვული იმპულსების აღქმას. ამ ბლოკადის ხარჯზე კუნთი ან მისი ნაწილი დუნდება, აღარ იკუმშება და მისგან ჩამოყალიბებული ნაოჭები სწორდება. ექიმის ოსტატობა ისაა, რომ ბოტოქსით სრულად არ გათიშოს ნაოჭების წარმომქმნელი კუნთები და მხოლოდ მომატებული ტონუსი მოხსნას - ისე, რომ არ დაირღვეს ბუნებრივი მიმიკა.
ბოტულოტიქსინის ზემოქმედებით დროებით იბლოკება ნერვკუნთოვანი კავშირი. კუნთთა და ნერვული ბოჭკოები ამ დროს არ ზიანდება.
ბოტოქსის მოქმედება შექცევადია - 4-6 თვის შემდეგ დაბლოკილი ნერვკუნთოვანი კავშირები აღდგება.
ბოტოქსის გამოყენების განსაკუთრებული ტექნიკაა მეზობოტოქსი, როდესაც ეს ნივთიერება კუნთის ნაცვლად კანში შეჰყავთ.
როგორ მოვემზადოთ პროცედურისთვის
- ბოტოქსის ინექციამდე სამი დღით ადრე არ არის რეკომენდებული ანტიბიოტიკებისა და ანტიკოაგულანტების - ასპირინის, ჰეპარინის, ფენინდიონის - მიღება.
- ერთი დღით ადრე უარი თქვით ალკოჰოლზე.
- პროცედურის დღეს არ არის სასურველი სპორტული თუ სხვა სახის ფიზიკური აქტივობა.
როდის ხდება თვალსაჩინო შედეგი
მიმიკური კუნთები, საშუალოდ, 5-7 დღეში ეშვება. მაქსიმალური ეფექტი ორი კვირის შემდეგ მიიღწევა.
არსებობს ორგანიზმის ინდივიდუალური თავისებურებებით განპირობებული ვარიანტებიც, როდესაც ბოტულოტოქსინი მეორე დღესვე იწყებს მოქმედებას. ზოგჯერ ამ პროცესს თვეც კი სჭირდება.
ეფექტის ხანგრძლივობა
პირველი პროცედურის შემდეგ მიმიკური ნაოჭები საშუალოდ 4-6 თვით სწორდება. ამ ხნის შემდეგ ბოტოქსით ბლოკირებული ნერვკუნთოვანი კავშირები აღდგება, კუნთთა ბოჭკოები ისევ იკუმშება და ნაოჭებიც ხელახლა ჩნდება, ამიტომ შედეგის შესანარჩუნებლად აუცილებელია მისი ხელმეორედ შეყვანა. 3-5 სეანსის შემდეგ გადასწორებული ნაოჭების ეფექტი, წესისამებრ, 10-12 თვეს ძლებს.
შეზღუდვები
ჩვეულებრივ ცხოვრებას ადამიანი პროცედურის დასრულებისთანავე შეიძლება დაუბრუნდეს. მაგრამ გასათვალისწინებელია, რომ ბოტულოტოქსინის ქსოვილებში გადანაწილება რამდენიმე საათს მოითხოვს. ერთი დღეც ინექციის ადგილის შეხორცებას სჭირდება. იმისთვის, რომ ეს პროცესები ოპტიმალურად წარიმართოს, საჭიროა რამდენიმე შეზღუდვის გათვალისწინება:
- არ დაწვეთ 3-4 საათი;
- ერთი დღე თავი არიდეთ ანტიკოაგულანტებისა და ალკოჰოლის მიღებას;
- ორი დღე ხელით არ შეეხოთ ინექციის ადგილს;
- ორი დღე ხანგრძლივად ნუ დახრით თავს;
- ორი დღე თავი აარიდეთ სპორტსა და ფიტნესს;
- ორი დღე ერიდეთ გადახურებას - არ წახვიდეთ აბანოში, საუნაში, არ გაირუჯოთ;
- 10 დღე სახისკენ არ მიმართოთ ფენით ცხელი ჰაერის ნაკადი.
როდისაა ბოტოქსი ყველაზე ეფექტიანი
პროცედურის შედეგი დამოკიდებულია არა მარტო ინდივიდუალურ თავისებურებებზე, არამედ ასაკზეც.
- 25 წლამდე - ადამიანთა უმრავლესობას ბოტოქსი არ სჭირდება, რადგან კანი საკმარისად ელასტიკურია და მიმიკური ნაოჭები სერიოზულ პრობლემას არ წარმოადგენს.
- 30-დან 40 წლამდე - მიმიკური ნაოჭები უმრავლესობას საკმაოდ შესამჩნევი აქვს და ბოტოქსისგან მაქსიმალურ ეფექტს უნდა ველოდეთ.
- 50-დან 60 წლამდე - კუნთოვანი ბოჭკოები სუსტდება და ბოტოქსის პროცედურა ნაკლებად ეფექტიანია, ვიდრე ახალგაზრდა ასაკში.
- 60 წლიდან - მიმიკური მუსკულატურის ტონუსი საგრძნობლად მცირდება და არცთუ დიდ როლს ასრულებს ნაოჭების ფორმირებაში, შესაბამისად, ბოტოქსის გამოყენების უბანი მეტად შეზღუდულია.
უკუჩვენებები
ისევე როგორც ნებისმიერ სამკურნალო საშუალებას, ბოტოქსისა და დისპორტის გამოყენებასაც აქვს უკუჩვენებები:
- ანთებითი ან ინფექციური პროცესი, რადგან ინექციის ადგილას კანი ჯანმრთელი უნდა იყოს;
- გადატანილი პლასტიკური ან სხვა ტიპის ქირურგიული ოპერაცია სახეზე - ოპერაციის შემდეგ სახის ქსოვილები თანდათანობით იღებს საბოლოო ფორმას, ბოტოქსით მათი კორექცია მიზანშეწონილია ოპერაციიდან დაახლოებით 3 თვის შემდეგ;
- სახის ქსოვილების გამოხატული გრავიტაციული პტოზი - ეს მოვლენები, უპირველესად, განპიროებებულია სახის კუნთების სისუსტით; დასუსტებულ კუნთებში ბოტოქსის შეყვანამ შესაძლოა დაამძიმოს არსებული პრობლემა;
- მწვავე ინფექციური დაავადებები, სხეულის ტემპერატურის მომატება;
- მაღალი ხარისხის მიოპია;
- მიასთენიური სინდრომი;
- ჰიპერმგრძნობელობა პრეპარატის კომპონენტების მიმართ;
- ორსულობა და ლაქტაცია.
შესაძლო გართულებები
პროცედურის შემდეგ ნანემსარის ადგილას მოსალოდნელია მცირე შეშუპება და წერტილოვანი სისხლჩაქცევები, რომლებიც მკურნალობას არ მოითხოვს - რამდენიმე დღეში თავისთავად გაივლის.
გამორიცხული არ არის ჰიპერკორექცია - პრეპარატის ზედოზირებისას კუნთები დაგეგმილზე მეტად დუნდება. შეინიშნება ქსოვილების დაწევა, „ნიღბისებური სახე“ ან სახის ასიმეტრია.
ბოტოქსკოსმეტიკა
უკანასკნელ ხანს კოსმეტიკის ბაზარზე გამოჩნდა კრემები „ბოტოქსის ეფექტით“, რომელთა რეგულარული და ხანგრძლივი გამოყენებით შესაძლებელია წვრილი მიმიკური ნაოჭების შემცირება.