დედის რძე კოსმეტოლოგიაში - აკნესა და ეგზემის მკურნალობა
როგორც სპეციალისტები ამტკიცებენ, ეს ნიღაბი სასწაულებს ახდენს.
ის, რომ დედის რძე უნიკალური სითხეა - აძლიერებს ჩვილის იმუნურ სისტემას, იცავს ახალშობილს რესპირატორული ინფექციებისგან, საჭმლის მომნელებელი ტრაქტის დაავადებებისა და ასთმისგან, გააჩნია ანტიბაქტერიული და ანტისეპტიკური მოქმედება - ყველასათვის ცნობილია. მაგრამ როგორც კოსმეტოლოგები განმარტავენ, თურმე ეს სითხე ზრდასრულთა კანისთვისაც უნიკალური წამალია.
ამერიკული SPA ცენტრის დამფუძნებელი შამა პატელი აღნიშნავს: ბევრი ქალი საკუთარ რძეს წარმატებით იყენებს კოსმეტოლოგიური პრობლემების მოსაგვარებლად. დედის რძეში ბევრი ანტისხეულია, რომელიც აქტიურად ებრძვის სხვადასხვა ინფექციას. გარდა ამისა, ის დიდი რაოდენობით შეიცავს ცხიმებსა და საკვებ ელემენტებს. ასე რომ, დედის რძე უნიკალური საშუალებაა პრობლემური კანისათვის.
ამერიკული SPA ცენტრი თურმე ინტენსიურად იძენს რძეს მეძუძური ქალებისგან. მას სპეციალური ბანკი აქვს შექმნილი, რომელშიც ქალბატონები საგანგებო სამედიცინო შემოწმების შემდეგ რეგისტრირდებიან. ამგვარად, ამერიკელი კოსმეტოლოგები დედის რძეს წარმატებით იყენებენ აკნეს, ეგზემის, დამწვრობების სამკურნალოდ და უბრალოდ კანის გასაწმენდად.
თინათინ გოცაძე