-თუ შეიძლება მიპასუხეთ დაინფიცირებიდან რამდენ ხანში ვლინდება კლინიკურად და ლაბორატორიულად ჰეპატიტი ბე, ცე და შიდსი

-შიდსი – პოლიმერიზაციის ჯაჭვური რეაქციით (პი-სი-არ კვლევა) დაავადება დგინდება ერთ კვირაში, ხოლო ჩვეულებრივი იმუნოფერმენტული მეთოდით 12 კვირაში. იშვიათ შემთხვევებში ეს პერიოდი 6 თვეა. როცა არსებობს რეალური საფრთხე, რომ ადამიანის ორგანიზმში შეიძლება მოხვედრილიყო ადამიანის იმუნოდეფიციტის ვირუსი (აივ) და შესაძლოა მოხდა პირის ინფიცირება ასეთი სიტუაციებში რეკომენდებულია ექსპოზიციის შემდგომი პროფილაქტიკური მკურნალობის ჩატარება ანტივირუსული პრეპარატებით, რადგან მკურნალობის ფონზე 80%-მდე მცირდება ვირუსის გავრცელების რისკი. მთავარია გახსოვდეთ, რომ ექსპოზიციის საფრთხის ყველა შემთხვევაში მკურნალობის დაწყება უნდა მოხდეს რაც შეიძლება სასწრაფოდ, ექსპოზიციის ეპიზოდიდან უმალვე და მაქსიმუმ 72 საათის მანძილზე. 
ჰეპატიტი მწვავე მიმდინარეობისას სისხლში გამოვლინდება 6-8 კვირის განმავლობაში. ჰეპატიტზე სისხლის ანალიზის ჩატარება მიზანშეწონილია სავარაუდო ინფიცირებიდან 2-3 თვის შემდეგ, რადგან ე. წ. ინკუბაციური პერიოდის ადრეულ სტადიაზე დაავადება ანალიზით შეიძლება არ გამოვლინდეს. 
მწვავე B და C ჰეპატიტები მიმდინარეობს როგორც სიმპტომურად (კლინიკური ნიშნების გამოვლინებით), ასევე უსიმპტომოდაც. ჰეპატიტის ვირუსის ორგანიზმში შეჭრის შემდეგ კლინიკური ნიშნები საშუალოდ 1-6 თვის განმავლობაში (დაავადების საინკუბაციო პერიოდი) იჩენს თავს. ხშირად დაავადება წლობით (10, 15, 20 წლის განმავლობაში) მიმდინარეობს ყოველგვარი სიმპტომის გარეშე.