- მყავს ორი შვილი, გოგონა მე-17 წელშია და მისი სიმაღლე 170 სმ. ბიჭი 12 წლისაა და 150 სმ. მაინტერესებს, ეს ნორმალური ზრდის ტემპია? განსაკუთრებით ვნერვიულობ ბიჭზე. მამა მაღალი ყავს, 183-185 სმ. მეც 170 სმ ვარ. მაგრამ ბაბუები ყავს საშუალო სიმაღლის და რა გავაკეთო, რა საკვები მივაწოდო? რძის პროდუქტებს შიგადაშიგ ვაძლევ, შემოდგომა-გაზაფხულზე სტაფილოსა და რძეს ერთად ვასმევ. რამდენად სწორია ეს მეთოდი და თუ არსებობს რამე სხვა მეთოდი? რომელი პროდუქტები არის დიდი რაოდენობით A ვიტამინის შემცვლელი?

- ძალიან კარგი იქნებოდა, მიგეთითებინათ ბავშვების წონაც. 17 წლის გოგონას სიმაღლე ნორმაში მერყეობს 152-174 სმ და წონა შესაბამისად 46-76 კგ. 12 წლის ბიჭის სიმაღლე - 136-163 სმ, წონა - 28-58 კგ.

გირჩვეთ, ბავშვების კვების რაციონში შეიტანოთ რაც შეიძლება მეტი ხილი და ბოსტნეული, ვიტამინები, ცილები საჭირო რაოდენობით და კალციუმით მდიდარი პროდუქტები. დადგენილია, რომ ზრდის ჰორმონის გამოყოფას ასტიმულირებს ცილოვანი საკვები და თრგუნავს გლუკოზა. ამიტომ რაციონში შეიტანეთ ბუნებრივი ცილოვანი პროდუქტები - კაკალი, კვერცხი, ხაჭო; ამავე დროს უნდა შეზღუდოთ გლუკოზა: შაქარი, კამფეტები, ტკბილი სასმელები - მათი შეცვლა შეიძლება თაფლით, ტკბილი ხილით.

ზრდაზე განსაკუთრებით ეფექტურად მოქმედებს A და B ჯგუფის ვიტამინები. A ვიტამინის წყაროა ახალი მწვანილი, სტაფილო, პომიდორი. B ვიტამინები ბევრია კაკალში, კვერცხის გულში, ნაღების კარაქში.
უნდა ვიცოდეთ აგრეთვე, რომ ზრდის ჰორმონის მაქსიმალური სეკრეცია ძილში ხდება, ამიტომ მნიშვნელოვანია ძილის რეჟიმის დაცვა - ძილის ნაკლებობა ზრდის ხელისშემშლელი ფაქტორია.
გარდა ამისა, ატარეთ ბავშვები ცურვაზე, გირჩევთ შხირ-ხშირად გააკეთონ წახტომები და შეეცადონ მიწვდნენ რაც შეიძლება მაღალ ნიშნულს.

არსებობს ასეთი ხალხური საშუალებაც:

25 ცალი ასკილი დაჩეჩქვეთ და დაასხით 1 ჭიქა მდუღარე წყალი, დააყენეთ მთელი ღამე, მეორე დილას გადაწურეთ და დაამატეთ ერთი ჭიქა გამოწურული სტაფილო, ერთი ჭიქა გაწურული ჭარხალი, 1 ჭიქა ბროწეულის წვენი, 2 სუფრის კოვზი თაფლი და 2 ცალი გაწურული ლიმონი.

ამგვარად მომზადებული ხსნარის დალევას დაიწყებთ რვის ნახევარზე (დილით) და ყოველ საათში სვამთ ერთ ჭიქას. ეს კეთდება თვეში ერთხელ სამი თვის განმავლობაში. შემდეგ სამი თვე ისვენებთ, შემდეგ ისევ სამჯერ გააკეთებთ სამი თვის განმავლობაში და ასე შემდეგ.