მარიამ ფოლადაშვილი

სხვა ტიპის ართრიტების მსგავსად, იწვევს სახსრების ტკივილსა და შეშუპებას.

პოდაგრა ვითარდება პაციენტებში, რომელთაც აქვთ ჰიპერურიკემია. ჰიპერურიკემია მდგომარეობაა, რომლის დროსაც სისხლში იმატებს ნივთიერება შარდმჟავა - ურატები. ურატები სხეულის სხვადასხვა ნაწილში ქმნიან კრისტალებს, რაც შემდგომ იწვევს ჩივილების განვითარებას. (ჰიპერურიკემიის მქონე პაციენტთა დაახლოებით ერთ მესამედს შეიძლება არ განუვითარდეს პოდაგრა).

ჩივილები იწყება მაშინ, როცა შარდმჟავა კრისტალების გამო ვითარდება ანთებითი ცვლილებები სახსრებში და თირკმელში ყალიბდება კენჭები.

პოდაგრის განვითარების რისკის ფაქტორებია:

• სიმსუქნე;
• თირკმლის ქრონიკული დაავადება;
• მაღალი არტერიული წნევა;
• ალკოჰოლის დიდი რაოდენობით მოხმარება;
• დიდი რაოდენობით ხორცისა და ზღვის პროდუქტების მოხმარება;
• ისეთი საკვები პროდუქტების მოხმარება, რომლებიც შეიცავენ ფრუქტოზით მდიდარ სიმინდის სიროფს ( არადიეტური გაზიანი სასმელები)

სამკურნალოდ ხშირად გამოიყენება შარდმჟავას დამაქვეითებელი მედიკამენტები. გარდა მედიკამენტოზური მკურნალობისა დიდი მნიშვნელობა ენიჭება კვების შეცვლას, კერძოდ, შარდმჟავას მაღალი შეცველობის მქონე პროდუქტის რაციონიდან ამოღებას.

• შარდმჟავას მაღალ შემცველად ითვლება პროდუქტი, რომლის 100 გ-ში შარდმჟავას შემცველობა 400 მგ-ზე მეტია;
• შარდმჟავას საშუალო შემცველად ითვლება პროდუქტი, რომლის 100 გრ-ში შარდმჟავას შემცველობა 100-დან 400 მგ-მდეა;
• შარდმჟავას დაბალ შემცველად ითვლება პროდუქტი, რომლის 100 გრ-ში შარდმჟავას შემცველობა 100 მგ-ზე ნაკლებია

კვებით ცვლილებებს შეუძლია შეამციროს შარდმჟავას რაოდენობა სისხლში, ამასთან ერთად, შარდმჟავას ცვლის კონტროლო მნიშვნელოვნად აუმჯობესებს წონის კლებას, ისევე, როგორც ზოგად ჯანმრთელობას.

გამომდინარე იქიდან, რომ პოდაგრა ქრონიკული, კონტროლირებადი დაავადებაა, მკურნალობის დაწყებიდან რეგულარულადაა საჭირო ექიმთან ვიზიტი, რათა შეფასდეს მკურნალობის ეფექტურობა, საჭიროების შემთხვევაში კი შეიცვალოს მკურნალობის ტაქტიკა.