რა არის სიარულისას ტერფებში ტკივილის ძირითადი მიზეზები
მტკივენულობის ერთერთი ძირითადი მიზეზი შეიძლება იყოს განივი ბრტყელტერფიანობა მეტატარზალგიით. ამ დაავადების დროს ადამიანს აქვს მწვავე ტკივილი თითების ძირში. მტკივნეული შეგრძნებები ძლიერდება ფეხშიშველი სიარულისას და წყნარდება ადამიანის დაჯდომის ან დაწოლისას. მეტატარზალგიის განვითარების მიზეზი შეიძლება უკავშირდებოდეს ტერფის არანორმალურ ბიომექანიკას ან ფეხების გადაჭარბებულ დატვირთვას.
ტერფების მიდამოს მტკივნეულობა შეიძლება განაპირობოს მორტონის ნევრინომამ (ნერვის კეთილთვისებიანი გამსხვილება). მისი ძირითადი სიმპტომია მწვავე და ძლიერი ტკივილი, რომელიც გადაეცემა თითებში და შეძილება პროვოცირებული იყოს ბრტყელტერფიანობით ან მჭიდრო მაღალქუსლიანი ფეხსაცმლის ტარებით.
აქილევსის მყესის ტენდინიტი კიდევ ერთი დაავადებაა, რომლის დროსაც აღინიშნება ტერფის მიდამოში მტკივნეული შეგრძნებები ან დისკომფორტი. ჩვეულებრივ, ის ვლინდება ფიზიკური დატვირთვის ან დაჭიმვისას მწველი ტკივილით.
სახსრების ოსტეოართროზისას ვითარდება სახსარში ხრტილის გამოფიტვა და დაშლა, ოსტეოართროზისას ტკივილი შეიძლება აღინიშნოს არა მარტო მოძრაობის, არამედ მოსვენებულ მდგომარეობაშიც, თან ახლავს სახსრის მოძრაობის შეზღუდვა, „ხახუნის“ შეგრძნება, ასევე შეშუპება, რომელიც ძლიერდება ფიზიკური დატვირთვისას.
დაუშვებელია ტკივილის მოთმენა და თვითდიანგოსტიკა. რაც შეიძლება სწრაფად უნდა მივმართოთ სპეციალისტს დიაგნოზის დასაზუსტებლად და მკურნალობისათვის.