როგორ მოვუაროთ კანს მენსტრუაციის დროს
„განსაკუთრებული“ დღეები თითქოს ამოწმებენ სახის კანს სიმტკიცეზე – ხან პრიალებს, შემდეგ იქერცლება, მერე იფარება მუწუკებით. როგორ გავუმკლავდეთ კანის „ახირებებს“. მენსტრუალური ციკლი არის ქალის ორგანიზმში ამა თუ იმ ჰორმონის კონცენტრაციის ციკლური მატება. და რადგან ჩვენი კანი ყველაზე მეტად ჰორმონზე დამოკიდებული ორგანოა, ასეთი ცვლილებები მასზე პირდაპირ მოქმედებს.
როგორ მოქმედებს მენსტრუალური ციკლი კანის მდგომარეობაზე
მენსტრუალური ციკლის დაწყებისთანავე ჰორმონების – პროგესტერონისა და ესტროგენების კონცენტრაცია ქვეითდება საწყის დონეზე. ამ პერიოდის ბოლოს შეინიშნება ცხიმის წარმოქმნის დაქვეითება – კანი ხდება მშრალი და თხელი (ამას განსაკუთრებით გრძნობენ მშრალი კანის მქონე ქალები). გამონაყარი, თუ მენსტრუაციის დაწყებამდე გაჩნდა, შრება ან საერთოდ ქრება.
შემდეგ იწყება ქალის ორგანიზმში ესტრადიოლის კონცენტრაციის თანდათანობითი ზრდა. მისი გავლენით კანი კარგად მარაგდება სისხლით, ხდება უფრო ელასტიკური, მასში მიმდინარეობს უჯრედების განახლების, კოლაგენის და ყველა სტრუქტურული ელემენტის დაჩქარებული პროცესები.
ოვულაცია არის ყველა ქსოვილის განახლების პიკი.
და ამის შემდეგ იწყება პროგესტერონის დომინირების ფაზა, როდესაც მთელ სხეულში შეინიშნება სითხის დაგროვება (ეს გამოიხატება შეშუპებით). და თუ სისხლში ანდროგენების ზრდისკენაა ტენდენცია, მაშინ მენსტრუაციის სტარტის წინ სახეზე ჩნდება მცირე გამონაყარი ან ძლიერდება არსებული გამონაყარი. ცხიმის წარმოების გაზრდის გამო სახე უფრო მეტად იწყებს ბზინვარებას.
ამიტომ მენსტრუალური ციკლის თითოეულ პერიოდში კანს გარკვეული მოვლა სჭირდება.
როგორ მოვუაროთ კანს მენსტრუაციის დროს
თვიურის დაწყებამდე და მის დროს მიზანშეწონილია გამოიყენოთ გამომშრობი, ანტიბაქტერიული საშუალებები – „დასაბანი საშუალებები“, ხელსახოცები, ენზიმური სკრაბები, გომაჟები, ლაქების კორექტორები, ნიღბები, ლატექსის რბილი ჯაგრისები.
ამ პერიოდში დაუშვებელია აგრესიული პროცედურები: ხისტი სკრაბები, წმენდა, თუნდაც ერთი გამონაყარის გამორწყვა, კანზე ორთქლის ზემოქმედება, მასაჟი.
მენსტრუაციის ბოლოს, როცა კანი ნორმალურ მდგომარეობას უბრუნდება ან იწყებს გაშრობას, აქტიური დამატენიანებელი უკვე საჭიროა.
შემდეგ, როდესაც ესტრადიოლის ფაზა იწყება, შეიძლება ჩატარდეს ყველა მასტიმულირებელი პროცედურა, გამოვიყენოთ კოსმეტიკა პეპტიდებითა და სტიმულატორებით.
მნიშვნელოვანია გავითვალისწინოთ, რომ არ შეიძლება კანის ტრავმირება დაწყებამდე 3 დღით ადრე და მენსტრუაციის მთელი პერიოდის განმავლობაში.
ასევე, ყურადღება არ უნდა მივაქციოთ გამონაყარს! თუ თქვენ თვითონ დაიწყებთ მათ მოშორებას (ამ სიტყვის სრული გაგებით), გამონაყარი გაძლიერდება. და ამან შეიძლება გამოიწვიოს ანთებისშემდგომი ნაწიბურების, ჰიპერპიგმენტაციის გაჩენა, კაფსულირებული პროცესის ანთება, რომელიც კვლავ შეიძლება განვითარდეს.
ამ დღეებისთვის ძალიან კარგია კანის მოვლის მჟავების შემცველი კოსმეტიკა: სალიცილის, რძის, ნუშის შემცველი, ბენზოილ პეროქსიდის, აზელაინის, გოგირდის შემცველი (თუ არის გამონაყარი).
აზელაინის მჟავა დაგვეხმარება ცხიმით განპირობებული ბზინვარებისას, ალანტოინი, მწვანე ჩაი, ალოე ვერა ამშვიდებს კანს, შარდოვანა, ჰიალურონის მჟავა კი ატენიანებს მას. ბრომელაინი, ფერმენტები კარგია როგორც ფერმენტული პილინგის ნაწილი, რეტინოლი – ლაქების კორექტორებში.
კრიტიკულ დღეებში კანს უნდა მოვუაროთ ნაზად და კორექტულად.
მიზანშეწონილია გამორიცხოთ მაკიაჟის მკვრივი ბაზები, სილიკონის შემადგენლობები და ნაკლებად გამოიყენოთ დეკორატიული კოსმეტიკა პიგმენტით, რათა თავიდან აიცილოთ ფორების დახშობა. კოსმეტიკისა და კანის ცხიმის ნარევი ერთგვარად აცემენტებს ფორებს, აძლიერებს ან იწვევს გამონაყარს.