რა არის ნეიროდერმიტი
ნეიროდერმიტი კანზე ლაქის გაჩენით იწყება, რომელიც ქავილს იწვევს. ქავილით დაზიანებული კანი თანდათან სქელდება და უხეშდება.ლაქები სხეულის ნებისმიერ ადგილას შეიძლება გაჩნდეს, თუმცა უმეტესად კისრის უკანა მხარეს, მაჯებზე, მკლავებზე, ფეხებზე გვხვდება. ნეიროდერმიტი სიცოცხლისთვის საშიში არ არის და არც გადამდებია.
გამოვლინება:
- კანზე ჩნდება წითელი ან იისფერი ლაქები;
- ქავილი - როგორც წესი, მწვავდება ძილის, მოსვენებისა და სტრესის დროს. ქავილის შედეგად კი კანი ღიზიანდება;
- ტკივილი - ზოგიერთ შმთხვევაში ვლინდება ტკივილი, განსაკუთრებით მაშინ, როცა ლაქები თავის კანზეა;
- დანაწიბურება - ღრმა ჭრილობის შეხორცების შემდეგ კანზე შესაძლოა ნაწიბური დარჩეს;
- ინფიცირება - მისი ნიშნებია დაზიანებული უბნიდან სითხის დენა. შესაძლოა, გაჩნდეს ჩირქით სავსე ბუშტუკებიც
ნეიროდერმიტის ზუსტი მიზეზი უცნობია. ნეიროდერმიტი ვითარდება,მაშინ, როცა ნერვული სისტემა ზედმეტად რეაგირებს სხვადასხვა გამღიზიანებელზე.
გარკვეული ფაქტორები ზრდის ნეიროდერმიტის განვითარების ალბათობას. ის ხშირად გვხვდება 30-დან 50 წლამდე ასაკის პირებში , ასევე, ატოპიური და კონტაქტური დერმატიტის მქონე პირებთან.
დაავადების განვითარების ალბათობა იმატებს, თუ ადამიანს აქვს ეგზემის, ფსორიაზის, კონტაქტური დერმატიტის ოჯახური ისტორია, მშრალი კანი, შფოთვითი აშლილობა, ძლიერი სტრესი ან ემოციურად ტრავმული პერიოდი.
მაპროვოცირებელი ფაქტორი შესაძლოა გახდეს მწერის ნაკბენი, მჭიდრო ტანსაცმელი(ძირითადად, შალისა და სინთეტიკური ქსოვილის), გამონაბოლქვი, ალერგენი, ოფლი.
ნეიროდერმიტის მკურნალობა ინდივიდუალურ მიდგომას საჭიროებს. ნეიროდერმიტის სამკურნალო სპეციფიკური საშუალება არ არსებობს. მკურნალობის მიზანი ქავილის გაქრობა და კანის მთლიანობის აღდგენაა.
კანის ყოველდღიური დატენიანება სიმშრალის შესამცირებლად, გრილი კომპრესები ნაფხაჭნების წარმოქმნის რისკს ამცირებს. რეკომენდებულია ხანმოკლე, თბილი აბაზანების მიღება.