მარიამ ფოლადაშვილი

მშრალი კანი გამოირჩევა დაქვეითებული ელასტიურობით, აქერცვლით და ადვილად გაღიზიანებადობით. ამ დროს, ადამიანი უჩივის ქავილს, მგრძნობელობის მომატებას.

კანის სიმშრალის გამომწვევი მიზეზი ჰიდროლიპიდური დისბალანსია, რომელიც კანის ზედა შრეში (ეპიდერმისის რქოვანა შრეში) იჩენს თავს. ლიპიდები(ცერამიდები,ქოლესტეროლი,ცხიმოვანიმჟავები,ფოსფოლიპიდები, გლიკოზილცერამიდები)ტრანსეპიდერმული ტენიანობის შენარჩუნებაში უმნიშვნელოვანეს როლს ასრულებენ.

კანის სიმშრალე შეიძლება იყოს როგორც, პათოლოგიური პროცესის სიმპტომი, ისე კანის უჯრედების უკუგანვითარების შედეგი ჯანმრთელ პირებში.

კანის აღნიშნული პრობლემა შესაძლებელია სხვადასხვა დარღვევების გამოვლინება იყოს, მაგალითად:

• ენდოკრინული დარღვევების - შაქრიანი დიაბეტი, ფარისებრი ჯირკვლის ჰიპოფუნქცია;
• სისხლის, თირკმლის, ღვიძლის დაავადებების;
• ონკოლოგიური პრობლემების;
• ვიტამინების ნაკლებობის

ამას გარდა, კანის ზოგიერთი ისეთი დაავადებები, როგორებიცაა: ფსორიაზი, დერმატიტი, იქთიოზი კანის სიმშრალით ხასიათდება.

გამომწვევ სხვა მიზეზებს შორის საყურადღებოა:

• კანის არასწორი მოვლა;
• ცხელი წყლით ხშირი ბანაობა;
• კოსმეტიკის ჭარბი მოხმარება;
• ტუტე საპის გამოყენება;
• არასასურველი კლიმატური პირობები - მრალი ჰავა, ქარი, ყინვა, მკვეთრი მზე, ჰაერის ტენიანობა;
• ძილისა და კვების რეჟიმის დარღვევა

კლინიკურად კანის სიმშრალე ვლინდება: აქერცვლით, ნაპრალებით, რომლის შედეგად ვითარდება ქავილი, დაჭიმვის შეგრძნება. აღინიშნებამომატებულია მგრძნობელობა გარემოს ფაქტორებისადმი.

მშრალი კანის მოვლა ითვალისწინებს გასუფთავებას და დატენიანებას.

ფართოდაა გავრცელებული მშრალი კანის მოვლის სხვადასხვა საშუალებები, რომელთა შემადგენლობაში შედის ცვილი, მინერალური ცხიმი. მინერალური ცხიმი ასრულებს გამხსნელის როლს.მას შეუძლია კოსმეტიკის და სხვა ეგზოგენური დაბინძურებისაგან გაწმენდა. კანის გაწმენდის უახლესი საშუალებებია არაიონური გამწმენდები, როგორიცაა ემულსია, რომლის შემადგენლობაში შედის ცხიმოვანი მჟავა და ეთერები. მათ შეუძლიათ ნაზად გაწმინდონ კანი ისე, რომ არ მოაშორონ ზედაპირული ლიპიდები.

არ არის სასურველი დასაბანი საპნების გამოყენება მშრალი კანის დროს. ეს იწვევს არამარტო სიმშრალის გაძლიერებას, არამედ ხელს უწყობს კანის ზედაპირზე მიკრობების შეღწევას. ჩვეულებრივი საპონი უნდა შეიცვალოს თხევადი საშუალებით (შხაპის გელი მშრალი კანისთვის), რომელიც უნარჩუნებს კანს სინოტივეს.

გარდა კანის მოვლის სპეციალური საშუალებებისა (გამწმენდი და დამატენიანებელი საშუალებები), დიდი მნიშვენლობა აქვს ზოგიერთი ჰიგიენური წესების დაცვას, როგორიცაა:

• სითხეების მიღება - კანისთვის სინოტივისა და ორგანიზმში სითხის ბალანსის შესანარჩუნებლად აუცილებელია დღეში 2 ლიტრზე მეტი წყლის მიღება;
• ნეიტრალური pH-ის მქონე საპნის გამოყენება;
• საკვები რაციონის გამდიდრება მარცვლეულით, ხილითა და ბოსტნეულით, A და C ვიტამინით მდიდარი პროდუქტებით

ამასთან, უნდა მოვერიდოთ ტემპერატურის მკვეთრ ცვალებადობას, ზედმეტ გადახურებას ან გაციებას, არ შეიძლება ძალიან ცხელი წყლით დაბანა, ბანაობის შემდეგ კი კანი უნდა შემშრალდეს ნაზად.