ფეხის კანკალის გამომწვევი მიზეზები - როდის უნდა მივმართოთ ექიმს
გადაიძაბა, ინერვიულა, სტრესია! – ხშირ შემთხვევაში მას არ აქცევენ განსაკუთრებულ ყურადღებას. ზოგჯერ არც არის საჭირო და არც ცდებიან, თუმცა ხანდახან შესაძლოა მეტად სერიოზულ პრობლემათა სიმპტომი იყოს. ამ სტატიაში იხილავთ რამდენიმე მიზეზს, თუ რატომ შეიძლება ადამიანს აწუხებდეს ფეხის კანკალი.
ტრემორი
ტრემორი არის კუნთების უნებლიე შეკუმშვა. შეკუმშვა რიტმულია, ამიტომ ადამიანმა შეიძლება იგრძნოს კუნთის კანკალი ან მოძრაობა ინტერვალებით. იგი შეიძლება გაგრძელდეს რამდენიმე წუთის განმავლობაში, ან შეიძლება იყოს მუდმივი პრობლემა.
ძალიან ბევრმა სამედიცინო მდგომარეობამ შეიძლება გამოიწვიოს ტრემორი. ის ხშირ შემთვევაში აზიანებს ნერვულ სისტემას.
იშვიათი ტიპის ტრემორი, რომელსაც ეწოდება პირველადი ორთოსტატული ტრემორი, ძირითადად ფეხებზეა გამოხატული. ამ დაავადების მქონე ადამიანებს დგომის დროს აღენიშნებათ ფეხების კანკალი. ეს შეიძლება იყოს ესენციური ტრემორის ვარიანტიც, რომელიც გენეტიკური ტრემორის სახეობაა. ექიმებმა არ იციან, თუ რა იწვევს მას, თუმცა ზოგიერთი მედიკამენტები შეიძლება დაეხმაროს ადამიანს სიმპტომების მკურნალობაში.
შფოთვა
შფოთვამ შეიძლება დროებით გამოიწვიოს კანკალი. კანკალი ჩვეულებრივ ქრება შფოთვის დასრულებისას. თუმცა, ქრონიკული შფოთვის მქონე ზოგიერთ ადამიანს შეიძლება განუვითარდეს ტრემორი, რომელიც იწვევს კანკალის ქრონიკულ შეტევებს. მკურნალობა ფოკუსირებული უნდა იყოს შფოთვის შემსუბუქებაზე და არა ტრემორის, რადგან ტრემორის მიზეზი შფოთვაა. რელაქსაცია, მედიტაცია, მედიკამენტები, თერაპია და ვარჯიში შეიძლება დაგეხმაროთ შფოთვის დაძლევაში
მასტიმულირებელი პრეპარატები
მასტიმულირებელ პრეპარატებს შეუძლიათ დააჩქარონ ნერვული სისტემის მოქმედება. მათ შორისაა რეცეპტით გაცემული მედიკამენტები, როგორიცაა Adderall და Ritalin, ისევე როგორც არალეგალური ნარკოტიკები, კოკაინი და მეტამფეტამინი.
ამ პრეპარატების გამოყენებამ შეიძლება გამოიწვიოს კანკალი ფეხებში, ხელებში ან ტერფებში. უმეტეს შემთხვევაში, სიმპტომები ქრება, როდესაც ადამიანი წყვეტს პრეპარატის გამოყენებას. თუმცა, 2012 წლის კვლევამ აჩვენა, რომ მეტამფეტამინმა, კოკაინმა და ექსტაზმა შეიძლება გამოიწვიოს მუდმივი კანკალი და ტრემორი, განსაკუთრებით ხანგრძლივი გამოყენების შემდეგ.
ალკოჰოლი
კანკალის გამომწვევი ძირითადი ფაქტორია, აგრეთვე, ალკოჰოლის ხშირი მიღება.
ზოგჯერ, დაზიანება შესაძლოა მუდმივი იყოს, მაგალითად, როდესაც ალკოჰოლი აზიანებს ნერვებს. ზოგ შემთხვევებში, განსაკუთრებით მაშინ, როდესაც ადამიანი ცდილობს, რომ ალკოჰოლს თავი დააღწიოს, სიმპტომები დროებითია.
ადამიანები, რომლებიც დიდი ხნის განმავლობაში იყენებდნენ ალკოჰოლს, კანკალისაგან თავისუფლდებიან ალკოჰოლის მიტოვების შემდგომ.
დემენცია
დემენცია უფრო მეტია, ვიდრე მეხსიერების დაკარგვა. ეს არის ტვინის პროგრესირებადი დაზიანების ტიპი, რომელსაც შეუძლია გავლენა მოახდინოს ადამიანის ტვინის ფუნქციის თითქმის ყველა ასპექტზე, მათ შორის მოძრაობაზე.
დემენციის მქონე ზოგიერთ ადამიანს უვითარდება ტრემორი ან უჩვეულო კანკალი ფეხებში ან მკლავებში. ზოგიერთ შემთხვევაში, ეს მოძრაობები შეიძლება იყოს მდგომარეობის ადრეული სიმპტომი.
ამჟამად არ არსებობს დემენციის მკურნალობის მეთოდები, მაგრამ მედიკამენტები და თერაპია, შეიძლება დაეხმაროს ადამიანს თავის კონტროლში.
როდის მივმართოთ ექიმს
უმეტეს შემთხვევაში, ფეხის კანკალი არ არის სერიოზული სამედიცინო მდგომარეობა. ამასთან, ეს შეიძლება გამოწვეული იყოს ისეთი უბრალო რამით, როგორიცაა კოფეინზე უარის თქმა.
თუ კანკალი ძლიერდება, უმჯობესია მიმართოთ ექიმს.
განსაკუთრებით მნიშვნელოვანია ექიმთან ვიზიტი, თუ ადამიანს აქვს სხვა სიმპტომები, მათ შორის:
- მეხსიერების ან განწყობის ცვლილებები
- უკონტროლო მოძრაობები
- მოძრაობის პრობლემები
- შფოთვა ან მოუსვენრობა
- უძილობა
- ჭრილობები ფეხებზე ან ხელებზე
ავტორი ია რომანაძე