რატომ და როდის შავდება პაპილომა
კიბოდ გადაგვარების საფრთხის გამო. ის სხეულზე პაპილომავირუსით დასნებოვნებისას ჩნდება. თუ ასეთი სიმსივნე გამუქდა, შეიცვალა ფორმა და ზომები, იზრდება მისი ავთვისებიანად გადაგვარების რისკი.
პაპილომები ხშირად იცვლის ფერს, ჩნდება შავი წერტილები ნებისმიერი მექანიკური ზემოქმედების შედეგად, კერძოდ:
- ახალწარმონაქმნის ტრავმა;
- ტანსაცმელზე ხახუნი;
- პაპილომის ზედაპირის დაზიანება ჰიგიენური პროცედურის, კერძოდ, პარსვის დროს.
პაპილომამ ფერი შეიძლება შეიცვალოს მკურნალობის ფონზე.
თუ ახალწარმონაქმნის ტკივილიც აღინიშნება, აუცილებელია ონკოლოგის კონსულტაცია, რომელიც დანიშნავს კომპლექსურ დიაგნოსტიკას.
უნდა გვახსოვდეს, რომ პათოლოგიური პროცესის განვითარებას ბიძგი შეიძლება მისცეს:
- უკონტროლო მკურნალობამ სახლის პირობებში;
- პაპილომავირუსულ ახალწარმონაქმნზე მუდმივმა მექანიკურმა ზემოქმედებამ;
- კანის იმ უბნის არასწორმა მოვლამ, სადაც კეთილთვისებიანი ახალწარმონაქმნია.
პაპილომის მოშორება
ფერშეცვლილი პაპილომის მოშორებამდე პაციენტმა უნდა ჩაიტაროს კომპლექსური კვლევა, რომლის მიზანიც ავთვისებიანად ქცევის ნიშნების გამოვლენაა. შემდეგ მას დაუნიშნავენ ქირურგიულ პროცედურას.
ლაზერული ქირურგია - ეს მეთოდი ყველაზე მეტად შედეგიანია. პაციენტი არ გრძნობს ტკივილს და ქირურგიული მანიპულაცია ტარდება ანესთეზიის გარეშე.
მოშორების შემდეგ პაპილომის ადგილზე წარმოიქმნება მცირე ზომის ჭრილობა, რომელიც რამდენიმე დღეში უკვალოდ ქრება. ლაზერული თერაპიის ერთ-ერთი უპირატესობა ურეციდივობაა.
კრიოდესტრუქცია - პაპილომაზე ზემოქმედება ხდება თხევადი აზოტით, რომლის ტემპერატურა -196 გრადუსია. რამდენიმე დღეში პაპილომავირუსული წარმონაქმნი შორდება.
კრიოდესტრუქციის გვერდითი ეფექტი ჯანსაღი კანის საფარველის დაზიანებაა. ამის მიზეზია ის, რომ ექიმი ვერ აკონტროლებს გაყინვის პროცესს და თხევადი აზოტი ღრმად ხვდება.
ელექტროკოაგულაციის მეთოდი - ქირურგიული მანიპულაციისას პაპილომავირუსულ ახალწარმონაქმნზე ელექტრული დენით ზემოქმედებენ. ელექტროკოაგულაციის წინ პაციენტებს უკეთებენ ტკივილგამაყუჩებელ პრეპარატებს, პროცედურის დროს არსებული დისკომფორტი რომ მაქსიმალურად შემცირდეს.
რადიოქირურგია - როდესაც პაპილომა შავდება, მას რადიოდანის საშუალებით აშორებენ. ამ მეთოდის უპირატესობა ქირურგიული პროცედურის სისწრაფეა, რომლის დროსაც პრაქტიკულად არ ეხებიან ჯანსაღ ქსოვილს.
ჩვეულებრივი ამოკვეთა - იშვიათად პაპილომავირუსულ ახალწარმონაქმნს ტრადიციული გზით, ქირურგიულად მკურნალობენ. მისი უარყოფითი მხარეებია მტკივნეულობა, ხანგრძლივი რეაბილიტაციის პერიოდი და ოპერაციის შემდგომი ნაწიბურის გაჩენა.
პროფილაქტიკა - კეთილთვისებიანი ახალწარმონაქმნების კანზე გაჩენის პროფილაქტიკისათვის მეტი ყურადღებაა საჭირო ჯანმრთელობისადმი. პაპილომავირუსული ინფექციით დასნებოვნების არიდება ძალიან ძნელია, თუმცა ინფიცირების რისკის მინიმიზება შესაძლებელია:
- უკუაგდეთ მავნე ჩვევები - თამბაქო, ალკოჰოლი და ნარკოტიკული საშუალებები;
- შეძლებისდაგვარად აირიდეთ სტრესული სიტუაციები;
- ჯანსაღი, დაბალანსებული კვებით;
- ფიზიკური ვარჯიშით;
- რეგულარული სამედიცინო-პროფილაქტიკური კვლევების ჩატარებით;
- შემთხვევითი სქესობრივი კავშირის არიდებით;
- საპირფარეშოთი სარგებლობის შემდეგ ხელების საპნით დაბანით.
კანზე ნებისმიერი გამონაყარის გაჩენისას ნუ დაიწყებთ თვითმკურნალობას, ამან შეიძლება საშიში შედეგები გამოიღოს.