21 მარტს დაუნის სინდრომის მქონე ადამიანთა დღე აღინიშნება
სინდრომის თემისადმი მიძღვნილი VI სიმპოზიუმის მონაწილეთა ინიციატივით, კალენდარში 2006 წლიდანაა შესული. 21 მარტი შემთხვევით არ შეირჩა. ეს არის თავად დაუნის სინდრომის აღმნიშვნელი სიმბოლო, რომლის მიზეზსაც წარმოადგენს ერთ-ერთი ქრომოსომის ტრისომია: დაუნის სინდრომის მქონე ადამიანს 21-ე ქრომოსომა ნაცვლად ორისა აქვს სამი, რაც "კალენდრის ენაზე" გამოვიდა მესამე თვის, 21 რიცხვი.
ინგლისელმა ექიმმა ჯონ ლეგდონ დაუნმა(JohnLangdonDown, 1828-1896) 1862 წელს პირველად აღწერა სინდრომი, რომელსაც მოგვიანებით მისი სახელი ეწოდა. თანდაყოლილ სინდრომსა და ქრომოსომათა რაოდენობას შორის კავშირი 1959 წელს გამოავლინა ფრანგმა გენეტიკოსმა ჟერომ ლეჟენმა (JérômeLejeune, 1926-1994). საინტერესოა, რომ სინდრომის აღმომჩენმა მას "მონღოლიზმი" უწოდა, თუმცა ჯანდაცვის მსოფლიო ორგანიზაციამ ეს დასახელება 1965 წელს გააუქმა მონღოლეთის სპეციალისტების მიმართვის შემდეგ.
დაუნის სინდრომისთვის დამახასიათებელია ფიზიოლოგიური თავისებურებების გარკვეული ნაკრები: "ბრტყელი სახე", კისრის ნაოჭი, კუნთური ჰიპოტონია და სხვ. ამგვარი სინდრომის ადამიანი თანატოლებთან შედარებით ნელა ვითარდება, თუმცა ამ ბავშვებს სრულად შეუძლიათ აითვისონ თავის მოვლის ჩვევები და უფრო რთული უნარებიც.
ამ დღეს მსოფლიოს მრავალ ქვეყანაში ტარდება სხვადასხვა საქველმოქმედო და საგანმანათლებლო აქციები, ღონისძიებები, კონფერენციები და სემინარები.