ძილში საუბარი - არის თუ არა ეს ფსიქიკური პრობლემა
06.11.2017
სომნოლოკია - ასე ჰქვია ლათინურად ძილში ლაპარაკს. არსებობს რამდენიმე თეორია, რომელიც ამ მოვლენის ახსნას
ცდილობს. ერთ-ერთის თანახმად, ძილის დროს ასეთი აქტიურობა გადატანილი სტრესის (არა მაინც და მაინც უარყოფითის) შედეგია. თუ ადამიანს ძილში ლაპარაკის გარდა არავითარი სხვა ნევროზული რეაქცია არ აღენიშნება, მკურნალობა საჭირო არ არის.
ძილში ლაპარაკი შესაძლოა ნერვული სისტემის პათოლოგიის ნიშანი იყოს. ამ შემთხვევაში მას თან უნდა ახლდეს სხვა სიმპტომებიც. ნევროპათოლოგთან ვიზიტი საჭიროა მაშინ, თუ ადამიანს ძილში ლაპარაკის დროს აქვს შემდეგი სიმპტომები:
- სახე უწითლდება;
- მეტისმეტად ოფლიანდება, უძლიერდება ნერწყვდენა;
- ხედავს კოშმარებს, ყვირის;
- აქვს მოხრჩობის შეტევები;
- აკრაჭუნებს კბილებს;
- მთვარეულივით დადის სახლში;
- ახალგაღვიძებული დიდხანს ვერ მოდის გონს, გამოფხიზლება უჭირს;
- გონს მოსვლის შემდეგ ცნობიერება არეული აქვს.
ნევროპათოლოგთან მისვლამდე დააკვირდით:
- რამდენად ხშირად ლაპარაკობს ძილში ადამიანი;
- სიტყვებს, ფრაზებს წარმოთქვამს თუ გრძელ ამბებს ჰყვება;
- აკვიატებული ხომ არ აქვს ერთი და იგივე თემა;
- გარკვევით ლაპარაკობს თუ არა;
- რაზეც ძილში ლაპარაკობს, ნამდვილად მოხდა თუ მისი ფანტაზიის ნაყოფია.
თქვენი პასუხები ექიმს დიაგნოზის დასმაში დაეხმარება.
