რატომ გვიბუჟდება ხელები - მკურნალი.გე

რუბრიკები

ოჯახის მკურნალის ანონსი

მაისი 2021

რატომ გვიბუჟდება ხელები

რატომ გვიბუჟდება ხელები

მტევნების დაბუჟება და მგრძნობელობის შეცვლა ზოგჯერ დაავადების ნიშანია. ამ დაავადებათა შორის

განსაკუთრებით საყურადღებოა პათოლოგიები, რომლებსაც სისხლის მიმოქცევისა და ინერვაციის დარღვევა სდევს თან. ამ დროს ექიმის დროული კონსულტაცია აუცილებელია - თვითმკურნალობამ შესაძლოა კლინიკური სურათი წაშალოს და დაავადების ამოცნობა გაართულოს.
კიდურის დაბუჟება ხშირად ნერვზე ხანმოკლე ზეწოლის შედეგია.

 

ამ შემთხვევაში ეს სიმპტომი საშიში არ არის. საკმარისია, კიდურს მდგომარეობა შევუცვალოთ, რომ ნერვის ფუნქცია აღდგება და უსიამოვნო შეგრძნებები გაივლის. კიდევ რის ნიშანი შეიძლება იყოს ხელის უეცარი დაბუჟება? ამ და სხვა კითხვებზე მოგვიგებს აკად. ნ. ყიფშიძის სახელობის ცენტრალური

საუნივერსიტეტო კლინიკის ექიმი-ნევროლოგი, მედიცინის დოქტორი ია რუხაძე.


- ხელებში მაგისტრალური ნერვები გადის. განსაზღვრულ მდგომარეობაში ისინი ირგვლივ არსებული რბილი ქსოვილების ზეწოლას განიცდის, რაც პარესთეზიას - ხელებში ჩხვლეტის, ჭიანჭველების ცოცვის, სიცივის შეგრძნებას იწვევს. ეს შეგრძნება, გარდა იმისა, რომ დისკომფორტს გვაყენებს და ხელს უშლის საქმიანობას, შესაძლოა სერიოზული დაავადების

ნიშანიც აღმოჩნდეს, ამიტომ უმჯობესია, პირველი გამოვლინებისთანავე მივაქციოთ ყურადღება.

დაბუჟების ყველაზე ხშირი მიზეზია განსაზღვრული ცხოვრების წესი, უფრო სწორად, საქმიანობა, რომელიც ხელების ერთ პოზიციაში ხანგრძლივად გაჩერებას მოითხოვს. იმისათვის, რომ მკურნალობა დაიწყოს, ექიმმა ზუსტად უნდა იცოდეს, რამ გამოიწვია დაბუჟება: კისრის ოსტეოქონდროზმა თუ ნერვზე ზეწოლამ. კარპული გვირაბული სინდრომი, როგორც დაავადება, XIX საუკუნის 80-იან წლებამდე თითქმის უცნობი იყო. კომპიუტერული ტექნოლოგიების გავრცელებასთან ერთად ეს სინდრომიც გახშირდა. კომპიუტერზე ყოველდღიური ხანგრძლივი ბეჭდვა მისი ერთ-ერთი მიზეზია. პათოლოგია ასევე ხშირად გვხვდება მკერავებს, მუსიკოსებს, მემანქანეებს, მღებავებსა და სხვა ისეთი პროფესიის ადამიანებს შორის, რომლებსაც მთელი სამუშაო დღის განმავლობაში ხელის მტევნით ერთი და იმავე მოძრაობის შესრულება უხდებათ.


- როგორ ვითარდება კარპული გვირაბული სინდრომი?

- მყესების მჭიდრო კონები, რომლებსაც თითები მოძრაობაში მოჰყავს, ვიწრო კარპულ არხში გადის. ამავე არხში გადის ნერვი, რომელიც აკონტროლებს ცერის კუნთს და ხელისგულის, ცერა, საჩვენებელი და შუა თითების მგრძნობელობას. ჩვეულებრივ, ეს ნერვი დაცულია. როდესაც მტევანი მეტისმეტად ინტენსიურად მუშაობს, მყესები შუპდება, ნერვი მკვეთრად იჭიმება, რასაც მოჰყვება დაბუჟება, ჩხვლეტა და თითების მოპულსირე ტკივილი. ეს სიმპტომები განსაკუთრებით მწვავდება ღამით და დილით. შორს წასულ შემთხვევებში ვითარდება ცერის კუნთის ატროფია.

ადამიანი კარგავს ამ თითის მოხრის უნარს, უჭირს მუშტის შეკვრა. ზოგი იძულებულია, პროფესია შეიცვალოს. ქალები ორჯერ უფრო ხშირად ავადდებიან, ვიდრე მამაკაცები. ავადმყოფთა საშუალო ასაკი 40-60 წელია. გამოკვლევებმა აჩვენა, რომ კარპული გვირაბული სინდრომის განვითარება ნაწილობრივ B6 ვიტამინის დეფიციტსაც უკავშირდება. ცილით მდიდარი საკვები, ასევე - ზოგიერთი ნივთიერება (მაგალითად, თარტრაზინი, რომელსაც შეიცავს თმის საღებავი), ორგანიზმში ვიტამინ B6-ის შენარჩუნების უნარს ამცირებს. ამ ვიტამინის ორგანიზმიდან გამოდევნას ასევე ხელს უწყობს კორტიკოსტეროიდებისა და ჩასახვის საწინააღმდეგო ჰორმონული აბების მიღება.

ხელების დაბუჟება შესაძლოა გამოიწვიოს დაკბილული კუნთების სპაზმმა, სპაზმის მიზეზი კი შესაძლოა იყოს კუნთის გადაღლა, სიმძიმის გადატანა, კისრის დიდხანს ჭერა უხერხულ პოზიციაში (ტელეფონით საუბრისას, მწოლიარე მდგომარეობაში კითხვისას, ტელევიზორის ყურებისას), შეუკავებელი ხველა, კისრის მალების ოსტეოქონდროზი. ხელების დაბუჟებას იწვევს ასევე სხვადასხვა ნევროლოგიური, ენდოკრინული, ანგიოლოგიური პათოლოგია, ტრავმული დაზიანება, დამწვრობა.


- რაკი ენდოკრინული პათოლოგიები ახსენეთ, იქნებ ამაზე უფრო ვრცლად გვესაუბროთ...

- ენდოკრინული პათოლოგიის ფონზე განვითარებული ხელების დაბუჟება საკმაოდ ხშირია. ისეთი ფართოდ გავრცელებული დაავადებები, როგორიც არის შაქრიანი დიაბეტი და ჰიპოთირეოზი, იწვევს როგორც ცალკეული ნერვული ღეროების, ასევე პერიფერიული ნერვული ბოჭკოების მრავლობით დაზიანებას. კლინიკური სიმპტომატიკა ძირითადი დაავადების სიმძიმეზეა დამოკიდებული. შაქრიანი დიაბეტის დროს ხელების დაბუჟება პერიფერიული ნეიროპათიული სინდრომის ერთ-ერთ პირველ სიმპტომს წარმოადგენს. დიაბეტურ პოლინეიროპათიას ახასიათებს მძიმე და პროგრესირებადი მიმდინარეობა, მოითხოვს დროულ მკურნალობას და დინამიკაში მეთვალყურეობას ელექტრონეირომიოგრაფიული მაჩვენებლების კონტროლით.


- აქვს თუ არა მნიშვნელობა დღე-ღამის მონაკვეთს?

- ღამით ხელების დაბუჟება ნევროლოგიურ პრაქტიკაში საკმაოდ ხშირია. ცნობილია ამ ფენომენის სხვადასხვა მექანიზმი: კომპრესიული, კომპრესიულ-იშემიური, ლიმფოსტაზური, სისხლძარღვოვანი, ვეგეტატიური ნერვული სისტემის დისფუნქციით განპირობებული. კლინიკური სურათი მრავალფეროვანია და კომპრესიის გამომწვევ კუნთზეა დამოკიდებული. მაგალითად, ღამის პარესთეზიები შუა დაკბილული კუნთის სინდრომს ახასიათებს. ამ დროს საქმე გვაქვს მხრის ნერვულ წნულზე მეზობლად მდებარე კუნთის ზეწოლასთან, რაც მის დისფუნქციას იწვევს.

თერაპევტები და ნევროლოგები ამ ჩივილს ზოგჯერ სათანადო ყურადღებას არ აქცევენ ან იწყებენ ანთების საწინააღმდეგო და სისხლძარღვოვან თერაპიას ფიზიოპროცედურებთან ერთად, რაც ხშირად უეფექტო აღმოჩნდება ხოლმე. ღამის დაბუჟების მიზეზად შესაძლოა იქცეს კარპული გვირაბული სინდრომიც. ამ დროს დაბუჟება მაქსიმალურია დილით (შესაძლოა, ერთვოდეს ტკივილიც), დღის განმავლობაში კი შედარებით სუსტდება.


- რატომ არის დილაობით უფრო შესამჩნევი ხელების დაბუჟება?

- ეს ზოგჯერ განპირობებულია საწოლში სხეულის უხერხული პოზიციით. მაგალითად, თუ გვერდზე გძინავთ და ხელი თავქვეშ გაქვთ ამოდებული, იგრძნობთ ხელის მტევნის დაბუჟებას. პოზიციის შეცვლის შემდეგ საჭიროა რამდენიმე წუთი, რომ დაბუჟებამ გაიაროს. ზოგჯერ კი მიზეზი ართრიტია - დილით, ზოგადი შებოჭილობის ფონზე, შესაძლოა განვითარდეს დაბუჟება, რომელიც თანდათანობით გაივლის.


- ხერხემლის რომელი ნაწილის პათოლოგიური პროცესი იწვევს დაბუჟებას?

- ხელების დაბუჟება უპირატესად ხერხემლის სვეტის კისრის ნაწილის ოსტეოქონდროზული ხასიათის ცვლილებებს უკავშირდება. კისრის ოსტეოქონდროზის დროს აღმოცენდება მოვლითი, მწველი ტკივილი კისრის უკანა და გვერდით ნაწილებში, კეფაში, მხრისა და ბეჭის არეებში. ჭირს კისრის მოძრაობა.
ხშირად დაბუჟება ღამით ვითარდება და დილამდე რამდენჯერმე აღვიძებს ადამიანს. არცთუ იშვიათად ეს მდგომარეობა შეუღლებულია მომატებულ აგზნებადობასა და დეპრესიასთან. ასეთი ადამიანები ძნელად ეგუებიან ამინდის ცვალებადობას. შესაძლოა, ამას დაერთოს თავის ტკივილი ან ტკივილი გულის არეში, რომელიც ძალიან ჰგავს სტენოკარდიულ ტკივილს.


- სტენოკარდია ახსენეთ. შეიძლება თუ არა, კარდიოლოგიურმა პათოლოგიამ ზედა კიდურის დაბუჟება გამოიწვიოს?

- სტენოკარდიული შეტევა არცთუ იშვიათად მართლაც იწვევს დაბუჟების შეგრძნებას მარცხენა ხელში. ზოგჯერ ამას თან სდევს სხვა კლინიკური სიმპტომებიც. თავის მხრივ, კისრის ოსტეოქონდროზის დროს ხელების ტკივილი და დაბუჟება შესაძლოა სტენოკარდიას ჰგავდეს. ამ დროს პირველ რიგში სტენოკარდიული შეტევა უნდა გამოვრიცხოთ.


- შესაძლოა თუ არა ოპერაციის შემდგომ ხელების დაბუჟება?

- ოპერაციის შემდგომ ხელების დაბუჟება ზოგჯერ ვერტებროგენულ პათოლოგიებს უკავშირდება, ზოგჯერ კი ხერხემლის სვეტის კისრის არეში ან ნერვული ღეროების ახლოს მდებარე ქსოვილებზე ოპერაციული ჩარევის შემდეგ იჩენს თავს. ასეთ დროს დამატებითი პარაკლინიკური (ელექტრონეირომიოგრაფიული, მაგნიტურ-რეზონანსული და სხვა) გამოკვლევების საფუძველზე შესაძლოა ზუსტად შეფასდეს დაბუჟების მიზეზი და გადაწყდეს ადეკვატური მკურნალობის საკითხი.


- შეიძლება თუ არა, ეს მოვლენა ტრავმამ გამოიწვიოს?

- რა თქმა უნდა. როგორც პერიფერიული, ასევე ცენტრალური ნერვული ბოჭკოების ტრავმული დაზია-ნება შესაძლოა ამა თუ იმ ლოკალიზაციის დაბუჟების მიზეზად იქცეს. ასეთ შემთხვევაში დაბუჟება უპი-რატესად ცალმხრივია. დაბუჟება შესაძლოა გამოიწვიოს აგრეთვე ზურგისა და თავის ტვინის ამა თუ იმ ხასიათის (დისჰემიურმა, ინტოქსიკაციურმა, დისმეტაბოლურმა, ტრავმულმა, სიმსივნურმა) დაზია-ნებამ. ნებისმიერ შემთხვევაში, დაბუჟება, როგორც კლინიკური სიმპტომი, განიხილება საერთო კლინიკურ სიმპტომოკომპლექსთან მიმართებით და ზუსტ დიაგნოსტიკას მოითხოვს.


- კოლაგენური დაავადებებიდან რომელი იწვევს დაბუჟებას?

- წითელი მგლურასა და კვანძოვანი პერიარტერიიტის შემთხვევაში საკმაოდ ხშირად ზიანდება პერიფე-რიული და ცენტრალური ნეირონები. კლინიკური გამოვლინება დაზიანების ტიპსა (მონონევრიტულია თუ პოლინევრიტული) და ხარისხზეა დამოკიდებული.



გააკეთეთ კომენტარი
თარიღი : 08-02-2021
თამო
დალიეთ ბ 6, (ერთი თვე მაინც მერე დაისვენეთ) აფთიაქში შეიძინეთ ხელის ელასტიური სარტყელი და ღამე შეიხვიეთ ხელი, დილით ყველა თითს ჩაუტარეთ მასაჟი, იგრძნობთ შვებას
თარიღი : 08-04-2020
ელენე
მაქვს ხელების დაბუჟება განსაკუთრებით მარჯვენა,მიბუჟდება საშინელ ტკივილამდე ღამე. ვცურავდი და შეღავათი მქონად, ეხალა შექმნილი სიტუაციიდან ვერ ვახერხებ. რას მირჩევთ რა გავაკეთო რომ შემიმსუბუქდეს მდგომარეობა?
თარიღი : 08-04-2020
ელენე
სალამი, როდესავ ხელებ ერთი და იგივე მდგომარეობაში გავაჩერებ მომენტალურად მეწყება დაბუჟება, განსაკუთრებით მარჯვენა ხელი, (მდგ. ტელეფონზე საუბრის დროს, საჭეზე ვცვლი ხელს ხან ერთით მიჭირავს ხან მეორეთი). დილით მაღვიძებს დაბუჟებისგან ხელის ტკივილი. სამი თვე ვცურავდი და შეღავათი მქონდა, ეხლა მეორე თვეა არსებული მდგომარეობიდან გამომდინარე შევწყვიტე და მდგომარეობა ძალიან გამირთულდა.თუ შეილება რომ მომცეთ რეკომენდაციები როგორ მოვიქცე დღევანდელ დღეს. ვისგან შეიძლება მივიღო რჩევები დისტანციურად. მადლობა წინასწარ.
თარიღი : 27-05-2019
მზია
ერთი კვირაა დღე და ღამე სულ დაბუჟებული მაქვს მარცხენა ხელის ნეკა თითი.ძალიან გამოხატულად არაფერი მაწუხებს.რას მირჩევთ?
თარიღი : 10-10-2018
დიმიტრი
გამარჯობათ. შეწუხებით არ მაწუხებს, მაგრამ ხშირად მაქვს ღამით ხელების დაბუჟება. ძირითადად ერთი ხელი, მთლიანად ისე მიბუჟდება რომ საერთოდ ვერ ვგრძნობ, თან სულ გაყინულია მაგ დროს. პირველად რო დამემართა ძალიან შემეშინდა წლების წინ, მერე მეორე ხელით ვუცვლი მდგომარეობას ვამოძრავებ ,ვზელ და მიბრუნდება მგრდძნობელობაც და გაბუჟებაც გადის
მსგავსი სიახლეები
დიაბეტის განვითარების რისკებსა და პრედიაბეტზე გვესაუბრება ვაჟაივერიელის სახელობის ენდოკრინოლოგია-მეტაბოლოგია-დიეტოლოგიის ცენტრ
16-02-2021
ერთ თვეში ახალი წელია! ყველაზე ჯადოსნური და ძალიან კეთილი დღესასწაული, როდესაც ყველაზე მეტად გინდა, გაუკეთო დაუვიწყარი საჩუქრები შენთვის ყველაზე ახლობელ ადამიანებს. ახალი წლის ღამეს ოცნებები სრულდება! ამიტომ, საჩუქრების შერჩევა საკმაოდ დიდ ძალისხმევას და ყურადღებას მოითხოვს.
17-12-2020
კორონავირუსის შემთხვევათა თითქმის ნახევარი შეიძლება უსიმპტომოდ მიმდინარეობდეს.
02-06-2020
დიეტოლოგია
2020 წელს არაერთი კვლევა ჩატარდა და დადგინდა, რომ ზოგიერთი პრობიოტიკი, სასარგებლო ბაქტერია, ორგანიზმს წონის კლებაში ეხმარება.
გერმანიის რისკების შემფასებელმა ფედერალურმა ინსტიტუტმა გაანალიზა 36 ვეგანისა და 36 პირის (იღებდნენ შერეულ საკვებს) ძვლების მდგომარეობა.
ბირმინგემის უნივერსიტეტის მეცნიერები, სტრესის გადატანისას, გვირჩევენ კაკაოს დალევას
კატეგორიის სხვა სტატიები
დეპრესიით დაავადებულის ტვინში დადასტურებულ იქნა ექსუდაციური ანთებითი პროცესი, რაც, სავარაუდოდ, იმაზე მიუთითებს,
ბრიტანელმა ექსპერტებმა შეადგინეს სიმპტომების სია, რომელიც ორგანიზმის გამოფიტვაზე მეტყველებს.
ტერმინი “ქალაშიდა წნევა” ალბათ ყველას გაუგონია, მაგრამ მხოლოდ ერთეულებს თუ ეცოდინებათ, რას ნიშნავს ის.
რომელ პროდუქტებს შეუძლია მეხსიერების გაუმჯობესება და ტვინის დაბერების პროცესის შეჩერება?
თავის ტკივილი მოსახლეობაში ერთ-ერთი გავრცელებული სიმპტომია.
ერტებრო-ბაზილარული არტერიული სინდრომი წარმოადგენს პათოლოგიურ სიმპტომოკომპლექსს, რომელიც თავის ტვინის ფუნქციონირებაზე
„სმარტფარმთან“ ინეტერვიუში ალერგიულ რინიტზე საუბრობს ბაია ბეზარაშვილი - ალერგოლოგ-იმუნოლოგი, მედიცინის მეცნიერებათა დოქტორი, პროფესორი.
ისრაელში მასობრივი ვაქცინაცია დეკემბრის ბოლოდან დაიწყო. ვნახოთ, რა გვაჩვენა
Los Angeles Lakers-ის ერთ-ერთი მფლობელი, ექიმი პატრიკ სუნ-შიონგი მუშაობს კორონავირუსის საწინააღმდეგო ორალურ ვაქცინაზე,
ზოგიერთი პროდუქტი, რომელზეც არის ობის სოკო, განსაკუთრებით საშიშია.
+
გახდი რეკომენდებული ექიმი
თუ გსურთ ერთის გარდა რამოდენიმე კლინიკის მითითება დააწექით ღილაკს.
მკურნალის რედაქცია დაგიკავშირდებათ ტექნიკური დეტალების შესათანხმებლად
+
გახდი რეკომენდებული კლინიკა
თუ გსურთ ერთის გარდა რამოდენიმე კლინიკის მითითება დააწექით ღილაკს.
მკურნალის რედაქცია დაგიკავშირდებათ ტექნიკური დეტალების შესათანხმებლად
+
შეტყობინება წარმატებით გაიგზავნა !
მკურნალის რედაქცია დაგიკავშირდებათ ტექნიკური დეტალების შესათანხმებლად