ფსიქოლოგიური დახმარება
თუმცა ალბათ მაინც ღირს უფროსების აზრის გათვალისწინება. შენს ასაკში ადამიანი ხშირად უშვებს შეცდომას, ის არ არის მომწიფებული სერიოზული ურთიერთობისთვის, მით უმეტეს - ოჯახის შექმნისთვის. ასე რომ, ნუ იჩქარებ სერიოზული ნაბიჯის გადადგმას, კიდევ გამოსცადე საკუთარი გრძნობა, შეისწავლე შენი შეყვარებულის ხასიათი. ნერვიულობა და მშობლებთან ჩხუბი კი საჭირო არ არის, მათ შენთვის მხოლოდ კარგი უნდათ.
ოთხი თვეა, ვხვდები ერთ ბიჭს. ძალიან კარგი ადამიანია, არაჩვეულებრივად მეპყრობა, მაგრამ... არ ვარ დარწმუნებული, რომ ვუყვარვარ. იქნებ მირჩიოთ, როგორ შევამოწმო ეს. ძალიან მინდა, ყველაფერი გარკვეული იყოს. ანა, 17 წლის
რაში გჭირდებათ ამის საგანგებოდ შემოწმება? თქვენ ხომ არც ისე დიდი ხანია ხვდებით ერთმანეთს. ასეთ მოკლე ხანში საკუთარ (მით უმეტეს, სხვის) გრძნობებში გარკვევა ძნელია. ასე რომ, ნუ დააჩქარებთ მოვლენებს. დრო მოვა და იგრძნობთ, რას განიცდის ეს ახალგაზრდა თქვენს მიმართ. მანამდე კი ჯობს ის გაარკვიოთ, რას განიცდით თავად ან რას მოიაზრებთ სიტყვაში `სიყვარული~ - სხვადასხვა ადამიანი ხომ ამ ცნებაში სხვადასხვა შინაარსს დებს. ნურც იმას დაივიწყებთ, რომ მამაკაცები გრძნობებს ხშირად არა სიტყვით, არამედ საქმით გამოხატავენ. ამბობთ, რომ ეს ახალგაზრდა ძალიან კარგად გეპყრობათ. იქნებ სწორედ ეს არის პასუხი თქვენს კითხვაზე? ყოველ შემთხვევაში, ჯერჯერობით...
ვერაფრით ამიხსნია, რა ხდება ჩემს თავს. ადრე, როცა რაიმე უსიამოვნება შემხვდებოდა, რჩევისთვის მეგობარ გოგონებს მივმართავდი, ახლა კი ყველაზე უკეთ მაშინ ვგრძნობ თავს, როცა მარტო ვარ. არ ვიცი, რატომ გამიჩნდა მარტოობის სურვილი. იქნებ საჭიროა, ფსიქოლოგს მივმართო? მარიამი, 23 წლის
მღელვარებისა და შფოთვის საფუძველი არ გაქვთ. თქვენ ცხოვრებისეულ გამოცდილებას აგროვებთ, ამიტომაც უფრო იშვიათად მიმართავთ მეგობრებს რჩევისთვის. გაიხსენეთ, რამდენად მნიშვნელოვანი იყო თქვენთვის თანატოლების აზრი გარდატეხის ასაკში და როგორ კარგავდა ის მნიშვნელობას თანდათანობით. და აი, დადგა დრო, როდესაც მიხვდით, რომ ადამიანმა საკუთარი პრობლემები თვითონვე უნდა მოაგვაროს, რადგან თქვენს ნაცვლად თქვენი ცხოვრებით ვერავინ იცხოვრებს.
ვარ ნორმალური, სიმპათიური ბიჭი. დიდი ხანია, ვმეგობრობ ერთ გოგონასთან. მართლა კარგი მეგობრები ვიყავით, მაგრამ მე ის შემიყვარდა და სიყვარულში გამოვუტყდი. მან დიდხანს იცინა. დავიბენი და ვუთხარი, რომ ვეხუმრე. ამან გააბრაზა და დამშორდა. ახლა ძალიან ცუდად ვარ, მე ის მართლა მიყვარს, მაგრამ არ ვიცი, როგორ დავარწმუნო ამაში. ლევანი, 17 წლის
ხშირად ხდება, რომ მოზარდების მეგობრობა უფრო სერიოზულ გრძნობაში გადაიზრდება ხოლმე. თქვენი მეგობრის საქციელი გასაგებია - თქვენ ის ნამდვილად დააბნიეთ: ჯერ სიყვარული აუხსენით, მერე კი უთხარით, რომ ეხუმრეთ. თქვენ მისი ნდობა დაკარგეთ, მაგრამ შეცდომის გამოსწორება ჯერ კიდევ შეიძლება: დაუკავშირდით და უთხარით, რომ მასთან საუბარი გსურთ. ყველაფერი მშვიდად და გარკვევით აუხსენით. იქნებ მასაც აქვს თქვენს მიმართ გრძნობა. გოგონასა და ვაჟის მეგობრობა რომ სიყვარულში გადაიზარდოს, ამაში უცნაური არაფერია.