ფსიქოლოგიური დახმარება
მაგრამ მალე აღმოჩნდა, რომ დატვირთვას თავს ვერ ართმევდა. მინდა, შვილი ჩვეულებრივ, საჯარო სკოლაში გადავიყვანო, მაგრამ ვშიშობ, ამით ჩემი ყოფილი ქმრის მამა არ გავანაწყენო - მისი დახმარების გარეშე გამიჭირდება. როგორ მოვიქცე? ელენე
თვით ფაქტი თქვენი გოგონას კერძო სკოლაში მიყვანისა იმის მაჩვენებელია, რომ თქვენი ექსმამამთილის საჩუქრისადმი უპატივცემულობა არ გამოგიჩენიათ, ახლა კი სკოლის გამოცვლის თაობაზე უნდა გაესაუბროთ.
ბაბუას ნამდვილად არ გაახარებს იმის გაგება, რომ მისი შვილიშვილი მუდმივ სტრესშია. თუ ყოფილი მამამთილი თქვენს არგუმენტებსა და ბავშვის აზრს მოისმენს, ალბათ არ გაგიბრაზდებათ. თუ მას უყვარს შვილიშვილი, სასწორის სხვადასხვა მხარეს არ დადებს ბავშვის სულიერ მდგომარეობასა და საკუთარ ამბიციას. ასეც რომ იყოს, დაფიქრდით, რა უფრო მნიშვნელოვანია თქვენთვის - დახმარება, რომელსაც ყოფილი მამათილი გიწევთ თუ თქვენი შვილის სულიერი წონასწორობა და ნორმალური განვითარება.
სამსახურში ახალი ხელმძღვანელი დაგვინიშნეს, რომელმაც მთელ განყოფილებას ცხოვრება გაგვიმწარა. უპირველეს ყოვლისა, განკარგულება გასცა, ოფისიდან მოგვეშორებინა მაგიდა, რომელთანაც თანამშრომლები ვსაუზმობდით, ვსადილობდით, ჩაის ან ყავის დასალევად ვიკრიბებოდით - გვირჩია, კაფეში გვევლო, მაგრამ კაფეში სადილობა ძვირი ჯდება! გვინდოდა, მისთვის ზემდგომ ხელმძღვანელთან გვეჩივლა, მაგრამ გადავწყვიტეთ, რომ ეს ლამაზი არ იქნებოდა. აღარ ვიცით, რა გზას დავადგეთ. ლიკა
თქვენ სწორად მოიქეცით, რომ ახალ უფროსს ზემდგომ ხელმძღვანელობასთან არ უჩივლეთ. ამ პრობლემის მოგვარება საჩივრის გარეშეც შეიძლება. თუ თქვენს კოლეგებს ხელს არ აძლევთ ახალი ხელმძღვანელის მიერ შემოღებული წესები, შეგიძლიათ, ერთად გამოხატოთ თქვენი უკმაყოფილება. ახალი უფროსის რისხვისა ნუ შეგეშინდებათ - თქვენ ჯარში კი არ მსახურობთ, სადაც ბრძანება განხილვას არ ექვემდებარება, არამედ ოფისში, სადაც ახალ ხელმძღვანელზე მეტი გიმუშავიათ, ამიტომ გაქვთ უფლება, მონაწილეობა მიიღოთ ისეთი საკითხების გადაწყვეტაში, რომლებიც შრომის პირობების ორგანიზაციას ეხება.
გაარკვიეთ, რატომ აღიზიანებს უფროსს სასადილო მაგიდა, შეარჩიეთ ადგილი, სადაც ის თვალში არავის მოხვდება. შესაძლოა, ახალ უფროსს არც სურს თანამშრომლების შეზღუდვა, უბრალოდ ვერ ხვდება, რა განსხვავებაა, ოფისში ისადილებთ თუ კაფეში, შეგიძლიათ, ხელმძღვანელს გადაკვრით მიანიშნოთ, რომ თუ ოფისიდან სასადილოდ გახვალთ, შესაძლოა სამსახურში დაგაგვიანდეთ.
ჩემი მეგობარი თხოვდება. მისი რჩეული უზრუნველყოფილი მამაკაცია. ცოტა ხნის წინ მე და ჩემი მეგობარი ერთად ვცხოვრობდით ნაქირავებ ბინაში, ახლა კი მას ყველაფერი აქვს: ბინაც, მანქანაც, აგარაკიც... ჩემდამი მისი დამოკიდებულება არ შეცვლილა - ძველებურად თბილი და ყურადღებიანია, მე კი ვერაფრით დავძლიე შური... ანანო
როგორც ჩანს, მისი რჩეული თქვენი მეგობრის თბილმა, ალერსიანმა ბუნებამაც მოხიბლა. შეეცადეთ, თქვენი ეჭვიანობა პირად ფრონტზე ასეთივე წარმატების მოპოვებისკენ სწრაფვად აქციოთ. რაც უფრო გულწრფელი და თბილი ურთიერთობა გექნებათ თქვენს მეგობართან, მით უფრო მეტი შანსი გაქვთ, გაიცნოთ მისი მეუღლის მეგობრები და შესაძლოა, მათ შორის ღირსეული თაყვანისმცემელიც იპოვოთ.
ძალიან დამღალა გრძელმა თმამ, მაგრამ ქმრის ხათრით არ ვიჭრი. ახლახან პარიკმახერმა მითხრა, რომ ჩემი თავის კანი მკურნალობას მოითხოვს, კარგი იქნება, თუ თმას მოკლედ შევიჭრი და საჭირო პროცედურების კურსს ჩავიტარებ. ჩემს ქმარს კი ამის გაგონებაც არ უნდა - მას მიაჩნია, რომ მოკლე თმა დამაუშნოებს. როგორ მოვიქცე? დადუნა
თქვენი თმის გამო თქვენს ქმარსა და პარიკმახერს შორის ნამდვილი ომი გაჩაღებულა, თქვენ კი პასიური დამკვირვებლის როლში ხართ. როგორც ჩანს, მეტისმეტად დიდ მნიშვნელობას ანიჭებთ სხვის აზრს და ძალა არ გყოფნით საიმისოდ, რომ საკუთარი პოზიცია შეიმუშაოთ.
გაწუხებთ თუ არა თავის კანის პრობლემა? ამჩნევთ თუ არა თქვენ თვითონ თმის მდგომარეობის გაუარესებას? პარიკმახერს ხელს აძლევს, თმის შეჭრასა და სამკურნალო პროცედურების ჩატარებაზე დაგიყოლიოთ, ქმარს კი არ სურს შეეგუოს ცოლის ახალ იმიჯს და გაიძულებთ, მისი ეგოიზმის კვალდაკვალ იაროთ. არადა როცა საქმე თქვენს გარეგნობასა და ჯანმრთელობას ეხება, გარშემო მყოფებს მხოლოდ სათათბირო ხმის უფლება უნდა ჰქონდეთ.
ბევრჯერ ვცადე მოწევისთვის თავის დანებება, მაგრამ უშედეგოდ. სულ ვფიქრობდი: ახლა კი ნამდვილად გამომივა, მე ხომ კარგად ვიცი, როგორი მავნებელია მოწევა ჯანმრთელობისთვის-მეთქი, მაგრამ საკმარისია გავნერვიულდე, რომ მაშინვე მოწევას ვიწყებ. სამსახურში მიმავალი ხშირად ისე ვყიდულობ სიგარეტს, ვერც კი ვამჩნევ, თითქოს ქვეცნობიერად ვიქცევი ასე. თათია
უპირველეს ყოვლისა, შეწყვიტეთ იმაზე ფიქრი, რომ მოწევისთვის თავის დანებება ძნელია. შთააგონეთ საკუთარ თავს, რომ საკმაოდ ძლიერი ხართ, რათა უარი თქვათ ამ მავნე ჩვევაზე. თვალთახედვის არიდან მოაშორეთ სიგარეტი, სანთებელა, საფერფლე, თავი არიდეთ ისეთ სიტუაციებს, რომლებშიც მიჩვეული ხართ მოწევას. კარგი იქნება, თუ შეიცვლით სხვა ჩვევებსაც: თუ მიჩვეული ხართ სამსახურისკენ მიმავალ გზაზე სიგარეტის ყიდვას, ამიერიდან სხვა გზით იარეთ.
ძალიან მიყვარს ხატვა, ბოლო ხანს კი ფენტეზის წერამ გამიტაცა, მაგრამ ახლობლები ჩემს ინტერესს სერიოზულად არ ეკიდებიან. მამა ხუმრობით დამცინის კიდეც, ჩემს გატაცებას "ბავშვურ ტიტინს" ეძახის. რა თქმა უნდა, მათ გამონათქვამებს ხუმრობაში ვატარებ, მაგრამ ძალიან მწყინს. როგორ მოვიქცე? სოფო
ალბათ თქვენც, ისევე როგორც ყველა შემოქმედს, სულის სიღრმეში გაქვთ იმედი, რომ თქვენი ნახატები და რომანები ოდესმე აუცილებლად მოგიტანენ დიდებასა და წარმატებას. კრიტიკა მიიღეთ როგორც სტიმული მუშაობისთვის, წერისა და ხატვის ტექნიკის დასახვეწად. მხოლოდ საზოგადო აღიარება, მაგალითად, კონკურსში გამარჯვება აიძულებს თქვენს ახლობლებს, სხვა თვალით შეხედონ თქვენს გატაცებას. თუ მხოლოდ საკუთარი თავისთვის ხატავთ ან წერთ, მაშინ უნდა აუხსნათ მშობლებს, რომ ჰობი თქვენთვის სტრესის მოხსნის, საკუთარ თავთან განმარტოების საშუალებაა. შესაძლოა, მათაც გაუჩნდეთ სურვილი, სამუშაოს შემდეგ ხელი ხატვას ან წერას მიჰყონ.
გამოცდებზე ფიქრიც კი შიშს მგვრის, ძალ-ღონეს მაცლის. გამოცდის დღეს დილიდანვე ისეთი განცდა მაქვს, რომ რაღაც აუცილებლად დამავიწყდება და თავს ვერ ვაიძულებ, გამოცდაზე გავიდე. ჯერ პირველ კურსზე ვარ, მაგრამ უკვე უამრავი კუდი მაქვს. როგორ მოვიქცე? ანასტასია
როგორც ჩანს, თქვენ მეტისმეტად მომთხოვნი ხართ საკუთარი თავის მიმართ. მიგაჩნიათ, რომ თუ უმაღლესი შეფასება არ მიიღეთ, ეს კატასტროფა იქნება. შიშობთ, ლექტორებს თქვენი პასუხით იმედი არ გაუცრუოთ. ახლა კი წარმოიდგინეთ, რას ფიქრობენ თქვენზე პედაგოგები, როცა თქვენს გაცდენებს ხედავენ.
ალბათ დაგვეთანხმებით: მონდომებული სტუდენტი გოგონას რეპუტაცია, რომელსაც ჩათვლის წიგნაკში საშუალო ნიშნები აქვს, უფრო უკეთესია, ვიდრე თავქარიანი ქალიშვილისა, რომელიც გამოცდებს ადვილად აცდენს. შეეცადეთ, გამოცდებს შეხედოთ არა როგორც ეგზეკუციას ან შეჯიბრებას, არამედ როგორც სასწავლო პროცესის ნაწილს თქვენი ცოდნის ობიექტურად შესაფასებლად, რათა სამომავლოდ შეავსოთ ხარვეზები და გამოასწოროთ შეცდომები.
მე ძლიერი მამაკაცები მიზიდავენ, მათ კი არ მოვწონვარ. ჩემს ირგვლივ სულ სუსტი ყმაწვილები, დედიკოს ბიჭები ტრიალებენ, ხოლო ძლიერი, საკუთარ თავში დარწმუნებული მამაკაცები რატომღაც ყოველთვის გვერდს მივლიან. ამბობენ, ასეთი კატეგორიის ბიჭების ყურადღება რომ დაიმსახურო, სუსტი, უსუსური, უმწეო უნდა იყოო, მაგრამ მე ასეთი არ ვარ და არც მინდა, თავი ასეთად მოვაჩვენო... ანუკა
ძლიერ მამაკაცს, რომელიც მუდამ მზად არის თავისი მანდილოსნის დასაცავად და მისი პრობლემების მოსაგვარებლად, არ ესმის, რაში სჭირდება ის ისეთ ქალს, რომელსაც თავადაც მშვენივრად შეუძლია ლურსმნის ჩაჭედება, მანქანის შეკეთება და ადვილად უბრუნებს ხურდას შეურაცხმყოფელს. რა თქმა უნდა, არ არის აუცილებელი, მამაკაცს თავი ისე მოაჩვენოთ, თითქოს ჩაქუჩი შორიდანაც არ დაგენახოთ ან შიშის ზარს გცემდეთ მაწანწალა ძაღლის დანახვა; უბრალოდ, აჩვენეთ, რომ მზად ხართ დათმოთ ლიდერის პოზიცია. მამაკაცებს არაფერი აქვთ დამოუკიდებელი და უზრუნველყოფილი ქალების საწინააღმდეგო, მაგრამ არ მოსწონთ მათი აგრესიული ქცევა.
ძლიერი მამაკაცების ყურადღება რომ დაიმსახუროთ, საკუთარი ძლიერებისა და დამოუკიდებლობის დემონსტრირებას თავი დაანებეთ.