ნანა კალანდაძე

ნახევარი წლის წინ ბაბუამ მის სახელზე გააფორმა საბაღე ნაკვეთი, მე კი ავტოფარეხი მომაკუთვნა. ჩემი დის დედამთილი უკმაყოფილოა, თითქოს მისი რძალი ნაკლებად მოგებული დარჩენილიყოს. ჩემმა დამაც დაუჯერა, განაწყენდა, აღარ მირეკავს, შეხვედრისას უკმაყოფილო იერი აქვს... როგორ მოვიქცე? ინგა, 30 წლის

ეცადეთ, დას უფრო ხშირად შეხვდეთ და ესაუბროთ. უთხარით, რომ ძალიან გენატრებათ და განიცდით, რომ თქვენს შორის ურთიერთობა რატომღაც გაცივდა. თუ ავტოფარეხზე ჩამოვარდა სიტყვა, შეახსენეთ, რომ ისიც და საბაღე ნაკვეთიც ბაბუის საჩუქრებია, რომლებმაც ორივე გაგახარათ და ამ სიტუაციაში ულამაზო იქნებოდა, ან ბაბუისთვის, ან ერთმანეთისთვის რაიმე მოთხოვნა წაგეყენებინათ. დროდადრო სიტყვა ჩამოაგდეთ საბაღე ნაკვეთის უპირატესობაზე, დას აჩუქეთ წიგნი ლანდშაფტის დიზაინზე.

ჩემს ქმარს პირველი ცოლისგან ქალიშვილი ჰყავს. ძალიან სასიამოვნო გოგონაა და ადრე საკმაოდ კარგი ურთიერთობაც გვქონდა, მაგრამ ამ რამდენიმე ხნის წინ შევამჩნიე, რომ მისი სტუმრობის შემდეგ ჩემი საფულიდან ფული ქრებოდა. თავდაპირველად დაჯერება მიჭირდა, მაგრამ შემდეგ ყველაფერი გაირკვა და დადასტურდა... ნინო, 31 წლის

ბავშვები ხშირად იყენებენ ქურდობას იმ ადამიანების დასასჯელად, რომლებმაც აწყენინეს. გოგონა საფულის დაცარიელებით თითქოს სამაგიეროს გიხდით იმის გამო, რომ მამა წაართვით. როგორი თბილიც უნდა იყოს თქვენი ურთიერთობა, არ დაივიწყოთ, რომ ბავშვი სულის სიღრმეში მაინც ოცნებობს, მისი მშობლები ისევ ერთად იყვნენ.

გულახდილად ესაუბრეთ გოგონას, გააფრთხილეთ, რომ მამისთვის ჯერ არაფერი გითქვამთ მომხდარის შესახებ, მაგრამ თუ სხვის ნივთებში ხელის ფათურს გააგრძელებს, აუცილებლად ეტყვით. არ შეგეშინდეთ კრიტიკისა - ბავშვების სიყვარული მხოლოდ ქებას და ფერებას არ გულისხმობს. ამასთანავე, გოგონამ თქვენს სიტყვებში მხოლოდ აღშფოთება კი არა, ტკივილი და იმედგაცრუებაც უნდა დაინახოს. ძნელი სათქმელია, მიხვდება თუ არა გოგონა თავის დანაშაულს, მაგრამ ამ საუბრის გარეშე სიტუაცია ჩიხში შევა.

თავს უფლებას არ ვაძლევ, მოდური ტანსაცმელი ვატარო. ხალისით ვისინჯავ ხოლმე "თამამ" ნივთებს, მაგრამ ყიდვა და ჩაცმა მერიდება. ჩემი კოლეგები მოდური ტანსაცმლითა და მორთულობით დადიან, მე კი მგონია, რომ თუ ოფისში ასევე ჩაცმული მივედი, ყველა ჩურჩულს დაიწყებს, რომ ასაკისთვის შეუფერებლად მაცვია. სოფო, 39 წლის

ამოარჩიეთ ერთი-ორი კოლეგა, რომელთა მიმართაც სიმპათიით ხართ განმსჭვალული, გამოხატეთ აღტაცება მათი მისამართით და დაიჩივლეთ, რომ თავად ასაკის გამო ასე ჩაცმა არ შეგიძლიათ. თქვენი გულახდილი აღიარება შეუმჩნეველი არ დარჩება, კოლეგები აუცილებლად დაიწყებენ საპირისპიროს მტკიცებას და გირჩევენ, რა და როგორ ატაროთ. ამის შემდეგ თქვენი იმიჯის შეცვლა აღიქმება როგორც ერთობლივი ძალისხმევის ნაყოფი, ამიტომ აღიარებასა და მოწონებას უფრო გამოიწვევს, ვიდრე კრიტიკასა და ჭორაობას.

ჩემი მეგობარი მხოლოდ თავის პირად პრობლემებზე მესაუბრება - როგორ ეჩხუბა შეყვარებულს და ასე შემდეგ. საქმე იქამდე მივიდა, რომ მასთან შეხვედრას უკვე დაძაბული ველოდები. მესმის, რომ თანაგრძნობას ელის, მაგრამ ძალა აღარ შემწევს, ერთი და იგივე ვისმინო - ის თითქოს მთელ ენერგიას მაცლის. ეკატერინე, 31 წლის

არიან ქალები, რომლებსაც შეყვარებულთან ჩხუბი ვნებიანი ურთიერთობის დასტურად მიაჩნიათ. როგორც ჩანს, თქვენი მეგობარიც ასეთია. ის არ აპირებს საყვარელ მამაკაცთან განშორებას - მის გარეშე ცხოვრება მოსაწყენი მოეჩვენება, მაგრამ ნებისმიერი წარმოდგენა მაყურებლის გარეშე ფასს კარგავს, მაყურებლის საპატიო როლი კი, როგორც ჩანს, თქვენ გერგოთ. მაგრამ შოუ მეტისმეტად გაგრძელდა. დროა, მიანიშნოთ მეგობარს, რომ თავისი საქციელით გართმევთ შესაძლებლობას, მას თქვენი პრობლემების შესახებაც ესაუბროთ ან უბრალოდ ეჭორაოთ, დასახოთ სამომავლო გეგმები, განიხილოთ მოდის სიახლეები... აღიარეთ, რომ მისი ყურადღება და თანაგრძნობა გაკლიათ. შეახსენეთ, რომ მან დიდი ხანია იცის, რას ფიქრობთ მის საყვარელ მამაკაცზე, ამიტომ აზრი აღარ აქვს, მის საქციელზე მსჯელობას ამდენი ხანი დაუთმოთ.

---

დიდხანს ვიყავი უმუშევარი, ვიდრე მეგობარმა სიტყვა არ შემაწია და თავის ორგანიზაციაში არ მომაწყო სამუშაოდ, მაგრამ გავედი თუ არა სამსახურში, მეორე პრობლემას შევეჯახე: მეგობარი, რომელიც სამუშაოს შოვნაში დამეხმარა, თავისი მოვალეობების შესრულებასაც მაიძულებს. ვერაფერს ვეუბნები - მიაჩნია, რომ მასთან ვალში ვარ. ელენე, 38 წლის

ჯობს, ურთიერთობის გარკვევისგან თავი შეიკავოთ და მოიქცეთ ისე, რომ თქვენს მეგობარს ხელს აღარ აძლევდეს თქვენი "ექსპლუატაცია": გააჭიანურეთ მისი სამუშაოს შესრულება და თავი იმით იმართლეთ, რომ ხელმძღვანელმა სასწრაფო დავალება მოგცათ; როდესაც გთხოვთ, მის ნაცვლად დარეკოთ სადმე, დაიჩივლეთ, რომ ან ყველა ნომერი დაკავებულია, ან ზარს არავინ პასუხობს; როდესაც რამეს შემოგჩივლებთ და დახმარებას გთხოვთ, უპასუხეთ: "ძვირფასო, რომ იცოდე, რა კარგად მესმის შენი! მე თვითონ ჩავვარდი ასეთსავე სიტუაციაში და არ ვიცი, ვის ვთხოვო დახმარება!" რაც მთავარია, ზედმიწევნით შეასრულეთ საკუთარი მოვალეობა - სწორედ ამაზეა დამოკიდებული თქვენი მომავალი ამ ორგანიზაციაში.

მომავალი ძალიან მაღელვებს, ამიტომ გადავწყვიტე, მკითხავს მივმართო, მაგრამ არ მასვენებს იმაზე ფიქრი, რამდენად სწორია ეს გადაწყვეტილება. ეს სურვილი კიდევ გასაგები იქნებოდა, ჩემს ცხოვრებაში რაიმე სერიოზული რომ მომხდარიყო, მაგალითად, განქორწინება ან პროფესიული წარუმატებლობა. არადა, ქმარს ხუთი წლის წინ გავშორდი და დღემდე არ მინანია, სამსახურშიც ყველაფერი რიგზეა... ლიკა, 29 წლის

ეს იმიტომ, რომ სულის სიღრმეში გჯერათ: ნებისმიერი პრობლემის მოსაგვარებლად არსებობს ერთადერთი სწორი გზა, რომელიც ჯერჯერობით ვერ გიპოვიათ. არ ცდებით, თუ გგონიათ, რომ მკითხავი ვერ დაგეხმარებათ - თუ ჩვენს ცხოვრებაში ყველაფერი წინასწარ არი განსაზღვრული, მაშ, რა აზრი აქვს მოვლენათა შეცვლის მცდელობას? ხოლო თუ ადამიანი ფლობს თავისუფალ ნებას, მკითხავი მით უმეტეს არ არის საჭირო. თქვენს ყველა გადაწყვეტილებას ბედისწერად ნუ ჩათვლით; დაუტოვეთ თავს უფლება გადაიფიქროთ, თუ შედეგი არ გაკმაყოფილებთ, ხოლო რჩევისთვის მიმართეთ არა მკითხავს, არამედ მეგობრებს, მშობლებს, ადამიანებს, რომლებსაც ენდობით. არც ის არის საჭირო, მათი რჩევები უყოყმანოდ შეასრულოთ. უბრალოდ, გულისყურით მოისმინეთ მათი არგუმენტები და სცადეთ, სიტუციას მათი თვალითაც შეხედოთ.

ჩემი მომზადებული კერძები ყველას ძალიან მოსწონს, მხოლოდ ჩემი ქმარია უკმაყოფილო. ერთი წლის წინ შევუღლდით და ამ ხნის განმავლობაში სხვა მიზეზით უთანხმოება ერთხელაც არ მოგვსვლია. რაც არ უნდა მოვამზადო, ქმრისგან მხოლოდ ეს მესმის: "დედაჩემი ამას სხვანაირად აკეთებს!" ცხადია, მწყინს. როგორ მოვიქცე? მარი, 23 წლის

რა თქმა უნდა, გულსატკენია საყვარელი ადამიანისგან მსგავსი შენიშვნების მიღება, მაგრამ წუთით საკუთარი თავი მის ადგილას დააყენეთ: დავუშვათ, თქვენ გიყვართ სალათი არაჟნით, მაგრამ ყოველთვის მაიონეზით მოგართმევენ. ძნელია იმ კულინარიულ მიდრეკილებებზე უარის თქმა, რომლებიც სათავეს ბავშვობიდან იღებს, ამიტომ ქმრის სიტყვებს დედამთილთან ჭიდილში დამარცხების ნიშნად ნუ აღიქვამთ. კულინარიული ოსტატობა არ გულისხმობს რეცეპტების ზუსტი თანამიმდევრობით შესრულებას; ის ფანტაზიასაც მოიაზრებს. ეცადეთ, გაითვალიწინოთ ქმრის ჩვევები, მოთხოვნილებები, მიმართეთ იმპროვიზაციას და კონფლიქტიც გაიშვიათდება.