”მკურნალის” რედაქცია

• 3 სუფრის კოვზ ხაჭოს დაუმატეთ 1 სუფრის კოვზი თაფლი, მოასხით მაწონი ან არაჟანი და მიიღეთ უზმოზე. ეს მოამარაგებს ორგანიზმს კალციუმით. ასევე ყოველდღე ბლენდერში გაატარეთ 0,5ლ კეფირი, 1 ბანანი, 1 სუფრის კოვზი თაფლი, 5-10ც ნიგოზი და მიიღეთ ეს სასმელი. ის აამაღლებს იმუნიტეტს და დაგიცავთ ოსტეოპოროზისგან.

ირინა ხომერიკი, ბათუმი

პროსტატიტის სამკურნალო მცენარეული საშუალება

პროსტატიტის საწყის სტადიაზე ეფექტურია შემდეგი ნაყენი:

• შეურიეთ 2 წილი დაფქული შავი მოცხარის ფოთლები და თითო-თითო წილი არყისა და ალუბლის ფოთლები. ამ ნარევის 1 სუფრის კოვზს დაასხით 1 ჩაის ჭიქა მდუღარე წყალი. გააჩერეთ 2 საათი, გადაწურეთ, დაუმატეთ თაფლი გემოვნებით და მიიღეთ თანაბარი რაოდენობით დილას და 6 საათის გასვლის შემდეგ, ჭამიდან 1 საათის დაყოვნებით.

კაკო ყურაშვილი, თბილისი

დაღლილობა ვერას დაგაკლებთ

თუ ყოველდღიურმა ცხოვრებამ დაგღალათ, სამსახურში ძლიერი დატვირთვისა და ხშირი სტრესებისგან გამოიფიტეთ, გირჩევთ ამ საშუალებით უშველოთ თავს:

• 40-50 გრამ ჟენშენის ფესვს დაასხით მდუღარე წყალი. 3-4 საათის შემდეგ წყალი გადაღვარეთ, ფესვი დააქუცმაცეთ, დაასხით 0,5ლ 40%-იანი სპირტი და დადგით ბნელ ადგილას 3 კვირით. მიიღეთ 10 მლ დღეში ერთხელ, ჭამამდე ნახევარი საათით ადრე საკვების დაუყოლებლად.
• მკურნალობის კურსი 90 დღეა, ორი 10-დღიანი შესვენებით. ანუ ნაყენს სვამთ 35 დღე, 10 დღე ისვენებთ, შემდეგ კი ამას იმეორებთ. სასურველია, 1 წლის შემდეგაც გაიმეოროთ.

ლალი ვადაჭკორია, სოფელი თხინვალა

მამაკაცებო, ხაფანგს ასე დაუსხლტებით

სამედიცინო ლიტერატურაში პოდაგრას უწოდებენ “ხაფანგს მამაკაცებისთვის” - რადგან ის უპირატესად კაცების პრობლემაა.

ფეხის ცერა თითის ძირში პოდაგრისათვის დამახასიათებელმა წანაზარდმა ზრდა რომ დაიწყო, თავიდან სერიოზულ ყურადღებას არ ვაქცევდი, მოგვიანებით ტერფი საგრძნობლად დამიმახინჯდა, აღარაფერს ვამბობ იმ ძლიერ ტკივილებზე, არა მარტო სიარულის, უმოძრაოდ ყოფნის დროსაც რომ არ მასვენებდა.

აი, მაშინ კი დავფაცურდი და დავადგინე, რომ ამგვარი წანაზარდის მიზეზი სახსრებში შარდმჟავა მარილების დაგროვება და ჩალაგება ყოფილა.

მათ საწინააღმდეგო საშუალებებსაც ადვილად მივაგენი ხალხურ მედიცინაში.

• ცერა თითთან წარმოქმნილი პოდაგრისთვის დამახასიათებელი წანაზარდის საწინააღმდეგოდ აიღეთ უმი კარტოფილი და გაგეხეთ, გახეხილი კარტოფილი დადეთ ახალი კომბოსტოს ფურცლებზე და დაიდეთ მტკივან ცერა თითზე;
• შედეგიანია ყოველდღიურად იოდის 3%-იანი ნაყენის დადებაც;
• სასარგებლოა მარილისა და იოდის აბაზანებიც, ამისათვის 1 ლიტრ წყალში უნდა გახსნათ 2 სადილის კოვზი მარილი და 10 წვეთი იოდი.

ნუ იფიქრებთ, რომ ეს საშუალებები წანაზარდს დააპატარავებს ან ტერფს უწინდელ ფორმას დაუბრუნებს, მათ მხოლოდ დაავადებისთვის დამახასიათებელი შეტევითი ტკივილისა და ძლიერი დისკომფორტის შემცირება შეუძლია.

თუ ცერა თითთან პოდაგრული წანაზარდი ახალი გაჩენილია, არ დაიზაროთ და მარილოვან გამონაზარდს ყოველდღე 10-15-წუთიანი მასაჟი გაუკეთეთ, შესაძლოა დროულად დაწყებულმა მკურნალობამ თანდათან დააპატარაოს ან საერთოდაც გააქროს წანაზარდი.

შალვა ფირჩხაძე, ზესტაფონი

მუხლის ტკივილი შემოდგომით პრობლემებს აღარ შეგიქმნით

შემოდგომა მუხლის ტკივილის გარეშე ჩემთვის უკვე წარმოუდგენელია.

სპეციალისტები ყოველ წელს ერთსა და იმავეს მეუბნებიან, რომ ეს არის ართრიტი, რომელიც შემოდგომით მწვავდება და ეს სეზონური გამწვავება ჩემს ქრონიკულ პრობლემასაც ამწვავებს.

ჩემთვის მთავარი პრობლემის მოგვარებაა და როდესაც საქვეყნოდ ცნობილმა წამლებმა და პროცედურებმა ვერ მიშველა, გადავწყვიტე ხალხური მედიცინისთვის მიმემართა. მეგობარმა მითხრა, რომ დაფნის ფოთლებით ართრიტიც და ოსტეოქონდროზიც განსაკუთრებით კარგად იკურნებოდა და რეცეპტიც მასწავლა.

შემოდგომა დადგება თუ არა, პროფილაქტიკურ მკურნალობას ვიტარებ და ძალიან კმაყოფილიც ვარ.

• რამდენიმე დაქუცმაცებული დაფნის ფოთოლი ჩაყარეთ მომინანქრებულ ჭურჭელში და დაასხით 300 მლ წყალი, ადუღეთ რამდენიმე წუთით და მოათავსეთ თერმოსში 6 საათის განმავლობაში.

ეს ნახარში უნდა მიიღოთ ჩაის კოვზით 12 საათის განმავლობაში ყლუპებით, 15-წუთიანი შესვენებით (დიდი დოზით მიღება არ შეიძლება), ასე უნდა გააგრძელოთ 3 დღე, შემდეგ ერთი კვირა შეისვენეთ და კვლავ გაიმეორეთ.

მკურნალობის დროს ძლიერდება შარდვა, შარდი ხდება ვარდისფერი, ასე რომ ეს ნუ შეგაშინებთ.

მკურნალობის პერიოდში საჭიროა დიეტის დაცვა, ის პროდუქტები უნდა გამორიცხოთ მენიუდან, რომლებიც არ არის რეკომენდებული სახსრების პრობლემის დროს.

ნინო მაისურაძე, თბილისი

სარძევე კბილების ამოჭრამ პატარა რომ არ გატანჯოს

სარძევე კბილების ამოჭრა თქვენს პატარას ტანჯვა-წამებად რომ არ ექცეს, კბილების ამოჭრამდე გარკვეული ხნით ადრე მისი ღრძილები ყოველდღიურად დაამასაჟეთ სპეციალურ ხსნარში დასველებული დოლბანდშემოხვეული თითით.

• გახსენით 1 ჩაის კოვზი საჭმლის სოდა 1 ჭიქა ანადუღარ თბილ წყალში, შემოიხვიეთ საჩვენებელ თითზე ნაზი ქსოვილი, დაასველეთ თითი სოდიან წყალში და დღეში სამჯერ პატარას ღრძილები და მთელი პირის ღრუ დაუმასაჟეთ.

შეგიძლიათ გამოუთალოთ მცირე რგოლები იების ფესვისგან, რომელსაც იგი ღრძილების ქავილის დროს გალოღნის, ან ასეთ დროს შეგიძლიათ უბრალოდ შავი პურის მაგარი ქერქი მისცეთ.

აი, ბებიები კი გვირჩევენ, ყელზე ძაფზე შებმული ნამდვილი ქარვა დაჰკიდოთ, ეს, მათი აზრით,

პატარას ტკივილს უქარვებს და საგრძნობლად უმსუბუქებს მდგომარეობას.

თაკო ლაბაძე, კასპი