პომელო - რისთვის არის სასარგებლო
ფოთოლი ფართოფრთიანია, ნაყოფი მსხვილი, მსხლისებრი ან ოდნავ ბრტყელი, ღია ყვითელი, კანი გლუვი ან ოდნავ ხორკლიანი. რბილობი ღია ლიმონისფერია, მომჟავო-ტკბილი, ზოგი ჯიშისა – მწარე.
ენერგეტიკული ღირებულება:
ღირებულება ულუფაზე: 100გ-ზე
კალორიები (კკალ) – 38
- ლიპიდები – 0 გ
- ქოლესტერინი – 0 მგ
- ნატრიუმი – 1 მგ
- კალიუმი – 216 მგ
- ნახშირწყლები – 10 გ
- ცილები – 0,8 გ
- ასკორბინის მჟავა – 61 მგ
- კალციუმი – 4 მგ
- რკინა – 0,1 მგ
- მაგნიუმი – 6 მგ
პომელო – ყველაზე დიდი ნაყოფი ციტრუსისებრთა ოჯახიდან, გარეგნულად გრეიპფრუტს გვაგონებს, გემოთი კი – ფორთოხალს. საბედნიეროდ, ასეთი ეგზოტიკური ხილის შეძენა პრობლემა არ არის, რადგან ჩვენს სუპერმარკეტებში ის ხშირად გვხვდება. პომელოს კანი მკვეთრი ყვითელი ან მწვანე შეფერილობისაა, პრიალებს, არსებობს მოწითალო შეფერილობისაც.
გემო ტკბილი აქვს, ნაზი, ოდნავ მომჟავო, ფორთოხლის არომატით.
როგორ შევარჩიოთ ნაყოფი
ყიდვისას ყურადღება უნდა მივაქციოთ ნაყოფის სუნს, რაც უფრო მძაფრი და სასიამოვნოა, მით მეტად მწიფე, წვნიანი და გემრიელი იქნება. მართალია ჩვენამდე დაუმწიფებელი ნაყოფი მოდის, მაგრამ შესაძლებელია მისი დაყოვნება დასამწიფებლად, მწიფე კი კარგად ინახება მაცივარში. პომელოს წვენი სწრაფად კლავს წყურვილის გრძნობას.
პომელოს მოსავალს თებერვალში იღებენ, რადგან ამ დროს არის ყველაზე მწიფე და წვნიანი. ამიტომ უფროსებსაც და ბავშვებსაც გირჩევთ, ამ პერიოდში ჭამოთ ეს ციტრუსი.
ფორთოხლისგან განსხვავებით, პომელოსთვის კანის მოშორება ძალიან იოლია – საკმარისია დანით გაჭრა და ლებნები თავისუფლად სცილდება კანს.
რატომ არის სასარგებლო?
პომელოს ნაყოფი განსაკუთრებით სასარგებლოა ბავშვებისთვის. ის შეიცავს დიდი რაოდენობით ც ვიტამინს, ბეტა-კაროტინს (პროვიტამინ A-ს), B ჯგუფის ვიტამინებს, მათ შორის – ფოლიუმის მჟავას.
მდიდარია მინერალური ნივთიერებებით, განსაკუთრებით – კალიუმით, ფართო სპექტრითაა წარმოდგენილი მიკროელემენტები.
ნაყოფი კარგად ანაყრებს, თუმცა, ცოტა კალორიას შეიცავს – 100 გ რბილობი 30-39 კკალს. ამიტომ ხშირად იყენებენ გასახდომ დიეტებში.
თუ ადამიანი კვირაში სამი დღე მაინც მიიღებს პომელოს, მისი იმუნიტეტი სასუნთქი სისტემის ვირუსული ინფექციების მიმართ გაძლიერდება.
ვიტამინ ც-ს მაღალი შემცველობის წყალობით, პომელო უნდა მივიღოთ გრიპის პროფილაქტიკისა და უკვე არსებული დაავადების სიმპტომების შესამსუბუქებლად. ამ ხილის ხშირი მოხმარება ორგანიზმს ხდის რეზისტენტულს სხვადასხვა დაავადების მიმართ.
პომელო ორგანიზმისთვის აუცილებელი სპილენძისა და რკინის მდიდარი წყაროცაა.
ეს ხილი ზრდის მჟავიანობის დონეს ქალის ინტიმურ ზონაში, რითაც ხელს უშლის მავნე ბაქტერიების გამრავლებას.
ხილი შეუცვლელია კანის, თმისა და ფრჩხილების მდგომარეობის გასაუმჯობესებლად. ვიტამინი ც ასეთი კონცენტრაციით მაქსიმალურად უზრუნველყოფს ქალის სილამაზისთვის მნიშვნელოვან კოლაგენურ კავშირებს.
პომელოში არსებული მაგნიუმი აუმჯობესებს ძილის ხარისხსა და ხანგრძლივობას.
ეს წვნიანი ხილი შეიცავს დიდი რაოდენობით ვიტამინ A-საც, რომელიც ხელს უშლის კანის ნაადრევ დაბერებას. იგი იცავს კანს ულტრაიისფერი სხივების მავნე ზემოქმედებისგანაც.
თუ გახდომა გსურთ, პომელო აუცილებლად უნდა შეიტანოთ რაციონში, რადგან მცენარეული ცელულოზას წყალობით, ის წმენდს ნაწლავებს, პექტინების შემცველობით კი აუმჯობესებს ნივთიერებათა მიმოცვლის პროცესებს.
სახის კანი ახალგაზრდა და ტონუსში რომ იყოს, გაიწმინდეთ პომელოს წვენით. ახლად დაწურული წვენი დაუმატეთ ცხიმიანი კანის ნიღბებსაც.
პომელოს კანი:
როგორ მოქმედებს ის ადამიანის ორგანიზმზე
ჩვენ ძირითადად ვყრით ხილის კანს და წარმოდგენაც არ გვაქვს, რამდენ ვიტამინს შეიცავენ. სწორედ ამ შეცდომის გამო ჩვენი ორგანიზმი ვერ იღებს საჭირო რაოდენობის მიკროორგანიზმებს. ამიტომ არ ღირს ხილის კანისგან განთავისუფლება, სანამ არ გაიგებთ მისი სასარგებლო თვისებების შესახებ.
პომელოს კანი და მისი სასარგებლო თვისებები
პომელო ღირებულია არა მხოლოდ რბილობის, არამედ კანის გამოც.
პომელოს კანი შეიცავს დიდი რაოდენობით უჯრედისს. ის საკმაოდ კარგად ახშობს შიმშილის გრძნობას, რაც კარგია მადის გასაკონტროლებლად. სწორედ ამ თვისების გამო ურჩევენ დიეტოლოგები პაციენტებს ამ ციტრუსის რაციონში შეტანას.
ამასთან ერთად, ამ ხილის კანის შემადგენლობაში შედის პექტინი. ის უზრუნველყოფს ორგანიზმიდან შლაკებისა და ტოქსინების გამოდევნას. ყველაფერთან ერთად კანი მდიდარია კალიუმითა და B ჯგუფის ვიტამინებით.
პომელოს კანის სასარგებლო თვისებები სახლისთვის
ცნობილია, რომ ამ ხილის კანი შეიცავს საკმაოდ დიდი რაოდენობით ეთერზეთებს. აი, ამიტომაა ის არაჩვეულებრივი არომატიზატორი ოთახში სასიამოვნო სურნელის დასაყენებლად. ამისთვის გამოიყენეთ გამომშრალი პომელო.
პომელოს გამოყენება საკვებში
პომელოს კანი საკმაოდ არასასიამოვნო არომატისაა. თუმცა, თუ მას გახეხავთ და დაამატებთ დესერტებში, მიიღებთ არაჩვეულებრივი არომატის მქონე ნამცხვარს.
პომელოს კანისგან შეგიძლიათ დაამზადოთ არომატული ჩაი. მისი მომზადება საკმაოდ მარტივია. კარგად გარეცხეთ კანი, დაანაკუწეთ და მოათავსეთ ჩაის ფერის დასაყენებელში. 10 წუთი სავსებით საკმარისია არომატული და სასარგებლო თვისებების მქონე ცხელი სასმელის მისაღებად.
არ გადაყაროთ ციტრუსის კანი. გახსოვდეთ, რომ ის სასარგებლო ნივთიერებების ნამდვილი საბადოა.
როგორ ვჭამოთ?
პომელოს ლებნები შეიძლება ნატურალური სახითაც მიიღოთ ან მისგან სადღესასწაულო სალათები მოამზადოთ.
სალათი პატარებისთვის
საჭიროა:
- 1 პომელო
- 2-2 ცალი კივი, ვაშლი, ბანანი
- 100 გ შავი ყურძენი (ალადასტური)
- 250 გ გახეხილი სულგუნი
- 100 გ ატმის იოგურტი
- 1 ლიმონი
- 2 ჩაის კოვზი თაფლი და გემოვნებით დარიჩინი.
დაჭრილ ხილს შეურიეთ თაფლისა და იოგურტის სოუსი ყველთან ერთად. 10-15 წთ-ით შედგით მაცივარში და მიირთვით.
სამარხვო სალათი
საჭიროა:
- 1 პომელო, დაჭრილი კუბებად
- 1 კონა მწვანე სალათი
- 1 ჩაის კოვზი მცენარეული ზეთი
- მარილი გემოვნებით.
ყველაფერი შეურიეთ ერთმანეთს, მოასხით ზეთი და მოაყარეთ მარილი. მიირთვით გემრიელად!