წამალი მხოლოდ რეცეპტით გაიცემა...
რჩევისთვის მოვედი: მაინც რას ვუმკურნალო პირველ რიგში?" ექიმი პაციენტს ყურადღებით ათვალიერებს და ეუბნება: "თავდაპირველად აუცილებლად მიბრძანდით კოსმეტოლოგთან - იცით, ასაკს მაინც თავისი მოაქვს..." "სამწუხაროდ, მართალი ბრძანდებით", - სინანულით დაეთანხმა ქალი. "შემდეგ დიეტოლოგს ეწვიეთ - ვხედავ, ზედმეტი წონაც გაწუხებთ, ამის შემდეგ კი აუცილებლად შეიმოწმეთ მხედველობა". "ვითომ რატომ?" "ეს იმიტომ, რომ ჩემი კაბინეტის კარზე აბრა "ვეტერინარი", სამწუხაროდ, ვერ შეამჩნიეთ..."
- მამაკაცმა ნაცნობ ექიმს დაურეკა. ერთმანეთი მოიკითხეს, ქვეყნის პოლიტიკური მდგომარეობაც განიხილეს. მოკლედ, კარგა ხანს ისაუბრეს. დამშვიდობებისას კაცმა ექიმს უთხრა: "თუ შემთხვევით ჩემს სახლთან მოხვდი, შემოიარე, სპეციალურად წამოსვლა აუცილებელი არ არის - ჩემმა ცოლმა ყბა ამოიგდო და მთელი დღეა, სიტყვაც არ უთქვამს!!!"
- სამედიცინო ინსტიტუტის ერთ-ერთი ფაკულტეტის კათედრა ყოფილმა თანამშრომლებმა მოინახულეს. კათედრის პროფესორი სიხარულით შეეგება ყოფილ კოლეგებს: "გამარჯობა, ჟორა! გამარჯობა, გოგი! როგორ ბრძანდებით, სად მოღვაწეობთ?.." "ბატონო მიხეილ, - მიმართა პროფესორს გოგიმ, - დიდ ბოდიშს მოგახსენებთ, მაგრამ მე ჟორა კი არა, გოგი ვარ, ხოლო ის - გოგი კი არა, ჟორა". პროფესორს სახეზე დაბნეულობა აღებეჭდა: "აი, ხომ გითხარით, შეცვლილხართ-მეთქი. თუმცა, ეტყობა, მეც მაგრად შევიცვალე - აქამდე შალვა ვიყავი..."
- ორი მოხუცი, რომლებმაც საპენსიო ასაკს დიდი ხნის წინ გადააბიჯეს, ერთმანეთს შეხვდა. დიდხანს ისაუბრეს აქეთურზე, იქეთურზე და ბოლოს, ბუნებრივია, ჯანმრთელობაზეც ჩამოვარდა საუბარი. ერთმა თქვა: "გუშინ ერთ ახალგაზრდა სიმპათიურ ქალთან გახლდით სტუმრად... ინტერესისთვის დროც კი დავინიშნე და წარმოგიდგენია?! - ყველაფერი ერთ საათსა და 31 წუთს გაგრძელდა!" "მაინც როგორ მოახერხე?!" - შურით ჰკითხა მეორე მოხუცმა. "სულ ადვილად: ნახევარი საათი ვემზადებოდი, ერთი წუთი ქალთან ვიყავი და მომდევნო ერთი საათი უგონოდ ვეგდე!"
- ექიმთან მიღებაზე: "ბატონო ჩემო, მე უკვე 80 წლის ვარ, მაგრამ გოგონებს ისევ დავდევ!" "მერე მაგას რა სჯობია?!" - გაოცდა ექიმი. "კი დავდევ, მაგრამ აღარ მახსოვს, რისთვის..."
- "ოდესღაც წარმატებული ექიმი გახლდით, - შესჩივის მატარებელში ერთი მგზავრი მეორეს, - არაჩვეულებრივი პრაქტიკა მქონდა, მაგრამ ერთი პატარა შეცდომის გამო ყველაფერი დავკარგე". "ასეთი რა შეცდომა იყო?" "გარდაცვალების მოწმობის შევსებისას დაბნეულობის გამო "სიკვდილის მიზეზის" გრაფაში საკუთარი გვარი ჩავწერე..."
- ალბათ, მკითხველს ჯერ კიდევ ახსოვს ცნობილი ექსტრასენსი კაშპიროვსკი. მას სეანსებზე მაყურებლების წერილების კითხვა უყვარდა. ერთ-ერთ სეანსზე მან შემდეგი შინაარსის წერილი წაიკითხა: "ხუთი წლის წინ მიმატოვა ცოლმა. თქვენი სეანსების შემდეგ ის მოულოდნელად სახლში დაბრუნდა. ჯანდაბამდე გზა გქონიათ!"
- საავადმყოფოს ერთ-ერთ ფლიგელში ხანძარი გაჩნდა. ოპერატიულად მოსულმა მეხანძრეებმა სწრაფად ჩააქრეს ცეცხლი. ცვლის უფროსმა საავადმყოფოს მთავარ ექიმს უპატაკა: "დიდ დარბაზში ცხრა კაცი ვნახეთ. შვიდი ძლივძლივობით მოვიყვანეთ გონს, ორის გადარჩენა კი, სამწუხაროდ, ვერ მოვახერხეთ..." მთავარმა ექიმმა გულზე იტაცა ხელი: "გაგიჟდით?! ეს ხომ მორგი იყო?!"
- აფთიაქში: "კიდევ ერთხელ გიმეორებთ, ახალგაზრდავ: კალიუმის ციანიდი მხოლოდ რეცეპტით გაიცემა, თქვენი სიდედრის სურათი წამლის გასაცემად საკმარისი არ არის!!!"