ზოგჯერ ქუდითაც იბადებიან
პაციენტებს, რომლებიც თვითმკურნალობას ამჯობინებენ, ექიმები, როგორც წესი, ეუბნებიან: "თუ წიგნების მიხედვით იმკურნალებთ, შესაძლოა კორექტურული შეცდომის მსხვერპლი გახდეთ".
მძიმე მორიგეობის შემდეგ ექიმი შინ დაბრუნდა. პატარა შვილმა მასთან დამალობანას თამაში მოინდომა. მამა დათანხმდა. "მამიკო, დახუჭე თვალები". ექიმმა სიამოვნებით დახუჭა თვალები და... მაშინვე ჩაეძინა. შვილი დაიღალა მაგიდის ქვეშ ჯდომით და სამალავიდან გამოძვრა. "მამა, შენ რა, გძინავს?" "არა, შვილო, არ მძინავს, - ჩაიბურტყუნა გამოღვიძებულმა და შემცბარმა მამამ, - უბრალოდ, ნელა ვახამხამებ თვალებს".
ყურმილში მამაკაცის სასოწარკვეთილი ხმა ისმის: "ექიმო, უკვე მოვდივართ. ჩემი მეუღლე მშობიარობს, ძალიან ეშინია, რომ თქვენამდე მოსვლას ვერ მოვასწრებთ და მანქანაში მოუწევს ბავშვის გაჩენა!" "ასე ნუ ნერვიულობთ, ბატონო. ორიოდე წლის წინ თქვენმა მეუღლემ არაჩვეულებრივი გოგონა გააჩინა და ძალიან კარგად ახსოვს, რომ მშობიარობა ხუთ წუთში არ მთავრდება". "დიახ, ჩემს პირველ ცოლს ეს შესანიშნავად ახსოვს, მაგრამ ამჯერად ჩემი მეორე ცოლი მშობიარობს პირველად!.."
გინეკოლოგთან მიღებაზე ახალგაზრდა ქალი მივიდა: "ექიმო, სამი წელია გათხოვილი ვარ და ბავშვები არ გვყავს". ექიმმა გასინჯა, მაგრამ პათოლოგია ვერ უპოვა. "ქალბატონო, იქნებ, მეუღლეს სთხოვოთ, ხვალ შემომიაროს, მინდა, რამდენიმე კითხვა მასაც დავუსვა", - სთხოვა პაციენტს. მეორე დღეს კაბინეტის კარი გაიღო და... ოთახში ძველი ნაცნობი შევიდა. "არ გრცხვენია, ბიჭო, - ეცა ექიმი, - სამი წელია, ჩვენი მიკრორაიონის ქალები, შენგან ორსულები, ჩემთან აბორტის გასაკეთებლად დადიან. სახლში არაფერს აკეთებ?! ერთი ბავშვის გაკეთებას რა უნდა?!" "რა ვქნა, ძმაო, - გაისმა პასუხი, - ტყვეობაში ვერ ვმრავლდები..."
სამშობიარო სახლის მიმღების ექთანი პაციენტის ანკეტას ავსებს. "გათხოვილი ხართ?" "დიახ, მეორედ". "შვილები გყავთ?" "ექვსი: ორი პირველი ქმრისგან, ორი მეორე ქმრისგან და ორიც - პირადად ჩემი..."
ინსტიტუტი რომ დავამთავრე, რაიონში გამანაწილეს სამუშაოდ. ერთხელ, ზამთარში, მთის სოფლიდან რაიონულ ცენტრში მშობიარე ჩამოიყვანეს. ქალი მანქანის უკანა სავარძელზე იწვა და კვნესოდა. მანქანიდან გადმოყვანისას შევამჩნიეთ, რომ ბავშვის თავი უკვე გამოჭრილი იყო. ყველაზე საოცარი ის გახლდათ, რომ ბავშვს ქუდი ეხურა. ექიმებსა და დამხმარე პერსონალს ენა ჩაუვარდა. მამამ აგვიხსნა: "ზამთარია მაინც... ბავშვს ხომ არ გავაცივებდიო!" ასეც ხდება, ბავშვები მარტო ქუდბედიანები კი არა, ზოგჯერ ქუდიანებიც იბადებიან.
სამშობიარო სახლში ახალგაზრდა მამას სამი ტყუპი გამოუყვანეს. დაბნეულმა კაცმა კეფა მოიქექა და ჩაიბურტყუნა: "თუ წინააღმდეგი არ იქნებით, შუალას წავიყვან".
სამედიცინო ინსტიტუტის სტუდენტი წერით გამოცდას აბარებს. კითხვაზე: "დაასახელეთ ჩვილის რძით კვების შვიდი უპირატესობა", - პასუხს წვალებით იხსენებს: "1. რძეს აქვს ჩვილისათვის ოპტიმალური შემადგენლობა; 2. რძე უზრუნველყოფს ბავშვის იმუნურ დაცვას ინფექციური დაავადებებისგან; 3. როცა არ უნდა მოინდომოს ბავშვმა ჭამა, რძე ყოველთვის ხელთ გვაქვს; 4. რძეს კვებისათვის მუდამ ოპტიმალური ტემპერატურა აქვს; 5. მისი ყიდვა საჭირო არ არის; 6. ძუძუთი კვება უფრო მეტად აახლოებს ერთმანეთთან დედასა და ჩვილს..." და გაიჭედა. ამ დროს წინა მაგიდიდან მაღალმკერდიანი სიმპათიური ქალიშვილი წამოდგა და ნაშრომის ჩასაბარებლად ლექტორისკენ გაემართა. სტუდენტმა თვალი გააყოლა და მეშვიდე პასუხიც ხელდახელ გამოაცხო: "7. რძე ჩვილს მიეწოდება ლამაზი და ეფექტური შეფუთვით!"
გინეკოლოგები ქეიფობენ. მეათე ჭიქის შემდეგ შედარებით ფხიზელი ხმა ისმის: "კოლეგებო, აღარ მოგწყინდათ სულ სამუშაოზე საუბარი?! მოდით, ახლა ქალებზე ვილაპარაკოთ..."
გინეკოლოგის ცოლი მოულოდნელად დაბრუნდა შინ და მეუღლეს სხვა ქალთან ლოგინში წაასწრო. "ძვირფასო, - გაოცებით წარმოთქვა ცოლმა, - ნუთუ მართლა იმდენი სამუშაო გაქვს, რომ გადაწყვიტე, სახლშიც წამოგეღო?"
"არ ინერვიულოთ! - ამშვიდებს ექიმი ახალგაზრდა ქალს, რომელიც ეს-ესაა ამშობიარა ლიფტში, - ამას წინათ მიყვებოდა კოლეგა, როგორ ამშობიარა ერთი წლის წინ ვიღაც ქალი ავტობუსის გაჩერებაზე". "ეს... ეს მე ვიყავი, ექიმო..."
ექიმი ქალბატონი კომპანიაში თავისი დაქალისა და მისი ქმრის ამბავს ჰყვება: "ჩემი მეგობარი პროფესიით გინეკოლოგია, მისი მეუღლეც გინეკოლოგია. ჰოდა, იქ გაიცნეს ერთმანეთი..." სიტყვა დასრულებული არ ჰქონდა, რომ ირგვლივ ჰომერულმა ხარხარმა იფეთქა. შემდეგ ქალი გულმოდგინედ უმტკიცებდა ყველას, რომ მეგობარი და მისი ქმარი ერთად სწავლობდნენ, და რომ ერთმანეთი "იქ" არ გაუცნიათ, მაგრამ სტუმრები ამ ამბის გახსენებისას კიდევ დიდხანს ხითხითებდნენ.