განტვირთვა იწყება
ცხიმოვანი დღეები
ცხიმოვანი განტვირთვა ასტიმულირებს ცხიმების დამშლელი ფერმენტების აქტიურობას და ცხიმების ნახშირწყლებად ქცევას ამუხრუჭებს. ცხიმოვანი განტვირთვის დღის მოწყობა არ შეიძლება ქოლეცის-ტიტის, გასტრიტის, გულ-სისხლძარღვთა დაავადებების დროს. დღეში 5-ჯერ, თანაბარი შუალედებით, მიიღეთ თანაბარ ულუფებად გაყოფილი 500 გ 20%-იანი არაჟანი ან ნაღები. დღეში 2-ჯერ დალიეთ ფინჯანი მწვანე ჩაი ან ასკილის ნაყენი.
ცილოვანი დღეები
ამ დროს უმჯობესდება ნივთიერებათა ცვლა და აქტიურდება ცხიმის დამშლელი ფერმენტები. დღეში 4-ჯერ მიირთვით 150 გ ნაკლებად ცხიმიანი ხაჭო 15 გ არაჟანთან ერთად ან დღეში 6-ჯერ - 250 მლ მაწონი. დღეში 2-ჯერ შეგიძლიათ დალიოთ 50 გ უშაქრო შავი ყავაც.
ბრინჯის დღე
ბრინჯი ნაკლებად კალორიულია და სწრაფად ანაყრებს. მისი მეშვეობით ორგანიზმი იღებს საკმაო ოდენობის კალიუმს და ცოტაოდენ ნატრიუმს, რაც ხელს უწყობს ზედმეტი სითხის გამოდევნას. მოხარ-შულ უმარილო ბრინჯს დაამატეთ სტაფილო და ჭერმის ჩირი.
ხორცის მოყვარულთათვის
დღის განმავლობაში მიირთვით 450 გ მოხარშული მჭლე ხორცი, დალიეთ 1 ფინჯანი რძიანი უშაქრო ყავა და 2 ჭიქა ასკილის ნაყენი ან მწვანე ჩაი. შუალედებში მიირთვით ვაშლი ან შავი ქლიავი.
გონივრული კომბინაცია
შეგიძლიათ, ერთმანეთს შეუთავსოთ შემადგენლობით მსგავსი პროდუქტები: რძის ნაწარმი, ხორცი და თევზი, ხილი და ბოსტნეული. მაგალითად, 3 ულუფა (250 გრამი) ბრინჯი და 800-1000 გრამი ცოცხალი ან მოშუშული ვაშლი, 3 ულუფა (150-150 გრამი) უცხიმო ხაჭო და 3 ულუფა (200-250 გრამი) მაწონი ან კეფირი.
ციტრუსის დღე
თუ ციტრუსებზე ალერგია არ გაქვთ, საუზმედ, სადილად და ვახშმად მიირთვით მხოლოდ ფორთოხალი ან დალიეთ მისი ახალგამოწურული წვენი. ამ ციტრუსში ცოტა კალორიაა (400 კკალ 100 გრამში), სამაგიეროდ, ბევრია უჯრედისი, რომელიც დიდი ხნით აცხრობს შიმშილის გრძნობას, ხოლო კანი შეიცავს პექტინს, რომელიც ქოლესტერინს სისხლში ნორმის ფარგლებში შეგინარჩუნებთ.
თევზის დღე
თევზი შეიცავს ცხიმოვან მჟავებს ომეგა-3-ს, გვიცავს გულ-სისხლძარღვთა დაავადებებისა და დიაბეტი-სგან, ამაგრებს თვალის ბადურას. მიირთვით დილიდან საღამომდე მხოლოდ ცხიმიანი თევზი (ქაშაყი, ორაგული). ომეგა-3-ის მიღებისას ორგანიზმი უფრო მალე ნაყრდება. გასახდომად სასურველია კვირაში 2 განტვირთვის დღის მოწყობა (მაგრამ არა ზედიზედ). პროფილაქტიკისთვის, ფორმის შესანარჩუნებლად და ორგანიზმის გასაწმენდად კი თვეში 1-2 ასეთი დღის მოწყობაა რეკომენდებული.
ცხიმოვანი, ხორციანი და რძიანი განტვირთვის დღეები უკუნაჩვენებია კუჭ-ნაწლავისა და გულ-სისხლძარღვთა ორგანოების ქრონიკული დაავადებების დროს. არ შეიძლება განტვირთვის დღეების მოწყობა ორსულობისა და ძუძუთი კვების პერიოდებში, ღვიძლის ან თირკმლის პათოლოგიის, I ტიპის შაქრიანი დიაბეტის შემთხვევაში, კრიტიკულ დღეებში.
აირჩიეთ განტვირთვისათვის კვირის რომელიმე დღე, მაგალითად, ოთხშაბათი, და ეცადეთ, ყოველ კვირა დაიცვათ ეს რეჟიმი. განტვირთვის დღე შუა კვირაში ის ოქროს შუალედია, რომელსაც მშვიდად მიიღებენ ორგანიზმიც და სამუშაო გრაფიკიც. განტვირთვის დღეების შერჩევისას ორიენტაცია თქვენს გემოვნებასა და ჩვევებზე უნდა აიღოთ. თუ თავს კარგად გრძნობთ, შეგიძლიათ, განტვირთვა მომდევნო ორი დღის განმავლობაშიც გააგრძელოთ. ამ შემთხვევაში უმჯობესია პირველი დღე ხორცისა იყოს, მეორე - ბოსტნეულისა. და კიდევ: განტვირთვის დღეს 2 ლ წყალი მაინც უნდა დალიოთ. ოპტიმალური ვარიანტია უგაზო მინერალური წყალი.