რა კავშირი აქვს საკვებ საღებავებს ნაწლავის ანთებითი დაავადების განვითარებასთან
ასეთი პროდუქტების ხშირად მოხმარებამ შეიძლება გაზარდოს ნაწლავის ანთებითი დაავადებების განვითარების ალბათობა, მათ შორის კრონის დაავადება და წყლულოვანი კოლიტი.
ჩატარებული მცირე კვლევა ვარაუდობს, რომ საღებავის ხშირი და გრძელვადიანი ზემოქმედება (კონკრეტულად FD&C Red 40 და Food Red 17ტიპის საღებავები) ზიანს აყენებს ნაწლავის ჯანმრთელობას და ხელს უწყობს ანთების განვითარებას.
Nature Communications- ში გამოქვეყნდა ანგარიში კვლევის შესახებ. კვლევებმა აჩვენა, რომ დანამატი პირდაპირ არღვევს ნაწლავის ბარიერს და ზრდის ჰორმონ სეროტონინის წარმოქმნას. ანგარიშის თანახმად, ეს რეაქცია ცვლის ნაწლავის მიკრობიომს, რაც იწვევს ნაწლავის ანთებითი მდგომარეობების მიმართ მგრძნობელობის გაზრდას.
ხელოვნური საკვები საღებავების გარშემო ერთ-ერთი ყველაზე გავრცელებული საფრთხე არის მისი გავლენა ბავშვების ქცევაზე. ამერიკის პედიატრიის აკადემიის თანახმად, ყურადღების დეფიციტისა და ჰიპერაქტიურობის სინდრომის მქონე ბავშვების კვების რაციონიდან ხელოვნური საკვები საღებავების შემცველი პროდუქტების ამოღება ხელს შეუწყობს სიმპტომების შემცირებას.
უკანასკნელი კვლევა ხელს უწყობს იმ მოსაზრების განმტკიცებას, რომლის მიხედვითაც საღებავი Red 40 შეიძლება ჯანმრთელობისთვის საზიანო იყოს და ამავდროულად მნიშვნელოვანი გაფრთხილებაა იმ საკვები საღებავების პოტენციური ზიანის შესახებ, რომელსაც ყოველდღიურად ვიყენებთ.
წითელი საღებავი ხშირად გვხვდება გადამუშავებულ საკვებში. საკვების მწარმოებლები მას იყენებენ ტკბილეულში, წასახემსებელ პროდუქტებში, გამაგრილებელ სასმელებში, ასევე სანელებელებში, ნაყინში, ცომეულში და ხილის წვენებში.