მედიასტინოსკოპია
ამ კვლევის დროს მედიასტინოსკოპის შესაყვანად კისრის მიდამოში კეთდება ქსოვილების განაკვეთი. მედიასტინოსკოპია ბიოფსიით სპეციალისტებს ეხმარება ადამიანის ქსოვილის მიკროსკოპული კვლევის ჩატარებაში კიბოს, ინფექციური და ანთებითი პროცესების გამოსავლენად.
ხშირად მედისტინოსკოპიისას გამოიყენება ბიოფსიის სხვა მეთოდები - კომპიუტერული ტომოგრაფიის, ექოკარდიოგრაფიის ან ბრონქოსკოპიის გამოყენებით.
კვლევის ჩვენებები და უკუჩვენებები
მედიასტინოსკოპია აუცილებელია სპეციალისტებისათვის შუასაყრის ბიფურკაციული ან პარატრაქეალური ლიმფური კვანძების ბიოფსიის ჩასატარებლად. დიაგნოსტიკის გაფართოებული ვარიანტი გამოიყენება ბრონქოპულმონური ლიმფური კვანძების, ასევე ფილტვის ქსოვილის ბიოფსიის ჩასატარებლად. ეს კი საჭიროა გულმკერდში დაადენოპათიის მიზეზების ვერიფიკაციის, ფილტვის კიბოს მეტასტაზების არსებობის განსასაზღვრად, მოცემულ ლიმფურ კვანძებში ონკოლოგიური დაავადების სტადიის დასაზუსტებლად, შუასაყრის ლიმფური კვანძების ან ფილტვის ქსოვილის (ფილტვის დისემინირებული პროცესების მიმდინარეობისას) დაზიანების ხარისხის დიაგნოსტირებისათვის. ზოგჯერ აღნიშნული სადიაგნოსტიკო მეთოდი პარატრაქეალური კისტების, ცისტის მაგვარი ახალწარმონაქმნის, მცირე ზომის თიმომების მოშორების საშუალებას იძლევა.
გაფართოებული მედიასტინოსკოპიის ჩასატარებლად სპეციალისტები ასახელებენ ისეთ ჩვენებებს, როგორიცაა - საყლაპავის ზედა, შუა ან ქვედა მესამედის კიბო. ხშირად აღნიშნული კვლევა ინიშნება სარკოიდოზის, ლიმფომის, ტუბერკულოზის დიაგნოსტირების, ასევე ქირურგიული ჩარევის, ქიმიოთერაპიული ან სხივური თერაპიული ზემოქმედების ოპტიმალური შერჩევისთვის.
მედიასტინოსკოპიის ძირითადი უკუჩვენებაა ფარისებრი ჯირკვლის 4-5 ხარისხით გადიდება, ზემო ღრუ ვენის სინდრომი, იმდენად რამდენადაც პროცედურამ შეიძლება გამოიწვიოს ვენური სისხლდენა.
მედიასტინოსკოპია, საზოგადოდ, ქირურგიული ანუ ოპერაციული ჩარევაა. აღნიშნული პროცედურის ჩატარებისას ძირითად საშიშროებას წარმოადგენს მსხვილი არტერიის დაზიანება და ძლიერი სისხლდენა. ამიტომ სპეციალისტი ყოველთვის უნდა იყოს მზად თორაკოტომიის ან მედიასინოტომიის დაუყოვნებლივ ჩასატარებლად.
კვლევისთვის მომზადება
კვლევის ჩატარებამდე პაციენტმა ექიმთან ერთად უნდა განიხილოს მისთვის საინტერესო ყველა საკითხი.
ლიმფურ კვანძებში კიბოს უჯრედების არსებობისას ქირურგმა შესაძლებელია კვლევის დროს ისინი მოაშოროს. კვლევამდე პაციენტმა უნდა აცნობოს ექიმს, რა წამლებს იღებს, აქვს თუ არა ალერგია ამა თუ იმ პრეპარატზე და ა.შ. კვლევამდე, სულ მცირე, 6 საათით ადრე არ უნდა მიიღოს საჭმელი და 2 საათით ადრე - სასმელი. კვლევისთვის სპეცილისტი იღებს ლიმფური კვანძის ან სხვა ორგანოს პათოლოგიურ ქსოვილს. პროცედურა დაახლოებით 1 საათამდე გრძელდება. რადგანაც მედიასტინოსკოპია ზოგადი ნარკოზით კეთდება, პაციენტი ვერ გრძნობს ტკივილს მისი მიმდინარეობისას.
რა გართულებები შეიძლება აღინიშნებოდეს მედიასტინოსკოპიის შემდეგ
ძალიან იშვიათად შეიძლება განვითარდეს პნევმოთორაქსი, სისხლდენა, ინფექციური დაავადებები, საყლაპავის გახეთქვა, სასულეს ირგვლივ არსებული ნერვებისა და სისხლძარღვების დაზიანება, დისფონია. პაციენტის დაუყოვნებლივ საავადმყოფოში გადაყვანა საჭიროა, თუ ჩატარებული პროცედურის შემდეგ აღინიშნება: ნაკერის ადგილზე სისხლდენა, ცხელება, მკერდის არეში ძლიერი ტკივილი, კისრის შეშუპება, ქოშინი, ყლაპვის გართულება ან დისფონია.
სამედიცინო პრაქტიკაში მედიასტინოსკოპიის ჩატრებისას ნორმულ მაჩვენებლებად ითვლება გლუვი და გაუდიდებელი ლიმფური კვანძები, ქსოვილებში პათოლოგიის, წანაზარდების ან ინფექციური დაავადებების სიმპტომების არარსებობა. პათოლოგიას მიეკუთვნება გადიდებული ლიმფური კვანძები, რომელიც შეიძლება მეტყველებდეს სარკოიდოზზე, კიბოზე, ინფექციურ დაავადებებზე, აბსცესზე. ამასთან, კიბოს უჯრედების გამოვლენისას შესაძლებელია მათი ქირურგიული მოშორება.