მარიამ ფოლადაშვილი

მიეკუთვნება ანტი-თირეოიდულ მედიკამენტებს. მას შეუძლია ხელი შეუშალოს რადიოაქტიური იოდის შეწოვას ფარისებრი ჯირკვლის მიერ, რითაც იცავს ამ ჯირკვალს რადიაციული დაზიანებისგან.

KI ბლოკავს რადიოაქტიური იოდის შეღწევას ფარისებრ ჯირკვალში. როდესაც ადამიანი იღებს KI-ს, მედიკამენტში შემავალი სტაბილური იოდი შეიწოვება ფარისებრი ჯირკვლის მიერ. KI „ავსებს“ ფარისებრ ჯირკვალს არარადიოაქტიური იოდით და ხელს უშლის რადიოაქტიური მოლეკულების შეწოვას.

ფარისებრი ჯირკვალი არარადიოაქტიური იოდით „გავსების“ შემდეგ ვერ შთანთქავს მეტ იოდს - ვერც სტაბილურს და ვერც რადიოაქტიურს - მომდევნო 24 საათის განმავლობაში.

რეკომენდებული დოზის გამოყენებისას, KI ეფექტურია ფარისებრი ჯირკვლის კიბოს რისკის შესამცირებლად იმ ინდივიდებში, რომლებიც რადიოიოდის ექსპოზიციის რისკის ქვეშ არიან.

კალიუმის იოდიდი იცავს მხოლოდ ფარისებრ ჯირკვალს და არა სხვა ორგანოებს რადიოაქტიური იოდისგან.

კალიუმის იოდიდი არ იცავს ორგანიზმს მასში რადიოაქტიური იოდის მოხვედრისგან და მას არ შეუძლია გამოასწოროს რადიოაქტიური იოდით გამოწვეული ჯანმრთელობის პრობლემები ფარისებრი ჯირკვლის დაზიანების შემდეგ.

კალიუმის იოდიდი ვერ იცავს ორგანიზმს რადიოაქტიური იოდის გარდა სხვა რადიოაქტიური ელემენტებისაგან(თუ რადიოაქტიური იოდით მოწამვლა არ აღინიშნება, KI-ის მიღება არ არის რეკომენდებული და შეიძლება ზიანი მიაყენოს ორგანიზმს).

სუფრის მარილი და იოდით მდიდარი საკვები არ შეიცავს საკმარის იოდს, რათა დაბლოკოს რადიოაქტიური იოდის მოხვედრა ფარისებრ ჯირკვალში. (არ შეიძლება სუფრის მარილის ან საკვების გამოყენება KI-ის შემცვლელად).

არ გამოიყენოთ დიეტური დანამატები, რომლებიც შეიცავს იოდს KI-ის სახით. ისინი შეიძლება იყოს მავნე და არაეფექტური.

კალიუმის იოდიდი არ იცავს ადამიანს რადიოაქტიური იოდისგან 100%-ით. მის მიერ ფარისებრი ჯირკვლის დაცვა დამოკიდებულია შემდეგ ფაქტორებზე:

რადიოაქტიური დაბინძურებიდან გასული დრო: რაც უფრო ადრე მიიღებს ადამიანი KI-ს, ფარისებრ ჯირკვალს მით მეტი დრო ექნება რომ „შეივსოს“ სტაბილური იოდით.

აბსორბცია: სტაბილური იოდის რაოდენობა, რომელიც შეიწოვება ფარისებრ ჯირკვალში, დამოკიდებულია იმაზე, თუ რამდენად სწრაფად შეიწოვება KI სისხლში.

კალიუმის იოდიდი უნდა მიიღოთ მხოლოდ ექიმის რეკომენდაციით, რადგან არსებობს ჯანმრთელობის რისკები, რომლებიც დაკავშირებულია KI-ის მიღებასთან.

კალიუმის იოდიდის მიღება არ არის რეკომენდებული იმ პირებში, რომელთაც აქვთ:

• ჰერპეტიფორმული დერმატიტი;
• ჰიპოკომპლემენტემიური ვასკულიტი;
• გულ-სისხლძარღვთა დაავადები და კვანძოვანი ფარისებრი ჯირკვალი;
• იოდზე ჰიპერმგრძნობელობა (ან ალერგია)

KI სიფრთხილით უნდა მიიღონ მრავალკვანძოვანი ჩიყვის, გრეივსის დაავადების და აუტოიმუნური თირეოიდიტის მქონე პირებმა, განსაკუთრებით მაშინ თუ მკურნალობა რამდენიმე დღე გრძელდება.

კალიუმის იოდიდის უფრო ძლიერი დოზის ან რეკომენდებულზე ხშირად მიღება არ იძლევა მეტ დაცვას და შეიძლება გამოიწვიოს მძიმე ავადმყოფობა ან სიკვდილი.

კალიუმის იოდიდის მაღალმა დოზებმა ან ხანგრძლივმა გამოყენებამ შეიძლება გამოიწვიოს იოდით მოწამვლა.

კალიუმის იოდიდმა შეიძლება გამოიწვიოს გვერდითი მოვლენები (აუცილებლად აცნობეთ ექიმს)

შეშუპებული ჯირკვლები.

მეტალის გემო პირში.

თავის ტკივილი.

მუცლის ტკივილი.

გულისრევა.

ღებინება.

დიარეა

ზოგიერთი გვერდითი ეფექტი შეიძლება იყოს სერიოზული. თუ თქვენ გაქვთ რომელიმე ჩამოთვლილი სიმპტომი, უნდა შეწყვიტოთ კალიუმის იოდიდის მიღება და დაუყოვნებლივ მიმართოთ ექიმს:

• გამონაყარი;
• ჭინჭრის ციება;
• სახსრების ტკივილი;
• ცხელება;
• სახის, ტუჩების, ენის, ყელის, ხელების ან ფეხების შეშუპება;
• სუნთქვის, ლაპარაკის ან ყლაპვის გაძნელება;
• ჰაერის უკმარისობა;
• არარეგულარული გულისცემა;
• მკერდის ტკივილი

გვერდითი მოვლენები ნაკლებად სავარაუდოა, როდესაც KI გამოიყენება რეკომენდებული დოზით და ხანმოკლე დროით, აქედან გამომდინარე აუცილებელია მედიკამენტის მიღებამდე კონსულტაცია გაიაროთ ექიმთან და მიიღოთ ზუსტი ინსტრუქციები და რეკომენდაციები მედიკამენტის დოზებთან და მიღებასთან დაკავშირებით.

კალიუმის იოდიდის მიღებამდე:

• აცნობეთ ექიმს, თუ ალერგიული ხართ კალიუმის იოდიდის, იოდის, ნებისმიერი სხვა მედიკამენტის რომელიმე ინგრედიენტის მიმართ;
• უთხარით თქვენს ექიმს რა მედიკამენტებს, ვიტამინებს, საკვებ დანამატებს და მცენარეულ პროდუქტებს იღებთ ან აპირებთ, რომ მიიღოთ;
• თუ თქვენ გაქვთ ან ოდესმე გქონიათ ფარისებრი ჯირკვლის დაავადება, როგორიცაა გრეივსის დაავადება (მდგომარეობა, როდესაც სხეული უტევს ფარისებრ ჯირკვალს, რაც იწვევს მის ზედმეტ აქტიურობას) ან ჰაშიმოტოს თირეოიდიტი, შეგიძლიათ მიიღოთ კალიუმის იოდიდი ექიმის რეკომენდაციით, გადაუდებელ შემთხვევაში. თუ თქვენ გჭირდებათ კალიუმის იოდიდის მიღება რამდენიმე დღეზე მეტი ხნის განმავლობაში, უნდა მიმართოთ ექიმს.
• აცნობეთ ექიმს, თუ ხართ ორსულად, ან ხართ მეძუძური. თუ ორსულად ხართ ან ბავშვს ძუძუთი კვებავთ, შეგიძლიათ მიიღოთ კალიუმის იოდიდი, ექიმის რეკომენდაციით, გადაუდებელ შემთხვევებში. აუცილებელია ექიმის კონტროლი.
• თუ ერთ თვეზე უმცროს ბავშვს აძლევთ კალიუმის იოდიდს, დაურეკეთ ბავშვის ექიმს რაც შეიძლება მალე, რეკომენდაციებისა და მონიტორინგის მიზნით.