ასაკობრივი მაკულარული დეგენერაცია - ადრეულმა გამოვლენამ და დროულმა მკურნალობამ მხედველობის შენარჩუნებას შეიძლება შეუწყოს ხელი
მდგომარეობა, პირველ რიგში, გავლენას ახდენს მაკულაზე, რომელიც ბადურის რეგიონია და პასუხისმგებელია ცენტრალურ მხედველობაზე.დაავადების შემთხვევაში ადამიანს უჭირს ისეთი აქტივობების შესრულება როგორიცაა კითხვა, მანქანის მართვა(თუმცა, შენარჩუნებულია პერიფერიული მხედველობა).
დაავადების ნიშნებისა და სიმპტომების გაგება, სათანადო მონიტორინგი, დაავადების განვითარების ადრეული გამოვლენა და დროული მკურნალობა მხედველობის შენარჩუნების მთავარი ფაქტორებია.
არსებობს მშრალი და სველი მაკულარული დეგენერაცია. მშრალი მაკულარული დეგენერაციის დროს ყვითელი ხალი თხელდება მისი უჯრედების განლევასთან ერთად. ამ შემთხვევაში დაავადებამ შეიძლება ორივე თვალი დააზიანოს. ბადურაზე არ აღინიშნება ნაწიბუროვანი ქსოვილი, სისხლდენა ან სითხის ჟონვა.
სველი მაკულარული დეგენერაცია თავდაპირველად მშრალი ფორმით ვლინდება. ამ დროს ყვითელი ხალის ქვეშ ახალი სისხლძარღვები ვითარდება. მათგან შესაძლოა სისხლი და სითხე გამოიჟონოს და ბადურას ქვეშ დაგროვდეს. მისგან საბოლოოდ ამობურცული, ნაწიბუროვანი ქსოვილი ვითარდება. სველი ფორმა თავდაპირველად ერთ თვალს აზიანებს, მაგრამ დროთა განმავლობაში ორივე შეიძლება მოიცვას.
შრალი მაკულარული დეგენერაციის დროს ცენტრალური მხედველობა ნელა და უმტკივნეულოდ ქვეითდება. საგნები გახუნებული ჩანს, მათი წვრილი დეტალები კი აღარ განირჩევა.
სველი დეგენერაციისას მხედველობის დაკლება სწრაფად პროგრესირებს და შეიძლება უეცრადაც განვითარდეს, თუ ერთ-ერთი ახალგანვითარებული სისხლძარღვიდან სისხლდენა დაიწყო. ამის პირველი სიმპტომი შესაძლოა გამოსახულების დეფორმაცია იყოს ცალ თვალში, რის გამოც სწორი, წვრილი ხაზები დაკლაკნილი ჩანს. ხშირად ეს დაავადებულებს კითხვას ან ტელევიზორის ყურებას უძნელებს.
ასაკობრივმა მაკულარულმა დეგენერაციამ ძლიერ შეიძლება დააქვეითოს მხედველობა, მაგრამ იგი, როგორც წესი, სრულ სიბრმავეს არ იწვევს. მხედველობის ველის კიდურა, პერიფერიულ ნაწილში თვალის ჩინი შენარჩუნებულია ხოლმე. დეგენერაციის მშრალი ფორმა შედარებით ნელა აქვეითებს მხედველობას.
საშუალო სიმძიმის ან მძიმე მშრალი დეგენერაციის ან ცალ თვალში სველი დეგენერაციის მქონე ადამიანებისთვის სასარგებლოა დიდი რაოდენობით ანტიოქსიდანტები (C ვიტამინი, ვიტამინი, ბეტა-კაროტინი და თუთია, ცოტა რაოდენობით სპილენძთან ერთად. მათ, ვინც თამბაქოს მოიხმარდა ბოლო შვიდი წლის განმავლობაში, არ უნდა მიიღონ ბეტა-კაროტინი ან ვიტამინი, რადგან ეს დანამატები ფილტვის კიბოს რისკს ზრდის. დაავადების პროგრესირება შესაძლოა შეანელოს მაღალი არტერიული წნევის მკურნალობამ და უფრო დიდი რაოდენობით ომეგა-3 ცხიმოვანი მჟავებისა და მუქი მწვანე, ფოთლოვანი ბოსტნეულის მიღებამ.
მაკულარული დეგენერაციის სველი ფორმის დროს ახალწარმოქმნილი სისხლძარღვებიდან სითხის ჟონვის შესაჩერებლად გამოიყენება წამლების ინექციები, სამკურნალოდ გამოიყენება ლაზერიც.