ლალი ჩხიკვაძე

თუმცა, თუ უცებ შეამჩნევთ, რომ იგივე კვების რეჟიმის, ძილისა და ფიზიკური აქტივობის მიუხედავად, წელის ხაზი სწრაფად ქრება და გიჭირთ შარვლის ან ქვედაკაბის ღილების შეკვრა, მაშინ შესაძლოა ე.წ. „ჰორმონული მუცელი“ იყოს

ეს არ არის სამედიცინო ტერმინი, მაგრამ მეტ-ნაკლებად ზუსტად ასახავს პრობლემის არსს - მუცლის არეში ცხიმოვანი ქსოვილის გადაჭარბებული დაგროვება ჰორმონალური დისბალანსის გამო.

ჰორმონები საჭიროა ორგანიზმში მრავალი მნიშვნელოვანი პროცესის დასარეგულირებლად, მათ შორის მეტაბოლიზმის, სტრესზე რეაქციის, შიმშილისა და დანაყრების გრძნობის, სექსუალური და რეპროდუქციული ფუნქციების და მრავალი სხვა.

ეს არის ქიმიური სიგნალების რთული, საგულდაგულოდ აგებული ქსელი, რომელიც აკავშირებს სხვადასხვა ორგანოებსა და სისტემებს, რომელთა დახმარებითაც ორგანიზმი ფუნქციონირებს ოპტიმალურ რეჟიმში, ანუ არის ჯანმრთელ მდგომარეობაში. ჰორმონალური ქსელის ნებისმიერი დარღვევა და შეუსაბამობა იწვევს ჯანმრთელობის გარკვეულ შედეგებს, რომელთაგან ერთ-ერთი შეიძლება იყოს "ჰორმონული მუცელი".

შესაძლო მიზეზები

• ფარისებრი ჯირკვლის ჰორმონის დეფიციტი

ფარისებრი ჯირკვალი აწარმოებს ჰორმონებს, რომლებიც აკონტროლებენ მეტაბოლიზმს, ანუ როგორ იყენებს სხეული ენერგიას. ეს იმდენად სასიცოცხლო პროცესია, რომ ფარისებრი ჯირკვლის ჰორმონები თითქმის ყველა ორგანოზე მოქმედებს.

როდესაც ფარისებრი ჯირკვალი არასაკმარისად ფუნქციონირებს და გამოიმუშავებს ნაკლებ ჰორმონებს, ვიდრე ორგანიზმს სჭირდება, ამ მდგომარეობას ჰიპოთირეოზი ეწოდება. ჰიპოთირეოზის დროს, რომელიც უფრო ხშირად აწუხებს ქალებს, ვიდრე მამაკაცებს, სხეულის ყველა ფუნქცია ნელდება, მათ შორის სხეულის ენერგიის დაწვის სიჩქარე, რაც იწვევს წონის მატებას და ცხიმის დაგროვებას წელის გარშემო.

ჰიპოთირეოზის სხვა სიმპტომებია ენერგიის დაკარგვა, კუნთების და სახსრების ტკივილი, სიცივის შეგრძნება, მშრალი კანისა და თმის ცუდი მდგომარეობა, ნელი გულისცემა, არარეგულარული მენსტრუალური ციკლი, რეპროდუქციული პრობლემები და დეპრესია.

• მენოპაუზა

მენოპაუზის დაწყებისას საკვერცხეები თანდათან წყვეტს ქალის სასქესო ჰორმონების, ესტროგენების გამომუშავებას, რაც სხვა შედეგებთან ერთად იწვევს ცხიმის მეტაბოლიზმის დარღვევას და ცხიმის დაგროვებას მუცლის არეში.

• ქრონიკული სტრესი

მწვავე სტრესის დროს თირკმელზედა ჯირკვლები წარმოქმნიან ჰორმონ კორტიზოლს, რომელიც ეხმარება ორგანიზმს გაუმკლავდეს სიტუაციას და გადამწყვეტ როლს თამაშობს ბრძოლა-ან-გაქცევის რეაქციის განვითარებაში, რომელიც მიმართულია გადარჩენისთვის. რაც უფრო ნერვიულობთ და ღელავთ, მით მეტი კორტიზოლი გამოიყოფა სისხლში.