რა შეიძლება იყოს დაბალი არტერიული წნევის მიზეზი
პირველადი ჰიპოტენზია - თავის ტვინის სისხლძარღვთა მამოძრავებელი ცენტრების განსაკუთრებული ფორმის ნევროზია, რომლის განვითარებასაც სტრესი და ხანგრძლივი ფსიქოტრავმული სიტუაციები განაპირობებს. უშუალო მიზეზი შეიძლება იყოს: ფსიქოლოგიური ტრავმები, ქრონიკული გადაღლა, უძილობა, დეპრესია.
მეორეული არტერიული ჰიპოტონია - სხვა დაავადებათა სიმპტომია: ანემიის, კუჭის წყლულის, დემპინგ-სინდრომის, ჰიპოთირეოზის, კარდიომიოპათიის, მიოკარდიტის, არითმიის, დიაბეტური ნეიროპათიის, ხერხემლის კისრის ნაწილის ოსტეოქონდროზის, ინფექციური დაავადებების, გულის უკმარისობისა და სხვათა.
არტერიული ჰიპოტონია შეიძლება განვითარდეს В, С და Е ვიტამინების ნაკლებობისას, დიეტის დაცვისას, არტერიული ჰიპერტენზიის სამკურნალო პრეპარატების დოზის გადაჭარბების დროს.
არტერიული ჰიპოტონია შეიძლება შეგვხვდეს ჯანმრთელ პირებში, იყოს სხვადასხვა დაავადების თანმხლები ან დამოუკიდებელი ფორმა.
ფიზიოლოგიური ჰიპოტონია შეიძლება იყოს მემკვიდრეობითი ხასიათის, შეგვხვდეს მაღალმთიან, ტროპიკულ ან სუბტროპიკულ ზონაში მცხოვრებლებთან და იმ პირებში, რომლებიც გადაჭარბებულად ვარჯიშობენ. ფიზიოლოგიური ჰიპოტონია, უმრავლეს შემთხვევაში, ადამიანს განსაკუთრებულ დისკომფორტს არ უქმნის.
პათოლოგიური, პირველადი არტერიული ჰიპოტონია, როგორც დამოუკიდებელი დაავადება, მოიცავს იდიოპათიურ ორთოსტატიურ ჰიპოტენზიას და ნეიროცირკულატორულ დისტონიას.
მეორეულ არტერიულ ჰიპოტონიად განიხილება მწვავე (კოლაპსი, შოკი) და ქრონიკული ფორმები, რომლებიც განპირობებულია გულ-სისხლძარღვთა, ნერვული, ენდოკრინული სისტემის, ჰემატოლოგიური დაავადებებით, ინტოქსიკაციებით და სხვა.
მწვავე არტერიული ჰიპოტონია - შეიძლება იყოს მასიური, სისხლდენის, გაუწყლოების, ტრავმის, მოწამვლის, ანაფილაქსიური შოკის, გულის მუშაობის მკვეთრი დარღვევის შედეგი. ასეთ შემთხვევებში არტერიული ჰიპოტენზია სწრაფად ვითარდება და შინაგან ორგანოებში სისხლის მიმოქცევის დარღვევას იწვევს. მწვავე ფორმის არტერიულ ჰიპოტონიას ახასიათებს: თავბრუსხვევა, მხედველობის ხანმოკლე დარღვევა, სიარულისას ბარბაცი, კანის სიფერმკრთალე, გულის წასვლა.
ქრონიკულ არტერიული ჰიპოტონია - ხასიათდება ხანგრძლივი მიმდინარეობით, ამ დროს ორგანიზმი ადაპტირებულია დაბალ წნევასთან, ამიტომ სისხლის მიმოქცევის მოშლილობის სიმპტომები არ არის.
მკურნალობა უნდა დაიწყოს მიზეზის დადგენის შემდეგ.