მიოკარდიტი - რა იწვევს მას
რასაც შედეგად ინფექციური პროცესის გართულება მოჰყვება.
ვირუსული ინფექციის ერთ-ერთი გართულებაა მიოკარდიტი – გულის კუნთის ანთება.
მიოკარდიტი მიოკარდიუმის (მიოკარდიუმი, გულის კუნთოვანი, ფუნქციურად ყველაზე მნიშვნელოვანი შრეა და პასუხისმგებელია ამ ორგანოს შეკუმშვა-მოდუნებაზე, რაც გულში და მასთან ერთად მთელ სხეულში სისხლის ცირკულაციას უზრუნველყოფს) ანთებაა. ამ დროს ანთება ორგანიზმის პასუხია დაზიანებაზე ან ინფექციაზე. ანთებითი ცვლილებები კი გულის ფუნქციის დაქვეითებას იწვევს: დიდდება და სუსტდება გულის კუნთი, წარმოიქმნება ნაწიბუროვანი ქსოვილი, რაც შეკუმშვის უნარს ამცირებს და გულს მეტი ძალისხმევა სჭირდება სხეულში სისხლის ნორმალურად გადასროლისთვის.
მიოკარდიტის ყველაზე გავრცელებული მიზეზი ვირუსული ინფექციაა. ორგანიზმში პათოგენური აგენტის მოხვედრისას იმუნური სისტემა აქტიურდება და მის უვნებელსაყოფად წარმოქმნის ქიმიურ ნივთიერებებს, რომლებიც გულის კუნთში ანთებით პროცესს იწვევს.
დაავადების გამომწვევი ვირუსებია:
- ციტომეგალოვირუსი;
- ენტეროვირუსი;
- ეპშტეინ-ბარის ვირუსი (იწვევს ინფექციურ მონონუკლეოზს);
- ჰერპესვირუსი;
- C ჰეპატიტის ვირუსი;
- ადამიანის იმუნოდეფიციტის ვირუსი
- ექოვირუსები (იწვევს კუჭ-ნაწლავის ინფექციებს);
- წითურას ვირუსი
ვირუსული მიოკარდიტის სიმძიმე დამოკიდებულია ვირუსის სახეობაზე, მის ვირულენტობასა და ტროპიზმზე.
ვირუსების გარდა მიოკარდიტი შეიძლება გამოიწვიოს ბაქტერიებმაც.
დაავადების გამომწვევი ბაქტერიებია:
- სტრეპტოკოკები;
- სტაფილოკოკი;
- ბორელია (ლაიმის დაავადება);
- მიკოპლაზმა (ფილტვის ინფექციები)
გულის კუნთის დაზიანება შეიძლია სოკოვან და პარაზიტულ დაავადებებსაც უკავშირდებოდეს, მათ შორის – ასპერგილოზს, კანდიდოზს, ჰისტოპლაზმოზს.
დაავადების დიაგნოსტიკა რთულია, რადგან სპეციფიკური სიმპტომატიკა არ გააჩნია, ზოგჯერ კი, შესაძლოა სულაც უსიმპტომოდ მიმდინარეობდეს. ხშირად მჟღავნდება გრიპის მსგავსი სიმპტომებით:
- ქოშინით, თავდაპირველად – ფიზიკური დატვირთვისას, შემდეგ – მოსვენების დროსაც;
- სწრაფად დაღლით;
- ცხელებით;
- სახსრების ტკივილით;
- ქვედა კიდურების შეშუპებით;
- გულმკერდის არეში მკვეთრი ტკივილით, რომელიც მხარში ან კისერში გადაეცემა;
- კუნთების ტკივილით;
- ყელის ტკივილით;
- თავის ტკივილით;
- დიარეით;
- შარდის რაოდენობის შემცირებით
გულისმხრივი სიმპტომები ვირუსული ინფექციიდან 1-2 კვირის შემდეგ იჩენს თავს.
შესაძლოა დაირღვეს გულის რიტმი, იშვიათ შემთხვევაში მოსალოდნელია გონების დაკარგვა.
ზოგჯერ დაავადება თავისთავად უკუგანვითარდება, ზოგჯერ კი დიდხანს და შეუმჩნევლად გრძელდება, თუმცა გულის კუნთი ამ შემთხვევაშიც ზიანდება და მაინც იჩენს თავს გულის უკმარისობის სიმპტომები: სისუსტე, ქოშინი, ჰაერის უკმარისობა, ადვილად დაღლა, ქვედა კიდურების შეშუპება, გულისცემის აჩქარება.
თუ ტკივილს გულმკერდის არეში და სუნთქვის გაძნელებას, მით უმეტეს – თუ მცირე ხნით ადრე ვირუსული ინფექცია გადაიტანეთ, აუცილებლად მიმართეთ ექიმს. ადრეული დიაგნოსტიკა მძიმე გართულებებისა და გულის კუნთის მძიმე დაზიანების თავიდან აცილებაში დაგეხმარებათ.
