რა შეიძლება გახდეს ბავშვებში გულმკერდის არეში ტკივილის მიზეზი და როდის არის საჭირო ექიმთან ვიზიტი
08.12.2022
გულმკერდის არეში ტკივილს უამრავი მიზეზი აქვს. ამ მიდამოში არაერთი ორგანო თუ ქსოვილია თავმოყრილი (გული, ფილტვები, ნეკნები, კუნთები, ნერვები).
ნებისმიერი მათგანის დაზიანებამ თუ გაღიზიანებამ შეიძლება გულმკერდის ტკივილი გამოიწვიოს.
ზრდასრულ ასაკში, როგორც წესი, გულმკერდის ტკივილი გულ-სისხლძარღვთა დაავადებებთან არის დაკავშირებული. თუმცა, ბავშვებში გულმკერდის არეში ტკივილი იშვიათად მიუთითებს სასიცოცხლოდ მნიშვნელოვანი ორგანოს პათოლოგიაზე.
ბავშვებში გულმკერდის ტკივილის ყველაზე გავრცელებული მიზეზებია:
- გულძმარვა;
- რესპირატორული სისტემის დაავადებები;
- ბრონქული ასთმა;
- ყლაპვის გაძნელება;
- სტრესი და შფოთვა;
- სკოლიოზი;
- ნეკნების დაზიანება;
გულმკერდის არეში ტკივილის მიზეზი, იშვიათად, შესაძლებელია იყოს გულ-სისხლძარღვთა პათოლოგიები:
- არტერიული ანევრიზმა;
- თანდაყოლილი კარდიომიოპათია - ამ დროს გულის კუნთი ზედმეტად გასქელებულია და თავის ფუნქციას ვეღარ ასრულებს;
- მიოკარდიტი - გულის კუნთოვანი შრის ანთება. მიოკარდიტის ყველაზე გავრცელებული მიზეზი ვირუსული ინფექციაა (ეპშტეინ-ბარის ვირუსი, ციტომეგალოვირუსი, C ჰეპატიტის ვირუსი);
- პერიკარდიტი - გულის პერანგის ანთება. შესაძლოა თან ახლდეს მუცლის ან ფეხების შეშუპება, ხველა, დაღლილობა, სისუსტე, ქოშინი, დაბალი ცხელება, გულისცემის გახშირება
როდის უნდა მიმართოთ ექიმს:
გულმკერდის არეში ტკივილი ყურადღებას მოითხოვს. შემდეგი სიმპტომების შემჩნევისას აუცილებელია, დაუყოვნებლივ ექიმთან მიმართვა თუ შეინიშნება:
- პროგრესირებადი ტკივილი;
- ზეწოლის შეგრძნება გულმკერდის მიდამოში;
- ტკივილი, რომელიც აღმოცენდება ფიზიკური დატვირთვისას;
- ტკივილი გულმკერდის არეში იმ ბავშვებში, რომელთაც გულის თანდაყოლილი პათოლოგიები აქვთ;
- ტკივილი იმ ბავშვებში, რომელთაც გულ-სისხლძარღვთა პათოლოგიების ოჯახური ისტორია აქვთ
