ბათუმში ვაქცინაციის პროცესში დამატებით ორი კლინიკა ჩაერთო
- ამის შესახებ აჭარის ჯანდაცვის სამინისტროში განაცხადეს. უწყების ინფორმაციით, კლინიკების ჩამონათვალს - ბორჩაშვილის სახელობის ჯანმრთელობის ცენტრი "მედინა" და ბათუმის საერთაშორისო საუნივერსიტეტო ჰოსპიტალი - BAU დაემატა.
უწყებაში ამბობენ, რომ ჯამში ,,ფაიზერით“ ვაქცინაცია აჭარაში დამტებით 5 სამედიცინო დაწესებულებაშია შესაძლებელი, მათ შორის მაღალმთიან აჭარაში. მსურველებს ჯავშნის გაკეთება ხულოს, შუახევისა და ქედის „ევექსის“ ჰოსპიტლებში შეუძლიათ. გაიზარდა ამცრელი კაბინეტების რაოდენობა ბათუმის რესპუბლიკურ საავადმყოფოშიც და ,,ფაიზერით“ აცრის მსურველ მოქალაქეებს დამატებით 6 ბრიგადა მოემსახურება.
აჭარის ჯანდაცვის მინისტრის ნინო ნიჟარაძის ინფორმაციით, აჭარაში იმუნიზაციის არეალი დღითიდღე მზარდია. ამ ეტაპზე ვაქცინაცია მიმდინარეობს 18 სამედიცინო დაწესებულებაში, 1 ამბულატორიასა და ბათუმის ორ დიდ სავაჭრო ცენტრში. უახლოეს დღეებში პროცესს დამატებით ქობულეთის, ხელვაჩაურის, ქედის შუახევისა და ხულოს ამბულატორიები შეუერთდებიან.
ამ ეტაპზე სხვადასხვა ვაქცინით აჭარაში 56 270 მოქალაქეა ვაქცინირებული.