თენგიზ ცერცვაძის განცხადებით, მონოკლონურ ანტისხეულებს, რომელსაც საქართველო უახლოეს პერიოდში მიიღებს, მსუბუქი მიმდინარეობის მქონე კოვიდინფიცირებულებში გამოიყენებენ - მკურნალი.გე

მონოკლონურ ანტისხეულებს, რომელსაც საქართველო უახლოეს პერიოდში მიიღებს, მსუბუქი მიმდინარეობის პაციენტებში გამოიყენებენ.

მისივე თქმით, მონოკლონური ანტისხეულები ხელს შეუშლის კორონავირუსის პროგრესირებას და დამძიმებას.

როგორც ცერცვაძე აღნიშნავს, კორონავირუსის მკურნალობაში მომავალი მონოკლონურ ანტისხეულებს ეკუთვნის.

„ჯერჯერობით ამ სამი მონოკლონური ანტისხეულიდან არცერთი არ გამოიყენება ჰისპიტალიზირებული და მძიმე ავადმყოფების სამკურნალოდ. მიმდინარეობს ახალი მონოკლონების გამოცდა, როდესაც ჩვენ მივიღებთ მონოკლონს, რომელიც შველის მძიმე ავადმყოფებს, ეს უდიდესი წინ გადადგმული ნაბიჯი იქნება. ჯერჯერობით სამივე ეს მონოკლონური ანტისხეული, მათ შორის, „სოტროვიმაბი" გამოიყენება ამბულატორიულ ავადმყოფებში, შედარებით მსუბუქი მიმდინარეობის ავადმყოფებში და მისი დანიშნულებაა ხელი შეუშალოს დაავადების პროგრესირებას და დამძიმებას",-აღნიშნავს ცერცვაძე.

ცნობისთვის, საქართველო უახლოეს პერიოდში მონოკლონურ ანტისხეულებს მიიღებს, კერძოდ, საუბარია „ბამლანივამაბის" და „ეთისივამაბის" ქვეყანაში შემოტანაზე.

ჯანდაცვის მინისტრის მოადგილის, თამარ გაბუნიას ინფორმაციით, საქართველო უახლოეს პერიოდში მონოკლონურ ანტისხეულებს დონაციის გზით მიიღებს.

შეგახსენებთ, რამდენიმე დღის წინ აშშ-ის საკვებისა და მედიკამენტების ადმინისტრაციამ კორონავირუსით ინფიცირებული 12 წლის და უფროსი ასაკის პაციენტების სამკურნალოდ, საგანგებო გამოყენებისთვის, მონოკლონური ანტისხეულის პრეპარატი „სოტროვიმაბი“ დაამტკიცა.

CNN-ის ინფორმაციით, ავტორიზაცია ეხება მედიკამენტის გამოყენებას „კოვიდ 19“-ის მსუბუქი და საშუალო სიმძიმის მიმდინარეობის დროს იმ პაციენტებში, რომლებიც დაავადების გართულების რისკის ქვეშ იმყოფებიან და არა უკვე ჰოსპიტალიზებულ პაციენტებში, რომლებიც ჟანგბადის მიწოდებას საჭიროებენ. აშშ-ის საკვებისა და მედიკამენტების ადმინისტრაციაში განმარტავენ, რომ მონოკლონურმა ანტისხეულებმა შეიძლება გააუარესოს იმ ჰოსპიტალიზებული კოვიდპაციენტების შედეგები, რომლებიც ჟანგბადს ან მექანიკურ ვენტილაციას საჭიროებენ. მედიკამენტზე ჩატარებულმა კლინიკურმა ცდამ აჩვენა, რომ „სოტროვიმაბი“ ეფექტურია კორონავირუსის ბრიტანული, სამხრეთ აფრიკული, ბრაზილიური და ინდური ვარიანტების წინააღმდეგაც.